Авлигатай тэмцэх газраас нүүрсний гэх хэргээр доорх мэдээллийг өглөө.
Нүүрсний гэх хэргээр одоогийн байдлаар мөрдөн шалгах ажиллагааны явцад нийт 66 иргэн, албан тушаалтанд эрүүгийн хэрэг үүсгэн яллагдагчаар татсан бөгөөд 26 хүнийг шүүхийн зөвшөөрөлгүйгээр хойшлуулшгүй тохиолдлоор баривчилж, холбогдох шүүхэд танилцуулсан.
Хэргийг шалгах явцад 16 яллагдагчид таслан сэргийлэх арга хэмжээ авснаас одоогоор 7 яллагдагч хоригдож байна. Мөн хилийн хориг 19 хүнд тавьсан бол 5 хүний албан үүргийг түдгэлзүүлсэн, хувийн баталгаа авах таслан сэргийлэх арга хэмжээг 35 яллагдагчид аваад байна. Эрх бүхий албан тушаалтнууд 13 тэрбум 851 сая 252359 төгрөгийг хахууль болгож авсан байж болзошгүй тул хөрөнгийн шилжилт хөдөлгөөний хязгаарласан байна.
Одоогоор хөрөнгө битүүмжлэх ажиллагаанд 81 үл хөдлөх хөрөнгө буюу 78 орон сууц, 3 оффис байгаа бол 43 тээврийн хэрэгслийн шилжилт хөдөлгөөнийг хязгаарлажээ.
Мөрдөн шалгах ажиллагааны явцад илэрсэн 630 сая төгрөг 230 мянган ам.долларын эх үүсвэрийг шалгах ажиллагаа явагдаж байна.
Прокурорын зөвшөөрсөн хэмжээнд доорх хоёр баримтыг нийтэд ил болгож байна гэв.
Жишээ 1.
"Эрдэнэс Тавантолгой" төрийн өмчит компанийн удирдах албан тушаалтнаар ажиллаж байсан этгээд нь Тавантолгойн орд газраас хөрс хуулалт, олборлолтын чиглэлээр үйл ажиллагаа явуулж байгаа этгээдтэй гэрээ байгуулахдаа албан үүргээ гүйцэтгэсний хариуд хахууль авч, хахууль авсан мөнгөөрөө Хан-Уул дүүргийн нутаг дэвсгэрт 4.6 га талбай бүхий газарт Спорт цогцолбор, орон сууцны цогцолборын барилгын ажлыг эхлүүлж, барилгын ажилд хахуулийн мөнгөнөөс зарцуулж, гэмт хэргийн замаар олдсон мөнгө орлого гэдгийг мэдсээр байж ашигласан, түүний хууль бус эх үүсвэрийг нуун далдлах зорилгоор өөрчилсөн, албан тушаалтан хахууль авах, үндэслэлгүйгээр хөрөнгөжих, мөнгө угаах гэмт хэрэг үйлдсэн болох нь урьдчилсан байдлаар тогтоогдсон байна.
Жишээ 2.
Төрийн өмчийн аж ахуйн нэгжийн удирдах албан тушаалд ажиллаж байсан этгээд нь өөрийн найз нөхөд хамаарал бүхий этгээдийн нэр дээр Сүхбаатар дүүрггийн 1 дүгээр хорооны нутаг дэвсгэрт офиссын зориулалт бүхий талбайгаас 464.4 метр талбай бүхий офиссыг 2.5 тэрбум төгрөгөөр, мөн офисст 530.09 метр бүхий талбайтай үл хөдлөх хөрөнгийг 2.9 сая төгрөгөөр худалдаж авсан бөгөөд эх үүсвэрийг үндэслэлтэй тайлбарлаж чадаагүй. Хамаарал бүхий этгээдүүдийн нэр дээр үнэт цаас бонд авсан нь үндэслэлгүйгээр хөрөнгөжих, мөнгө угаах гэмт хэргийн шинжтэй болох нь мөрдөн шалгах ажиллагааны явцад тодорхой болж байна. Мөн тухайн офиссоо түрээслэх замаар 1 тэрбум 91 сая төгрөгний орлого олсон нь тогтоогдсон гэв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.