БНХАУ-ын дарга Ши Жиньпин Украины дайн эхэлснээс хойш анх удаагаа Москвад айлчилна

БНХАУ-ын дарга Ши Жиньпин гуравдугаар сарын 20-нд ОХУ-д гурван өдрийн айлчлал хийнэ. Энэ нь Украины дайн эхэлснээс хойш Москвад хийх анхны айлчлал болох юм.

БНХАУ-ын тэргүүн ирэх долоо хоногт Москвад ирнэ гэсэн Кремлийн мэдээллийг Хятадын ГХЯ-наас батлав. Хэлэлцээний үеэр талууд "иж бүрэн түншлэл, стратегийн харилцан үйлчлэл"-ийн асуудлыг хэлэлцэнэ гэж Оросын мэдэгдэлд дурджээ.

БНХАУ-ын ГХЯ-ны төлөөлөгч Ван "Ши Жиньпин Ерөнхийлөгч Путинтэй хоёр талын харилцаа, түүнчлэн олон улсын болон бүс нутгийн томоохон асуудлаар өргөн хүрээтэй санал солилцож, хоёр орны харилцаанд шинэ түлхэц өгнө" гэж хэлсэн байна.

Путин өнгөрсөн оны үеэр онлайн яриа хэлэлцээний үеэр Ши Жиньпинийг Москвад урьсан юм. Гэсэн хэдий ч  Хятадын удирдагч энэ урилгад тухайн үед хариу өгөөгүй юм.

Хятадын ГХЯ өмнө нь "Бээжин Украины дайнд "объектив, шударга" байр суурьтай байхыг эрмэлзэж байгаа бөгөөд Киев, Москвагийн хооронд энхийн хэлэлцээр байгуулахад бүтээлч үүрэг гүйцэтгэхэд бэлэн байна" гэж онцолж байв.

Барууныхан Хятадын "энх тайвны төлөвлөгөөнд" эргэлзэж байна

Орос Украинд түрэмгийлсний ойн өдрөөр Хятад улс Орос, Украины мөргөлдөөнийг энхийн замаар зохицуулах төлөвлөгөөг танилцуулсан. Төлөвлөгөө нь "байлдааны ажиллагааг зогсоох", "шууд яриа хэлэлцээг сэргээх", "бүх орны бүрэн эрхт байдлыг хүндэтгэх", "нэг талын хориг арга хэмжээг зогсоох" зэрэг 12 зүйлээс бүрдсэн.

Барууны орнууд уг төлөвлөгөөнд эргэлзэж Бээжин ихэвчлэн Кремлийн байр суурийг дэмжих хандлагатай байгааг тэмдэглэсэн.

Ши Жиньпин, Зеленский нар хэлэлцээ хийх үү

Америкийн "The Wall Street Journal" сэтгүүл Ши Жиньпин Украины Ерөнхийлөгч Зеленскийтэй дайн эхэлснээс хойш анх удаагаа ярилцахаар төлөвлөж байна гэж мэдээлж байсан. Энэ нь түүнийг  Москвад очсоны дараа видео хэлбэрээр болж магадгүй юм гэжээ.

Гэвч Бээжин Ши Жиньпин, Зеленский нарын уулзалтыг зохион байгуулах гэсэн Киевийн оролдлогод одоогоор нааштай хариу өгөөгүй байна. Украины Гадаад хэргийн сайд Дмитрий Кулеба Зеленский БНХАУ-ын Ерөнхийлөгчтэй утсаар ярихад бэлэн гэж мэдэгдэж байв.

Украин, Хятадын хооронд 2011 оноос хойш тунхагласан “стратегийн түншлэл”-ийг үл харгалзан дайны бүх хугацаанд Ши Жиньпин, Владимир Зеленский нар шууд харилцаа холбоогүй байна.

Москва, Бээжингийн "хязгааргүй" түншлэл

Гуравдугаар сарын 16-ны пүрэв гарагт Украин, БНХАУ-ын Гадаад хэргийн сайд нар утсаар ярьжээ. Украины дайн хурцдаж байгаад Бээжин санаа зовж, Москва, Киев хоёрыг энхийн хэлэлцээрт эргэн орохыг хүсэж байна гэж мэдэгдэв. Хятадын ГХЯ-ны тэргүүн мөн сөргөлдөөнийг улс төрийн аргаар шийдвэрлэх санаачлага даруй эргэж ирнэ гэж найдаж байна гэжээ.

ОХУ-ын удирдагч Путин Олимпийн наадамд оролцохоор Хятадад айлчлах үеэрээ 2022 оны 2-р сард буюу дайн эхлэхийн өмнөхөн Хятад, Орос хоёр "хил хязгааргүй" түншлэлийн харилцаагаа зарласан. 

Түүнээс хойш хоёр орны харилцаа улам бэхжсэн бололтой. Дайн эхэлснээс хойш Хятад, Оросын худалдаа ихээхэн нэмэгдэж, Оросын нефтийн хамгийн том худалдан авагч болжээ.

Эх сурвалж:ВВС