“Wow Balloon” студийг үүсгэн байгуулагч Баатарын Оюунгэрэлтэй ярилцлаа. Тэрээр хэдхэн хоногийн өмнө Сингапур улсад мэргэжлийн “шаар” урлаач Лили Тан хэмээх уран бүтээлчийн багт ажиллаад ирсэн билээ. “World Records Team” баг нь Сингапур, Хятад, Малайз, Индонез, Испани зэрэг долоон орны уран бүтээлчдээс бүрдсэн бөгөөд Монгол Улсаас Б.Оюунгэрэл очиж ажиллажээ. Тус баг энэ удаа “Singapore's Book of Record”-ыг шинэчлэн тогтоосон байна. Тэд 230,000 ширхэг бөмбөлгөөр “Aloha Hawaii” хэмээх сэдэвтэй нүсэр хэмжээний бүтээлийг урлан амжилтаа ахиулж чаджээ.
Эргэн сануулахад, 2012 онд уран бүтээлч Лили Тан болон түүний баг 79,854 хийн бөмбөлөг ашиглаж, роботын хэлбэртэй баримал бүтээхэд 42 цаг зарцуулж байв. Тэд тухайн оныхоо гуравдугаар сарын 16-18-ны хооронд уг роботыг “Марина Скуэр” худалдааны төвд үзүүлсэн юм. Энэ бүтээлийн урт 23.3 метр, өргөн нь 19 метр бол 11.5 метр өндөртэй. Гиннесийн дээд амжилтад бүртгэгдсэн билээ.
-Та саяхан Сингапур улсад “Singapore's Book of Record”-ыг шинэчлэхэд гар бие оролцоод ирсэн. Явсан газрын сонин сайхнаас яриагаа эхлэх үү?
-Би энэ салбарт ажиллаад 13-14 жил болж байна. Энэ хугацаанд дэлхийд алдартай Лили Тантай хамтарч, багт нь орж ажиллахыг хүссэн. Тэрээр хийн бөмбөлгөөр бүтээл урладаг артистууд дундаа алдартай, 2012 онд Гиннесийн амжилт тогтоосон. Харин долоон жилийн өмнө түүнтэй танилцаж, сая л багт нь орж ажиллах боломж тохиолоо.
Миний хамтарч ажилласан “World Records Team” багт долоон орны мэргэжлийн “Balloon” уран бүтээлчид бий. Тиймээс тус бхамт олонд нэгдэж, энэ гайхалтай түүхийг бүтээлцсэндээ маш их баяртай байгаа.
-Тухайн багт нийт хэчнээн хүн ажилласан бэ?
-“World Records Team” багт Сингапур, Хятад, Малайз, Индонез, Испани улсын мэргэжлийн артистууд болон Лили Таны багийн 20 орчим гишүүн нэмэгдэж, нийт 34 хүнтэй ажилласан. Бид дөрвөн өдрийн турш 230,000 ширхэг бөмбөлгөөр “Marina Square” гэх гайхалтай бүтээлийг урласан. Урт нь 35 метр, өндөр нь 17 метрийн хэмжээтэй шааран байгууламжийг байгуулж, Сингапур улсын “Singapore's Book of Record”-ыг шинэчлэн тогтоолоо. Сэдэв нь Хавай арал, далайн эргийн сайхан мэдрэмжийг төрүүлэх. Энэ баг маань жил бүр Сингапур улсынхаа рекордыг эзэмшиж, шинэчилж явдаг онцлогтой.
-Монголд энэ төрлийн урлаг хэр хөгжиж байгаа вэ?
-Би “World Records Team” багт орж ажилласнаараа цаашид Монголдоо шааран чимэглэлийг урлаг болгон хөгжүүлэх алхамд ойртсон. Дэлхий дахинд энэ нь урлаг болтлоо хөгжсөн. Манай “Wow Balloon” студи чимэглэлээрээ дагнасан анхдагч нь. Харин сүүлийн жилүүдэд шаараар чимэглэл урладаг байгууллагууд нэмэгдэж байна. Харин мэргэжлийн үнэмлэхээ аваад, нарийн ажиллаж байгаа нь ховор болов уу.
Үүнийг урлаг талаас нь хөгжүүлнэ гэдэг нь чимэглэлээ хийхдээ, ямар нэг хүүхэлдэй бүтээхдээ илүү загварыг нь сайжруулж, илүү чамин болгох юм. Бөмбөлгийг үлээхээс эхлээд чимэглэлээ урлах хүртэл нарийн техниктэй.
-Та анх хийн бөмбөлөг урлалыг юуны учир сонирхох болов?
-Хүн бүр, хүүхэд бүр бөмбөлөг хараад баярладаг. Шааран урлалыг харсан нэгэн инээмсэглэдэг. Мөн баяр ёслол, аливаа зүйлийн нээлт, шинэлэг байдлын анхдагч нь. Дандаа гэгээлэг зүйлийг илэрхийлдэг. Анх 2009 оноос сонирхож шааран чимэглэл хийж эхэлсэн. 2011 онд компаниа байгуулж, дараа жил нь Солонгос улсад “WPB Academy”-д мэргэжлийн I, II зэргийн артистаар суралцсан. Түүнээс хойш мэргэжлээрээ ажиллаж байна.
-“Wow Balloon” студи хэчнээн өнгийн, ямар чанарын шаараар үйлчилдэг вэ?
-Манай “Wow Balloon” студи нь 2022 оны аравдугаар сард нээлтээ хийсэн. 60 гаруй төрлийн өнгөний сонголттой, үнэргүй, харшил өгөхгүй сайн чанарын шаараар үйлчилдэг. Хүмүүс өөрөө ирээд шаараа үзэж, сонгох боломжтой. Манайх Солонгос, Америк, Хятадаас хамгийн чанартай гэсэн, мэргэжлийн хүмүүсийн хэрэглэдэг бүтээгдэхүүнийг захиалдаг.
Хамгийн гол хүүхдүүдэд ямар нэг харшил өгөхгүй, будгийн үнэргүй. Манай бүтээгдэхүүн дотор орчинд тоос шороо татахыг эс тооцвол нэг сар орчим хэлбэрээ алдахгүй. Харин гадаа хийн бөмбөлөг гурав хоног байдаг.
-Энэ төрлийн шааран чимэглэл хийж буй хүмүүст ямар зөвлөгөө өгөх вэ?
-Шаарыг зөвхөн үлээгээд болчихдоггүй. Зөв үлээхээс эхлээд техникийнх нь дагуу ажиллаж чадвал их гоё салбар юм. Би ямар нэгэн байдлаар шааран чимэглэл сонирхож байгаа хүмүүст тусалж, зөвлөж болно. Хүмүүс ер нь хамтарч ажиллавал илүү бүтээмжтэй байдаг шүү дээ.
-За ярилцсанд баярлалаа.
-Баярлалаа. Миний хувьд тус багт орж ажилласнаараа нэг алхам ахисан гэж хэлж болно. Мэргэжлийн талаасаа их зүйл суралцаж, эх орныхоо нэрийг гаргаж чадлаа. Цаашдаа олон улсын тавцанд Монгол гэх нэрээр ажиллах боломж бүрдлээ. Хүн хүсэж буй зүйлийнхээ төлөө тууштай байж чадахын бол түүндээ хүрч чаддаг. Лили Тан гэдэг хүнтэй хамтарч ажиллах нь миний мөрөөдөл байсан.
Б.Үлэмж
Сэтгэгдэл (1)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.
Gaihaltai buteel