Б.Батцэцэг: Монгол Улсад аливаа улс орноос дарамт шахалт ирсэн юм байхгүй

Геополитикийн амаргүй нөхцөл байдал 2023 онд үргэлжлэх төлөвтэй байгааг олон улсын шинжээчид хэлж буй. Монгол Улсын хувьд ямар бодлого баримтлан ажиллаж байгаа талаар ГХ-ны сайд Б.Батцэцэгээс тодрууллаа.

Гадаад харилцааны сайд Б.Батцэцэг “Геополитикийн нөхцөл байдал нь дэлхийн олон оронд сорилтуудыг бий болгож байна. Хөгжиж байгаа орнуудыг аль нэг талдаа оруулах том гүрнүүдийн бодлого улам хүчтэй болж байна. Монгол Улсын хувьд далайд гарцгүй, хоёр хөрштэй улс. Бид хоёр хөрштэйгээ олон улсын харилцааны дээд түвшинд харилцдаг бөгөөд маш сайн ойлголцдог.  Тиймээс Монгол Улсад бол бодит байдал дээр дарамт шахалт ирсэн юм байхгүй. НҮБ дээр бид түдгэлзсэн саналуудыг өгөхдөө ч гуравдагч хөрш орнуудтайгаа, олон улсын байгууллагуудтай, хоёр хөрш оронтойгоо ярилцаж, зөвшилцөж аль алиндаа таалагдсан шийдвэр гаргахын төлөө ажилладаг. Хүний харилцаанд ч хэнтэй ч ярьж зөвлөлдөлгүй шийдвэр гаргахаар буруу ойлгох тал гардаг. Бидний зүгээс гуравдагч болон хоёр хөршдөө тайлбарлаж хэлэхийг чухалчилдаг. Монгол Улс бол тусгаар тогтносон орон. Өөрийнхөө аюулгүй байдлыг дипломат аргаар хэрхэн хадгалж хамгаалдаг, өөрийн ашиг сонирхолд нийцсэн бодлогоо хэрхэн хэрэгжүүлэх вэ гэдэг манай яамны үндсэн хийх ажил. Тэгэхээр бид энэ ур чадварыг эзэмшсэн байх ёстой. Монгол Улс бол бүх улс оронтой найрсаг харилцаатай. Харилцааны тэнцвэрт байдлаа хангаж чаддаг” гэлээ.