ОСКАР 2023: Оскарын наадмын гол дүрийн жүжигчин шагнал авсан анхны ази эмэгтэй Мишель Иео

Америкийн кино академийн 95 дахь удаагийн шагнал гардуулах ёслолын ажиллагаа Лос-Анжелес хотноо эхэлж, шилдгүүдээ тодрууллаа.

Кино сонирхогч, шүүмжлэгчид төдийгүй үзэгчдээс өндөр үнэлгээ аваад буй “Everything Everywhere All at Once” кино 95 дахь удаагийн "Academy Awards" наадмын 11 төрөлд нэр дэвшсэнээр бусдыгаа хошуучилж долоон төрөлд ялалт байгуулав.

“Dolby” театрт болсон шагнал гардуулах ёслолыг хөтлөн явуулж буй Ж.Киммелийн хувьд энэхүү наадмыг гурав дахь удаагаа хөтөлж байгаа юм. Сонирхолтой нь Оскарын наадмын улаан хивсний өнгийг 1961 оноос хойш анх удаагаа өөрчилсөн нь энэ удаа билээ.

2022 оны шилдгийн шилдэг кино "Everything Everywhere All at Once"

Энэхүү бүтээл Оскарын наадмын "Шилдэг кино" төрөлд ялагч болж, нийт долоон номинацийн эзэн боллоо. Тодруулбал, "Шилдэг найруулагч"-аар тус киног бүтээсэн Даниел Кван, Даниел Шейнерт нар шалгарсан бол гол дүрийн жүжигчин Мишель Иео “Шилдэг эмэгтэй жүжигчин”-ээр тодров. Малайз-Хятад гаралтай жүжигчин Мишель Иео гол дүрийн шилдэг эмэгтэй жүжигчин болсноор Ази гаралтай анхны уран бүтээлч болж, түүхэнд бичигдэж байгаа юм.

Түүнчлэн туслах дүрийг бүтээсэн Ке Хуй Куан, Жэйми Ли Көртис нар “Шилдэг туслах дүр”-ийн номинацид ялалт байгуулав. Дээрээс нь "Шилдэг эх зохиол"-оор тодорч, "Шилдэг эвлүүлэг" төрлийн ялагчаар тус киноны эвлүүлгийн багийнхан шалгарсан юм6

“Шилдэг эрэгтэй жүжигчин” Брэндан Фрэйзер

Шилдэг эрэгтэй гол дүрийн шагналыг "The Whale" киногоор Брэндан Фрэйзер хүртлээ. Энэ нь олон жилийн хөдөлмөр, карьерын уналттай үед түүнд дахин сэргэх урмыг өгсөн гайхалтай шагнал байлаа. Гэнэт л ямар ч эрэлтгүй болж, жүжигчний нэр хүнд нь уналтад орсноор тав орчим жил киноноос завсардсан тэрээр “Шагнал авсандаа маш их талархаж байна. Би энэ салбарт анх 30 жилийн өмнө хөл тавьсан. Завсарлаад багагүй удсан учир чадах болов уу гэж өөрөөсөө их асуусан. Гэвч найруулагч Даррен Аронофски надад "Чи энэ дүрд төгс тохирно" гэж хэлэхэд би зориг орсон" гэжээ.

Мөн “Шилдэг нүүр хувиргалт” шагналыг тус киногоор Адриен Морот, Жуди Чин, Аннемари Брэдли нар хүртсэн юм.

Оскарын наадмын "Киноны шилдэг дуу" төрлийн ялагчаар "RRR" киноны “Naatu Naatu” дуу шалгарлаа.

“Top Gun Maverick” кино "Шилдэг дууны найруулга" төрөлд шилдгээр тодров.

Эмэгтэйчүүдийн эрх, тэдний дуу хоолойг үзэгчдэд мэдрүүлж чадсан "Woman talking" кино 95 дахь удаагийн Оскарын кино наадмаас “Шилдэг сэдэвчилсэн зохиол” анхны шагнал хүртлээ.

Маргах юмгүй "Шилдэг визуал эффект" төрлийн ялагчаар "Avatar: Way of Water" кино тодров.

"All quiet on the western front" кино 95 дахь удаагийн Оскарын наадмаас дөрвөн баримал атгав

• "Шилдэг зураач"
• “Шилдэг гадаад хэл дээрх кино"
• "Шилдэг хөгжмийн зохиол"
• "Шилдэг зураг авалт" төрлийн ялагчаар "All Quiet on the Western Front" кино шалгарлаа.

Оскарын наадмын "Шилдэг хувцасны загвар" төрлийн ялагч "Black Panther: Wakanda Forever" тодорсон юм.

“Шилдэг богино хэмжээний анимейшн” шагналыг "The Boy The Mole The Fox and The Horse" кино хүртэж,

"Guillermo del Toro's Pinocchio" бүтээл “Шилдэг анимейшн” төрөлд шалгарлаа.

“Шилдэг богино хэмжээний кино”-“An Irish Goodbye”

“Шилдэг богино хэмжээний баримтат кино”-"The Elephant Whisperer"

“Шилдэг баримтат кино”- “Navalny”

 Ташрамд дурдахад дуучин Лэйди Гага "Joker: Folie à Deux" киноны зураг авалттай давхацсан гэх шалтгааны улмаас Оскарын наадамд ая дуугаа өргөж чадахгүй гэж байсан ч бодлоо өөрчилж, "Top Gun: Maverick" киноны дуу болох "Hold My Hand" бүтээлээ Академийн шагнал гардуулах ёслолын тайзнаа дуулав. Тэрээр үзүүлбэрийн үеэр улаан хивсний ёслолд оролцсоноосоо илүү даруу хувцаслаж, футболк, шорт өмссөн байв.

Лейди Гага 2016 онд "The Hunting Ground" киноны "Til It Happens to You" болон "Shallow" дууны дараагаар "Top Gun: Maverick" киноны "Holy My Hand" дуугаараа шилдэг дууны төрөлд гурван номинацид нэр дэвшсэн анхны уран бүтээлч юм.