Украин сөнөөгч онгоц авах асуудлаар өрнөдийн орнуудтай хэлэлцээгээ түргэтгэв

Киев Америкийн F-16 нисэх онгоцонд ихээхэн найдвар тавьж байна

 Украин улс барууны түншүүдтэй нисэх онгоц, оператив-тактикийн пуужин нийлүүлэх талаар  хэлэлцээ хийж байгаа гэж Ерөнхийлөгчийн Тамгын газрын даргын зөвлөх Михайло Подоляк мэдэгдээд буй.

Түүний хэлснээр, Крым дахь ОХУ-ын цэргийн зэвсгийн агуулахуудыг устгахын тулд пуужин, түүнчлэн фронт дахь цэргүүдийг хамгаалах онгоцууд хэрэгтэй байгаа гэв.

"Дайны хүрээнд хэн нэгэн үүнийг ойлгохгүй байна гэж би бодохгүй байна. Тиймээс нэгдүгээрт, хэлэлцээр аль хэдийн хийгдэж эхлээд байна, хоёрдугаарт, хэлэлцээ хурдацтай явагдаж байна, гуравдугаарт, түншүүд бүгд үүнийг сайн ойлгож байна." гэж тэр ярилцлагадаа хэлжээ.

Үүний зэрэгцээ, Подоляк "түнш орнуудын дотоод сэтгэл зүйн байдал"-тай холбоотой нюансууд байсаар байгааг хүлээн зөвшөөрөв. Тухайлбал, Украины зарим холбоотнууд энэ дайны үед дэлхийн архитектурт өөрчлөлт гарахаас эмээж, дотоод консерватизмаасаа татгалзаж чадахгүй байна гэж тэр хэлэв. Энэ нь хэнд хаягласан юуны тухай үг болохыг тодорхой хэлсэнгүй.  Гэсэн хэдий ч нисэх онгоц, алсын тусгалын пуужингийн асуудлаарх хэлэлцээр удахгүй амжилттай болно гэдэгт итгэлтэй байгаагаа тэр илэрхийлэв.

Украины Агаарын цэргийн хүчний төлөөлөгч Юрий Игнатын мэдээлснээр Украин эхний ээлжинд 24 сөнөөгч онгоцыг хүлээн авах хүсэлтэй байна.

Үүний зэрэгцээ Киев Америкийн F-16 онгоцуудад найдаж байгаа ч Шведийн "Gripen" сөнөөгч эсвэл Францын "Rafale" онгоцны  хувилбаруудыг  бас авч үзэж байна.

Гэхдээ Украины нисэх онгоц хүлээн авах асуудал зөвхөн хэлэлцээрийн шатандаа байгаа гэж тодотгов. Одоогоор онгоцны загвар, тэдгээрийн тоог тогтоох ажил үргэлжилж байна.

"Нисгэгчид болон техникийн ажилтнуудын бэлтгэлийг харгалзан бүх зүйлийг үе шаттайгаар хийх ёстой. Тиймээс эхлээд бид хоёр эскадриль илгээх хэмжээнд ярьж болно" гэжээ. Тодотгоход, нэг эскадриль нь 12 нисэх онгоцтой байх юм. 

Эх сурвалж: ВВС