Э.Энэрэл: Аалз миний ертөнцийг илүү тодотгодог

Дэлхий ертөнц дээр хэдэн тэрбум хүмүүс амьдардаг хэдий ч бүгд дахин давтагдашгүй дүр төрх, зан араншин, хүсэл мөрөөдөл, үзэл бодолтой. Тиймээс "Зууны мэдээ" сонин “Залуус” буландаа өвөрмөц өнгө төрхөөр өөрийгөө тодотгож яваа  “Z” үеийн төлөөлөл Э.Энэрэлийг онцолж байна.

Блиц:

Хобби: “Е-sport”, “pubg”  тоглох дуртай.

Дуртай өнгө: Хар

Дуртай дуу: Сердце пацана

Өмсөх дуртай хувцас: Сул хувцас

-Аалзтай хамт авахуулсан гэрэл зургууд өөрийг нь илүү тодотгож байгаа харагдлаа.  Хэзээнээс аалз тэжээж эхэлсэн бэ?

-Аалз тэжээгээд дөрвөн сар болж байна. Нэг жилийн өмнөөс аалз авъя гэж бодоод зургаан сар хайсны эцэст олсон. Тэгээд нэг  амьтан тэжээдэг хувь хүнтэй холбогдож авсан. Анх аалзаа хараад “Ямар хөөрхөн амьтан бэ” гэж бодсон. Айх мэдрэмж төрөөгүй. Аалзаа аваад долоо хоногийн дараа л анх удаа гар дээрээ барьж үзсэн. Би ер нь бага байхаасаа л аалз гэрт явж байвал барьж аваад алахгүйгээр гадаа гаргадаг хүүхэд байсан. Гэхдээ жижигхэн аалз их хурдан хөдөлгөөнтэй байдаг учраас хүмүүст эвгүй мэдрэмж төрүүлдэг байх.  Харин том аалз бол  ондоо юм шиг санагддаг.

-Үүлдэрээсээ шалтгаалаад аалзны өнгө, биеийн хэмжээ нь ялгаатай байдаг байх. Өөрийх нь тэжээдэг аалз ямар үүлдэрийнх вэ?

-Тийм ээ. Аалзаа  авахаар судалгаа хийхэд үүлдэрээсээ шалтгаалаад үнэ, аалзны өнгө гээд ялгаатай байсан. Миний тэжээдэг аалз “Tarantula” үүлдэрийн “pink birdeater”  нэртэй.

-Аалз тэжээж эхлэхэд гэрийхэн нь хэрхэн хүлээж авсан бол?

-Гэрийнхэн  маань миний сонирхлыг эсэргүүцэж байгаагүй.  Зарим хүн “Ямар хөөрхөн юм бэ. Хүн бүрийн сонирхол, үзэл бодол өөр” гэж эерэгээр хүлээж авдаг. Харин зарим нь “Ямар гаж сонирхолтой юм бэ” гэж хэлдэг. Гэхдээ “би” гэх  хувь орон зай хүн учраас юу хийх тухайн хүний л асуудал. Өөрийнхөө ертөнцийг өөрөө л бүтээх хэрэгтэй.

-Махчин амьтны нэг төрөл бол аалз. Аалзандаа ямар хоол өгдөг вэ?

-Гөлчгий,  superworm,  wealworm  гэсэн амьд амьтан иддэг. Хоолыг нь долоо хоногт нэгийг өгөхөд болчихдог. Гөлчгийгөө удаан иддэг. Хоёр нутагтан, үе хөлтөн сонирхогчдын группт зар тавиад  аалзныхаа хоолыг авдаг юм.

-Аалз арьсаа гуужуулахаараа  янз бүрийн зан авир гаргадаг. Өөрийнх тэжээдэг аалз ямар авир илүү гаргадаг бол?

-Хорь хоногт нэг удаа арьсаа гуужуулдаг. Арьсаа гуужуулахаараа их хөдөлгөөнтэй болчихдог.

-Хэр их арчилгаа шаарддаг вэ?

-Хөрсийг нь солиод ус өгөх, үүрийг нь сайн цэвэрлэх хэрэгтэй.  Гэхдээ хамаагүй биенд нь хүрээд байвал ааштай болно. Мөн арьсаа хурдан гуужуулна. Арчилгаанаас шалтгаалаад аалз 2-20 жил насалдаг.

-Өөрийнх нь тэжээдэг аалзны гаргадаг содон зан авир юу байдаг бол?

-Зарим танихгүй хүн дээр зүгээр очдог мөртлөө  зарим хүн дээр яагаад очдоггүй. Унтахаараа үүрнийхээ нэг буланд очоод атираад хэвтчихдэг. Бас үс нь туулайны үснээс зөөлөн. Мөн биеэн дээр нь шороо тоос болсон үед хурдан тарааж цэвэрлэдэг.

 -Ахиад нэмж аалз тэжээх үү?

-Одоо содон өнгөтэй аалз авъя гэж бодож байгаа.

-Өвөрмөц имиж,  аалз хоёр гэрэл зурагт  үнэхээр гайхалтай буужээ. Аалзтайгаа хамт зураг  авахуулах мэдрэмж ямар байсан?

-Би гэрэл зурагт их сонирхолтой. Нэг удаа аалзтайгаа хамт зургаа даруулмаар санагдсан учраас бодлоо биелүүлсэн.  Аалз тэжээх сонирхол миний ертөнцийг илүү тодотгодог. Урлаг нэг стандартад баригдмал байдаг. Тиймээс хэн ч юу ч гэсэн мөрөөдөл, бодол санаагаа чөлөөлж өөрийнхөөрөө байхыг хүсдэг.

-Урлагийн чиглэлээр сурдаг гэсэн. Тиймээс дуу хөгжим өөрийг нь  тодотгодог зүйлийн нэг болов уу?

-Дуу хөгжим тасрахгүй эгшиглэж байдаг газар сурдаг учраас  чимээгүй нам гүм орчинд очихоор эвгүй мэдрэмж төрдөг. Би гитарын аянд дуртай.

 -Өөрийнх нь байх ёстой газар,  орон зай хаана гэж боддог вэ?

-Миний байх ёстой газар бол тайз. 

-Ямар цаг үед хамгийн баярлаж бас уйтгар гунигийг мэдэрдэг  бол?

-Хэн нэгэн намайг үл тоох, хичээсэн ч гэсэн хичээгээгүйтэй адилхан үнэлэх нь таагүй мэдрэмж өгдөг. Харин аав, ээжтэйгээ хамт байх цаг хугацаа юутай ч зүйрлэшгүй хамгийн аз жаргалтай, наднин. Үүнийг хайртай хүмүүсээс хол байх  үедээ мэдэрдэг.

-Хэрхэн өөрийнхөө сэтгэлийн орон зайг эрх чөлөөтэй байлгаж чаддаг вэ?

-Миний  юу өмссөн ямар харагдаж байгаа хүмүүст таалагдах эсэх нь хамаагүй. Харин толинд хараад “Ямар гоё юм бэ” гээд өөрийнхөөрөө байх  мөч гоё. Гомдвол шууд газар суучихдаг. Гудамжинд явж байхдаа ч орилоод уйлчихаж чадна. Хэн намайг юу гэх бол гэж санаа зовдоггүй.  Сэтгэл дотор байгаа зүйлээ чөлөөлөөд ямар ч орчинд гаргаж чадах тийм эрх чөлөөт зан чанар надад байдаг. Заримдаа  худалдааны төв рүү таавчик, унтлаганыхаа хувцастайгаа хүртэл гарчихна. Хийхийг зорьсон  зүйлээ  хийхгүй бол сэтгэлээр унадаг. Харин хийж дууссаны дараа л сэтгэл ханадаг. Бас нэг зүйлдээ үнэнч байхыг хичээдэг. Хаа ч байсан  хэн ч чамайг өөрөөсөө чинь илүү ойлгохгүй.  Тиймээс бусдад заавал өөрийнхөө үзэл бодлыг ойлгуулах гээд тулгаад байх хэрэггүй. Нэгэнт хүмүүс ойлгохгүй бол  өөрөө болгочих сэтгэлийн хаттай байх нь зөв байх. Нэг хүний өмнө  өөр, нөгөө хүний өөр өөрийнхөөрөө байж чадахгүй баригдмал өөрийгөө өрөвдсөн ертөнцөд байхыг хүсдэггүй.

-Өвөрмөц стиль, имижээ хэрхэн бүрдүүлдэг вэ?

-Өөрийнхөө  хүссэн зүйлийг авна. Таалагдсан хувцсаа авч өмсөнө. Өндөр өсгийтэй гутал авах дуртай. Хэзээ ч өөрийнхөөрөө, өвөрмөц хувцаслаад явахыг хүсдэг. Үнэтэй байсан ч хамаагүй мөнгөө цуглуулж байгаа авдаг. Цалингаа аваад өөрийнхөө хэрэгтэй зүйлсийг аваад, гоё хувцаслачихсан  хүн өөдрөг ажлаа хийнэ. Мөнгөө цуглаад авсан зүйлийн  нэг бол аалз.

-Хэдэн шивээстэй вэ. Гар дээрх шивээс нь ямар утга агуулгатай бол?

-Хоёр шивээстэй. Би аливаа зүйлийн утгыг хэзээ ч боддоггүй.  Надад таалагдаж л  байвал ямар ч байсан хамаагүй. Миний ээж хэд хоногийн өмнө шивээс хийлгэхэд “сонин юм шүү” гэсэн. Тэр үед ээждээ  “Би өөрөө үзэл бодолтой хүн” гэхэд  миний сонирхлыг эсэргүүцээгүй. Эцэг эх хүүхдийнхээ үзэл бодол, сонирхлыг хүндэлдэг , ойлгодог байна гэдэг гоё. Миний аав ээж тийм л хүмүүс.