Монгол бөхийн өргөөнд сүүлийн үед өнгөтэй сайхан барилдаж үнэнхүү хүчээ харуулж байгаа хүчтэн бол яах аргагүй Ховд аймгийн Зэрэг сумын харьяат Улсын заан Баярхүүгийн Бат-Өлзий юм. Тэрбээр сүүлийн хэдэн өдөр дараалж заал танхимын барилдаан үзүүрлэж түрүүллээ. Тодруулбал, Үзэсгэлэн болгогч хэмээн усан туулай жилийн сар шинийн баярт зориулсан улс аймгийн алдар цолтой хүчит бөхийн баридаалд түрүүлсэн. Түүний хувьд цагаан сарын баярт зориулсан барилдаанд ийнхүү хоёр дахь удаагийнхаа түрүүг хүртсэн удаатай.
Өнгөрсөн амралтын өдрүүдэд Бөхийн өргөөнд хоёр ч барилдаан болоход Б.Бат-Өлзий үзүүрлэж, түрүүллээ. Тухайлбал, Өмнөговь аймгийн Манлай сумын харьяат, Улсын арслан Гомбо-Аюушийн Дэмүүлийн нэрэмжит улс аймгийн алдар цолтой хүчит бөхийн барилдаанд тэрбээр найм даван түрүүлэв. Мөн Завхан аймгийн Тосонцэнгэл сумын 100 жилийн ойд зориулсан, Санжмятавын Шагж аваргын нэрэмжит улс аймгийн алдар цолтой хүчит 256 бөхийн барилдаанд долоо даван үзүүрлэв. Түүнийг бөх сонирхогчид болон бөхийн хорхойтнууд заан цолондоо ханасан, цол нь багадсан, Улсын арслан, аваргаар тогтохгүй хүчтэн гэж хардаг. Ховдын баавгай хочит бор зааныг цаашид барах арслан, гарьд, аваргууд ч байхгүй дээ гэж ярьдаг. Энэ нь бараг маргахгүй үнэн. Б.Бат-Өлзий зааны Бөхийн өргөөний түрүү гэхэд өнөөдрийн байдлаар 22, үзүүр нь 12, их шөвөгт 23 удаа үлдэж байсан түүхтэй аж.
Мөн тэрбээр өнгөрсөн 2021 онд Ерөнхийлөгчийн цомын нэрэмжит барилдаанд хүч бяраа гайхуулан барилдаж цомыг нь авсан ч Ерөнхийлөгчийн Тамгын газраас худлаа шалтаг хэлээд хураагаад авчихсан. Түүнчлэн тухайн жилийн зун цар тахалтай жил болох 2021 онд Улсын наадам төв цэнгэлдэхэд болоогүй ч Хүй долоод болсон Үндэсний бөх үнэт өв чансаа өндөр хүчит 512 бөхийн барилдаанд тэрбээр босоо үлдэж түрүүлсэн амжилтыг нь үндэслэн Улсын арслан цол олгох ёстой гэж олон нийт хүссэн. Одоо ч Монгол даяар Улсын арслан цолыг нь олгохыг хүсэж шахаж шаардсаар байна. Ерөнхийлөгч У.Хүрэлсүх арслан цолыг нь хав дарчихаад байна гэж хардаж буй. Тухайн үед МҮБХ нь цол олгуулах албан хүсэлт нэрсээ Ерөнхийлөгч болон холбогдох эрх бүхий байгууллагуудад хүргүүлсэн. Хэдий 2021 онд төрийн их баяр наадам хийгээгүй ч Үндэсний бөхийнхөө улсын цолыг таслахгүй гэж МҮБХ Хүй долоон худагт улсын цол олгох 512 бөхийн барилдааныг зохиосон гэдгийг бүгд мэднэ.
Ид сайн барилдаж ир бяртай байгаа дээр нь хүрсэн цол, амжилтыг нь олгочихвол Монголын ард түмэн баярлаж талархах байх. Зүгээр ч нэг чансаа өндөр тэр цол олгох барилдаанд түрүүлээгүй юм гэдгээ хэд хэдэн удаа батлаад байна. Өгөх ёстой цолыг нь өгчихөөсөй. Гэхдээ бөхчүүдийн дунд хийсэн судалгаагаар Цагаан сарын барилдаанд түрүүлсэн бөх улсын баяр наадмаар цол ахидаг нэмдэг гэсэн судалгаа байдаг ажээ. Тиймээс үнэнхүү хүчит бор заан Б.Бат-Өлзий өнөө жилийн баяр наадмаар арслан цолыг гуйж биш гуядаж авах цаг ирэх бизээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.