“Ханбогд кашмер”-ийн эзэн Ч.Ганцэцэг дүүгээ золиосолж, нөхрөө улстөрд сойж байна уу

Хөгжлийн банкны санхүүжилттэй төсөл хөтөлбөрийн нотлох баримтыг шинжлэн судлах УИХ-ын сонсголоор хүрээнд манай томоохон компаниудын санхүүжилтийн схэм бүрэн утгаараа ил болж байна.

Жишээ нь, “Ноолуур хөтөлбөр”-ийн хүрээнд “Ханбогд кашмер” ХХК нь өөрийн хамаарал бүхий компаниар нийт 80 гаруй тэрбум төгрөгийн санхүүжилт авч, зээлийн зарим хэсгийг зориулалтын бусаар ашигласан тухай УИХ-ын гишүүн Б.Энхбаяр шинжээчийн дүгнэлтэд үндэслэн өчигдөр мэдээлсэн юм.

“Ханбогд кашмер” ХХК нь 100 хувь Чойндонгийн Ганцэцэг гэх хүний эзэмшлийнх. Аж үйлдвэрийн гавьяат Ч.Ганцэцэг нь “Ханбогд” ББСБ-ыг 100 хувь, “Ханбогд кашмер” ХХК-ийг 100 хувь, “Ханбогд” корпорацийг 100 хувь, “Дархан Алтантуул” ХХК-ийн 70 хувь, “Фэрст класс трейд” ХХК-ийн 40 хувийг эзэмшдэг.

Мөн Хөгжлийн банкны чанаргүй зээлдэгчийн ангилал багтаж, шүүхийн шатанд яваа “Монгол микрон кашмер” ХХК-ийг эзэмшиж байсан нь бүртгэлийн лавлагаагаар тодорхой болжээ. Харин Ч.Ганцэцэгийн хувьд тус компанийг өөрийн төрсөн дүү Ч.Баттогоотой 2005 онд үүсгэн байгуулсан бөгөөд өнөөдөр ямар ч хамааралгүй гэж байв. Өөрөөр хэлбэл, Чанаргүй зээлийг өөрийн хамаарал бүхий нэг компанийн нуруун дээр наачихаад “ Надад ямар ч хамааралгүй. Дүүгийнхээ эхнэрийг ямар ажил хийдгийг мэдэхгүй” хэмээн хээв нэг хариулж суугаа юм.

Тэгвэл Ч.Ганцэцэг нь улс төрд огт хамааралгүй нэгэн үү гэвэл ёстой үгүй. Түүний нөхөр П.Анхжаргал нь УИХ-ын гишүүн, ХЗДХ-ийн сайд Х.Нямбаатарын ажлын албаны даргаар ажиллаж, Сонгинохайрхан дүүрэг дэх ажлыг нь амжуулдаг байсан нэгэн.  Монголын залуучуудын холбооны нарийн бичгийн даргаас улс төр нийгмийн ажлаа эхлүүлсэн МАН-д үнэнч залуусын нэг. “Эрдэнэс Тавантолгой” ХК-ийн гүйцэтгэх захирал асан Б.Ганхуяг, БОАЖ-ын сайд Б.Бат-Эрдэнэ нарын хамт Эрдэнэт хотын нутгийн зөвлөлд тэргүүлэх үүрэгтэй ажилладаг.

“Даншиг” группийн Ерөнхийлөгч хэмээн өөрийгөө танилцуулдаг бөгөөд МАН-ын УИХ-д сойж буй мөнгөтэй залуусын төлөөлөл гэгддэг.

Тус групп нь ноолуур, уул уурхайн тоног төхөөрөмж нийлүүлдэг бөгөөд интертайнмент салбарт үйл ажиллагаа явуулдаг охин компанитай. Хэд хэдэн кино хийсэн байдаг. Гэсэн ч нийт хөрөнгө нь “Ханбогд кашмер”-т төвлөрдөг аж.

 Эндээс, Засгийн газар, энгийн иргэдийн зүгээс Үндэсний үйлдвэрлэлээ дэмжихийг хичээд татварын төлөгчдийн мөнгөнөөс хөнгөлөлттэй зээлд хамруулж, татварын хөнгөлөлт эдлүүлдэг ч яг үнэндээ төрийн мөнгийг эргэлдүүлж, улс төрд орох бэлтгэлээ хангадаг улстөр дагасан залуусын халаас руу цутгадаг болох нь тодорхой харагдаж байгаа юм.