Ерөнхийлөгч У.Хүрэлсүх Ерөнхий сайдаар ажиллаж байхдаа буюу 2017 оны 11 дүгээр сард УИХ-ын чуулганы танхимд гишүүн Ж.Мөнхбатад хандан “ Хулгайч бацаан минь дуугай байгаарай. Хамаг юмыг чинь дэлгэнэ шүү. Нүүрсний хулгайч чинь” хэмээн хэлсэн удаатай. Гэвч өнгөрсөн оны сүүлээр АТГ-аас нүүрсний хэрэгт холбогдсон хэмээн 17 хүний нэрийг зарлахад ямар ч байсан Ж.Мөнхбатын нэр байгаагүй. Тэгвэл АТГ болон Прокурор, Цагдаагийн байгууллагын хамтарсан ажлын хэсгээс нүүрсний гэх хэргийг өнгөрсөн хугацаанд шалгах явцдаа УИХ-ын гишүүн Ж.Мөнхбатын хэргийг сөхөн шалгаад яллагдагчаар татах тогтоол баталсан тухай өчигдрөөс эхлэн хэвлэлүүд бичиж байна.
Тодруулбал, УИХ-ын гишүүн Ж.Мөнхбатыг ЗГХЭГ-ын даргаар ажиллаж байхдаа Хятадын компанид нүүрс худалдахаар тохиролцсон гэх хэргийг сөхөн шалгаад яллагдагчаар татахаар болсон аж.
Энэхүү мэдээлэлтэй зэрэгцэн УИХ-ын гишүүн Ж.Мөнхбат УИХ-ын дарга Г.Занданшатарт “ УИХ-ын гишүүний бүрэн эрхээсээ хүндэтгэн үзэх шалтгааны улмаас татгалзаж, бүрмөсөн чөлөөлөгдөх хүсэлт гардуулав”. Тэрбээр үүнийгээ нэгт, ээжийн бие муудсан, гадаадад авч явж эмчлүүлэх шаардлагатай. Хоёрт, зохион байгуулалттайгаар хэрэгт холбогдуулж гүтгэж байгаа учраас энгийн иргэн болоод шалгуулахад бэлэн гэж тайлбарлаж байгаа юм.
Тэгвэл, түүний хувьд УИХ-ын гишүүнээс бүрмөсөн чөлөөлөгдөнө хэмээн зүтгэх шалтгаан нь зөвхөн үүгээр хязгаарлагдахгүй бололтой. Тэрээр Үндсэн хуулийн нэмэлт өөрчлөлтийг сонгуулиас өмнө амжиж хийхээр зүтгэж буй МАН-ын дарга Л.Оюун-Эрдэнэ болон түүний багийнханд шахалт үзүүлж байгаа аж.
Учир нь, Үндсэн хуульд нэмэлт өөрчлөлт оруулахад заавал 76 гишүүн байх шаардлагатай. Монгол Улсын Үндсэн хуульд нэмэлт, өөрчлөлт оруулах журмын тухай хуулийн 11 дүгээр зүйлийн 3.1-т зааснаар “Үндсэн хуулийн Жаран есдүгээр зүйлийн 1 дэх хэсэгт зааснаар Улсын Их Хурлын нийт /76/ гишүүний дөрөвний гурав /57/ -аас доошгүйн ирцтэй бол түүнийг Үндсэн хуулийн нэмэлт, өөрчлөлтийг авч хэлэлцэхэд хүчин төгөлдөр гэж үзнэ” гэж заасан бөгөөд 15.8-д Улсын Их Хурлын нийт гишүүний дөрөвний гурав, түүнээс дээш хувь нь "батлах" санал өгсөн бол Үндсэн хуульд оруулах нэмэлт, өөрчлөлт батлагдсанд тооцож, нийтэд зарлан мэдээлнэ гэж бий.
Тэгэхээр Үндсэн хуульд нийт гишүүний гэж тодорхой заасан бөгөөд нийт гишүүн гэдэгт 76-г бүхэлд нь хамруулж үзэж буй юм.
УИХ-ын гишүүн Ж.Мөнхбатын гаргасан хүсэлтийг УИХ-аар хэлэлцэж шийдвэрлэнэ. Үүнээс өмнө УИХ дахь МАН-ын бүлгийн хурлаар хэлэлцэнэ. Тэгэхээр Үндсэн хуульд нэмэлт өөрчлөлт оруулах хүслээ Ерөнхий сайд Л.Оюун-Эрдэнэ гүйцэлдүүлье гэвэл Ж.Мөнхбаттай тохиролцохоос өөр аргагүй болж байгаа аж.
Харин нөхөн сонгууль явуулах асуудал яригдвал Үндсэн хуульд нэмэлт өөрчлөлт оруулах хугацаа үлдэхгүй ч байж мэднэ. Өөрөөр хэлбэл, Үндсэн хуульд “ Улсын Их Хурал ээлжит сонгууль явуулахын өмнөх зургаан сарын дотор Үндсэн хуульд нэмэлт, өөрчлөлт оруулж үл болно” гэж бий. Мөн УИХ-ын сонгуулийн тухай хуульд “Орон гарсан Улсын Их Хурлын гишүүний бүрэн эрхийн хугацаа дуусахад зургаан сар хүрэхгүй хугацаа үлдсэн бол орон гарсан суудлыг нөхөхгүй” гэсэн заалт бий.
Үүнээс харвал Ерөнхий сайд, МАН-ын дарга Л.Оюун-Эрдэнэ үнэхээр Үндсэн хуульд нэмэлт өөрчлөлт оруулья гэвэл Ж.Мөнхбатыг өрөөндөө дуудаж уулзахаас өөр гарцгүй болох нь. Харин Ж.Мөнхбат түүнээс юу хүсэх нь тодорхой.
Сэтгэгдэл (4)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
57 гишүүн Үндсэн хуулийг шийднэ. Тэгэхээр МАН-ын 62 гишүүнээс 5 гишүүнийг зайлуулахад тоо нь хангалттай л хүрч байна ш дээ. Мөнхбат байхгүй бол болохгүй гэж юу яриад байгаа юм. Дахинд 4 хүнийг зайлуулсан ч болно. Авилгачдыг элдэв шалтгаанаар өмөөрөхөө болих хэрэгтэй. Мөнхбатгүй бол Үндсэн хуулийн өөрчлөлт бүтэхгүй гэж битгий тархи угаа.
Намуудын санхүүжилтийг төрөөс шийддэг механизмруу орохгүй бол иймэрхүү асуудал зогсохгүйэ
Мэдлэг боловсролгүй энэ тэнэг амьтнаар ерөнхий сайд хийлгэж одоо бүүр эцэг хуулиндаа гар дүрүүлэх нь
нүүрсний хулгайч засгаа шантаажилж байгаа хэрэг үү