"IHC” койн худалдан авч хохирсон гэх иргэн их хэмжээний мөнгөө залилуулж, өөрсдийн автомашин, орон байраа алдсан гэх хохирогчдын төлөөлөл өнөөдөр мэдээлэл хийсэн. Энэ үеэр хохирогчид өөрийн хаягаа хакердуулсан, цахим залиланд өртсөн, койноо алдсан гэх гэх нийтлэг мэдээллийг өгсөн. Тэгвэл Цагдаагийн ерөнхий газарт сүүлийн долоо хоногт крипто валютын цахим хэтэвчнээсээ мөнгө алдсан гэх шалтгаантай 12 дуудлага ирсэн аж.
Тодруулбал, ЦЕГ-ын Кибер гэмт хэрэгтэй тэмцэх хэлтсийн дарга, дэд хурандаа С.Тайван "Сүүлийн долоо хоногийн хугацаанд манай тасагт крипто валютын цахим хэтэвчнээсээ мөнгө алдсан гэх шалтгаантай 12 дуудлага ирсэн. Хохирлын хэмжээ нь 300 гаруй сая төгрөг байсан.
Энэ нь ямар нэг байдлаар нууц үгээ алдах, улмаар цахим хэтэвчнээсээ мөнгө алдах хэрэг ихсэж буйг харуулж байна. Гэмт хэрэг үйлдэхдээ "Фишинг" хортой холбоос буюу тухайн хэрэглэгчийн бүлэг дээр койны нэрийг нь бичээд "урамшуулал зарлалаа, та мэдээллээ оруулж шагналаа баталгаажуулна уу" гэх хэлбэрээр мэдээлэл, нууц үгийг нь авч койныг нь хулгайлж авдаг.
Мөн иргэд бие биедээ итгэн бараа бүтээгдэхүүн худалдаж авах зорилгоор койноо шилжүүлж, алдах тохиолдол ч гардаг. Түүнчлэн крипто валютын бирж, тэдний үйл ажиллагаа, систем, программ хангамжийн аюулгүй байдлын асуудал яригдана. Зөвхөн биржийн админ нэвтрэх эрхтэй мэдээлэл рүү халдан валют эзэмшигчийн утасны дугаар, и-мэйл хаяг зэрэг хувийн мэдээллийг өөрчлөн цахим хэтэвчийг сэргээж аваад, койн хэлбэрээр гадагш гаргах гэмт хэрэг мөн илэрч буй. Иймд иргэд хортой холбоос руу хандан хувийн мэдээллээ алдахгүй байхад анхаарч таслан зогсоох шаардлагатай байна" гэлээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.