Чуулганы болон байнгын хороодын хуралдаанд гишүүд идэвхгүй оролцож, хуулийн төсөл хэлэлцэх асуудал хойшилж буй тул УИХ-ын дарга Г.Занданшатар хариуцлагатай байхыг анхааруулж үг хэлэв.
Тэрбээр “Улс орны байдал хүнд байна. Үнийн өсөлт, орлогын хомсдол засрах шинжгүй байна. Иргэдээ төлөөлж төрийн эрх барьж байгаа УИХ-ын гишүүд та биднээс олон зүйл шалтгаална. Ард иргэд нүүрсний хулгай, Хөгжлийн банкны хэргийг шалгаж тогтоохыг шаардаж байгаа. Бид маш олон хууль баталж байгаа. Гэвч баталсан хуулийн зарим зүйл заалт амьдралд нийцэхгүй байна гэсэн санал хүсэлт ирж байна.
Хуулийн төслийн чанарт анхаарах хэрэгтэй байна. Газрын тухай багц хууль дээр ч гэсэн түүхий төслөө парламентын босго давуулж шиддэгээ зогсоо. Улс орныхоо өнөөдрийг бодож, маргаашийг харж үйл ажиллагаандаа үнэлэлт, дүгнэлт хийж ажиллацгаая. Хувийн ашиг сонирхлоос ангид байж төр, ард түмнийхээ төлөө зүтгэхээ өдөр бүр ухамсарлан санаж байх хэрэгтэй.
УИХ-ын гишүүд бол бүхний дээр байдаг эрх мэдлийн бурхан тэнгэр биш. Та бүхнийг итгэж сонгосон ард түмэнд оны эцэст ажлыг тань тайлагнах болно. Чуулганы үйл ажиллагаанд идэвхтэй оролцохыг сануулж байна” гэлээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.