Засгийн газрын өнөөдрийн хуралдаанд Барилга, хот байгуулалтын яамнаас УИХ-ын 2021 оны 88 дугаар тогтоолд туссан улсын төсвийн хөрөнгө оруулалтаар хийгдэж байгаа төсөл арга хэмжээний үнийн өсөлтөд хийсэн магадлалын дүнг танилцуулсан байна. Энэ талаар БХБ-ын сайд С. Мөнхбаатар мэдээлэл өглөө.
Тэрбээр “УИХ-ын 88 дугаар тогтоолоор үнийн өсөлтийг тодорхойлох үүрэг даалгавар өгсөн. БХБЯ-наас байгуулсан ажлын хэсэг Монгол Улсад төсвийн хөрөнгө оруулалтаар хийгдэж байгаа нийт төсөл арга хэмжээний тоог нарийвчлан гаргахад 1153 байснаас төсвийн бус эх үүсвэртэй болон давхцалаас шалтгаатан 31 төсөл, арга хэмжээ хасагдсан.
1122 төсөл арга хэмжээний тоог нэгтгэж, төсвийн захирагч нараас зургадугаар сарын 15-ны байдлаар саналаа ирүүлэхийг хүссэн. Ингээд төсвийн захирагч нарын зүгээс 271 төсөл арга хэмжээг хасуулахаар албан бичгээр хүсэлтээ ирүүлсэн.
Зам тээврийн хөгжлийн төв дээр 77 арга хэмжээ, Эрчим хүчний хөгжлийн төв дээр 13 арга хэмжээ гэхчилэн нийт 851 төсөл арга хэмжээг нэгтгэн, эцэслэж, дүнг нь компани, мөнгөний дүн, он тус бүрээр гаргалаа.
851 төсөл арга хэмжээнээс 521 төсөл арга хэмжээнд магадлал хийсэн. Нийт ажлын 61,8 хувь гэсэн үг. 327 төсөл, арга хэмжээ магадлал ирүүлээгүй. Үүнээс 105 нь баримт бичгийн иж бүрдлээ дутуу ирүүлсэн. Зарим нь бүүр өгөөгүй. Барилгын компаниуд төрийн зүгээс хагас жилийн хугацаанд энэ ажлыг хийж байгааг мэднэ.
Магадлал хийсэн 521 төсөл дээр 269,1 тэрбум төгрөгний үнийн зөрүү гарч байна. Сангийн сайдад болоод Засгийн газрын хуралд бид үүнийг танилцууллаа.
Ирэх долоо хоногт УИХ-д оруулж, энэ хэмжээний дүнг улсын төсөвт суулгах асуудлыг ярина.
Энэ бол УИХ-ын хүрээнд шийдвэрлэх асуудал.
Барилгынхан маань магадлалыг дутуу хийлээ гэх асуудал тавьж байгаа ч яг үнэндээ хөнжлийнхөө хэрээр хөлөө жийнэ шүү дээ.
Магадлал хийсэн 524 төсөл арга хэмжээнд тээврийн үнэ багтсан байгаа. Ингээд зарим нэгээс нь жишээ хэлье.
Сант-Өндөр компани Соёмбо цэцэрлэгт хүрээлэнгийн 1тэрбум 999 сая төгрөгний тендер авсан. Үнийн өсөлтийг тооцоход 460 сая төгрөгөөр өсч байна.
“Цагаан бөлбөө” ХХК нь Ховдын Цэцэг суманд спорт цогцолборын 1 тэрбум 256 сая төгрөгний тендер авсан. Нийт дүн 554 сая төгрөгөөр өссөн.
Булганд “Зост трейд” компанийн Соёлын төвийн барилгын 1 тэрбум 462 сая төгрөгний ажил 180 сая төгрөгөөр өсч байна.
“Навтгар хайрхан” ХХК Баянхонгор Баацагаан суманд 324 хүүхдийн сургуулийн барилга 4 тэрбум 214 сая төгрөгний төсөл авсан байхад дүн нь 1 тэрбум 69 сая төгрөгөөр өсч байна. Магадлал хийж байхад үнийн дүнгээ өсгөж орж ирэх компани ч байсан.
Бид 781 барилгын материалын үнийн өсөлтөөр тооцож, бүх компани төсвийн захирагч нартайгаа уулзаад үнийн өсөлтийг компани бүрээр гаргаж ирлээ.
Барилгын ажилчдын цалингийн асуудлын хувьд яг үнэндээ энэ цаг үед нэг амьсгаагаар шийдэж чадахгүй байна. Барилгын компаниуд тусгайлан хөнгөлөлттэй зээл олгох боломж байхгүй. Үнэнээ хэлье. Төр хувийн хэвшлийн өмнөөс аль болох бүх зохицуулалтыг хийж байна” гэлээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.