Нийслэлийн Сүхбаатар дүүрэг эмэгтэйчүүдийн баярт зориулж 900,100,000 төгрөгийн мөн ахмадуудад Цагаан сараар тараах гарын бэлгийн 1,360,400,000 төгрөгийн бэлгийн багц худалдан авах тендерийг тус тус зарласан юм.
Тодруулбал, тус дүүргийн 1-20 дугаар хорооны Цагаан сарын хүндэтгэлийн арга хэмжээ зохион байгуулахаар 1.3 тэрбум төгрөгийн төсөвтэй байхаар тендерийг хялбаршуулсан журмаар зохион байгуулж, арванхоёрдугаар сарын 22-ноос 30 хоногийн хугацаатай үнийн санал хүлээн авч, компаниудыг шалгаруулсан байна. Тендерийн нээлттэй мэдээллийн сангаас харвал, Сүхбаатар дүүргийн ЗДТГ-т ногдуулсан улсын төсвийн урсгал зардлаар гарын бэлэг авах байсан юм. Гэвч дээрх бэлгийн тендерүүд Төрийн хэмнэлтийн тухай хуулийг зөрсөн гэгдэж олны хатуу эсэргүүцэлтэй тулсан юм. Ийнхүү Сүхбаатар дүүргийн Засаг дарга Х.Болормаа тэрбумын үнэлгээтэй бэлгийн тендерээ цуцлахаар болжээ.
Энэ талаар тус дүүргийн Засаг дарга Х.Болормаа "Төсвийн тухай хэмнэлтийн хууль нь өөрөө хуульд зааснаас бусад хуульд өөрөөр заагаагүй бол гээд хуульчлаад өгсөн. Тиймээс би хууль зөрчөөгүй гэж бодож байна. Энэ бүх хууль, судалгааг харж байж, ёс заншлаа бодон тендер зарласан. Нэг хүнд ногдох мөнгөн дүн нь ойролцоогоор 80 мянган төгрөг. Энэ бол ИТХ-аараа, нийтээрээ шийдэж, тогтоол гарсны үндсэн дээр хийсэн ажил. Би тогтоолыг биелүүлж байна.
Энэ үйлдлийг би улс төрийн том зорилготой байна гэж харлаа. Яагаад гэвэл сая манай намын даргын сунгаа болсон. Тос дотроосоо өтвөл аюултай гэсэн үг бий. Би өнөөдөр 300 тэрбум төгрөгийн татвар бүрдүүлчхээд яагаад 1 тэрбум төгрөгийг нь ахмадууддаа зарцуулж болдоггүй юм. Энэ чинь хууль ёсны л ажил шүү дээ. Энэ тендерийн мэдээллийг ил болгосон хүмүүс нь манай намын нөхөд шүү" гэсэн юм.
2020 онд НИТХ-ын ээлжит сонгуульд ялалт байгуулсан Ардчилсан нам Сүхбаатар дүүргийн Засаг даргаар Х.Болормааг дахин томилсон байдаг. Тэрээр 2016 оноос тус дүүргийн Засаг даргаар ажиллан, ийнхүү дахин улиран сонгогдсон аж.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.