2020 оноос хойш виртуал хөрөнгөтэй холбоотой 468 хэрэг бүртгэгджээ

Өнөөдрийн байдлаар манай улсад 12 биржээр 37 койн арилжаалж буй аж. Харин манай улсад 2020 оноос хойш виртуал хөрөнгөтэй холбоотой 468 хэрэг бүртгэгджээ. Үүний дийлэнх нь буюу 430 нь залилах гэмт хэрэг аж. 2019 онд койноо залилуулсан гэх хэрэг бүртгэгдээгүй бол 2020 онд ес, 2021 онд 81, 2022 онд 370, 2023 он гарснаас хойш найман хэрэг бүртгэгджээ. Энэ хүрээнд цагдаагийн байгууллагаас мэдээлэл өглөө.

Эрүүгийн цагдаагийн албаны Эдийн засгийн гэмт хэрэгтэй тэмцэх Мөнгө угаах гэмт хэрэгтэй тэмцэх хэлтсийн дарга, хошууч Э.Сэргэлэнбаатар "Манай улсад 2022 оны хоёрдугаар сараас Виртуал хөрөнгийн үйлчилгээ үзүүлэгчийн тухай хууль үйлчилж эхэлсэн. Зах зээлийн зарчмаар үнэ ханшаа тогтоож явж байгаа бизнес эрхлэгчдийг шууд хянаж, шалгаж, хохироох эрх бидэнд байхгүй. Гэхдээ залилангийн шинжтэй буюу тухайн мөнгөө хувьдаа завшсан, мэдээллийг ашигласан хүмүүсийг шалгах эрх бий. Бусад төрлийн хэргийг бодоход IT, санхүүгийн мэргэжилтнүүд шаардлагатай байдаг учир бид алба хаагчдаа чадавхжуулж байна.

Виртуал хөрөнгийн үйлчилгээ үзүүлэгчийн тухай хуулиар виртуал хөрөнгийн үйлчилгээ үзүүлж байгаа иргэнийг бүртгэх, хянан шалгах ажлыг Санхүүгийн зохицуулагч хороо хариуцах юм. Үүнтэй холбогдуулан Эрүүгийн хуулийн 18.19, 18.20 дахь зүйл ангид өөрчлөлт орсон.

Салбарын үйл ажиллагаа, арилжааг урвуулан ашиглан ашиг олж байгаа этгээдүүдэд цагдаа, тагнуулын байгууллагаас мөрдөн шалгах ажиллагаа хийх хуулийн зохицуулалттай болсон гэсэн үг.

Өнгөрсөн оны зургаадугаар сараас СЗХ-ноос виртуал хөрөнгийн үйлчилгээ эрхлэгчдийг бүртгэж эхэлсэн. Бидэнд ирүүлсэн мэдээллээр одоогийн байдлаар 12 крипто бирж байна.

Цагдаагийн байгууллагаас 2020, 2021, 2022 онд крипто биржүүдийн удирдлагуудтай хэд хэдэн удаа уулзсан. Улмаар цагдаагийн байгууллагаас энэ салбарт орох гэж байгаа хүн санхүүгийн болон мөнгө угаах гэмт хэрэгт холбогдож байгаагүй, санхүүгийн чадавхтай байх, мөн биржүүд өөрсдөө хариуцлага хүлээх ёстой гэсэн шаардлага тавьдаг.

Хуулийн дагуу, зах зээлийн зарчмаараа үнэ ханшаа тогтоогоод явж байгаа бизнес эрхлэгчдийг шууд хянаж шалгадаг хууль эрх зүйн зохицуулалт байхгүй. Илт залилангийн шинжтэй, босгосон мөнгөө хувьдаа ашиглаад тээврийн хэрэгсэл, байр авсан хүмүүсийг шалгаад явна" гэв.

Сүүлийн гурван жилийн хугацаанд виртуал хөрөнгөтэй холбоотой 468 гэмт хэрэг бүртгэгджээ. Үүнээс койн, токен бусдад санал болгоод хөрөнгө босгосон этгээдүүдтэй холбоотой дөрвөн хэрэг байгаа аж. Бүртгэгдсэн нийт хэргийн дийлэнхийг буюу 430 нь залилах гэмт хэрэг эзэлж байна. Жишээлбэл, Хан-Уул дүүргийн шүүх дээр иргэн "Б" нь Монгол Улсын 25 иргэнийг залилан 300 гаруй сая төгрөгийн хохирол учруулсан хэргээр өнөөдөр долоон жилийн хорих ял авсан аж.