Хөгжлийн банкнаас санхүүжүүлсэн төсөл, хөтөлбөрийн хэрэгжилт, зээл олголт, эргэн төлөлтийн явцыг хянан шалгах УИХ-ын түр хорооноос Нотлох баримтыг шинжлэн судлах хоёр дахь шатны сонсголыг 2023 оны хоёрдугаар сарын 06-08-ны өдрүүдэд зохион байгуулахаар болсон.
Энэ удаагийн сонсголоор Хөгжлийн банк болон тус банкны охин компани болох “Ди Би Эм лизинг” ХХК-иас олгосон зээлүүдийн асуудлыг хэлэлцэхээр төлөвлөсөн бөгөөд үүнтэй холбогдуулан 59 гэрчийг сонсголд дууджээ. Түүнчлэн Хөгжлийн банкны үйл ажиллагаанд хийсэн олон улсын аудитын компаниудын дүгнэлттэй танилцаж холбогдох гэрчүүдээс мэдүүлэг авах юм.
Хянан шалгах түр хорооны дарга Б.Энхбаяр хоёр дахь удаагийн сонсголд Шадар сайд бөгөөд Эдийн засаг хөгжлийн сайд Ч.Хүрэлбаатар, Хөгжлийн банкны тухайн үеийн удирдлагуудын нэг бол Г.Амартүвшин, Монголбанкны ерөнхийлөгчөөр ажиллаж байсан нэр бүхий албан тушаалтан гэрчээр асуугдана гэдгийг мэдэгдээд буй. Мөн Эдийн засаг хөгжлийн сайд асан Н.Батбаяр, Барилга, хот байгуулалтын яамны Төрийн нарийн бичгийн дарга асан н.Эрдэнэбүрэн, Молор констракшн ХХК-ийн хувьцаа эзэмшигч н.Эрдэнэ, Ерөнхийлөгч асан Х.Баттулга, Ерөнхий сайд асан Н.Алтанхуяг, Зам тээврийн яамны Төрийн нарийн бичгийн дарга асан н.Батзаяа, Зам тээврийн сайд асан А.Гансүх, "Түмэн хишигтэн" ХХК-ийн хувьцаа эзэмшигч экс ерөнхийлөгч Х.Баттулгын хүүхдүүд болох Б. Хүлэгт, Б.Намуун, Б.Номин нарыг гэрчээр дуудаад байгаа юм.
Ирэх даваа гарагт эхлэх сонсголын үеэр 2012-2016 оны хооронд Хөгжлийн банкнаас Улсын төсөвт суулгаж, эргэн төлөгдөх нөхцөлтэйгөөр санхүүжүүлсэн 350 орчим төсөл арга хэмжээний үр дүнтэй мөн танилцах юм.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.