Өнөөдөр буюу гуравдугаар сарын 20-нд аз жаргал, баяр баясгалантай байх учиртай аз жаргалын өдөр тохиож байна.
“World Happiness Report” тайланг НҮБ-ын Тогтвортой хөгжлийн асуудал эрхэлсэн хорооноос жил бүр гаргадаг билээ. Уг тайланд улс орнуудын иргэдийн аз жаргалын түвшинг тодорхойлохдоо дундаж наслалт, нийгмийн халамж, авлигын түвшин, нэг хүнд ногдох ДНБ, иргэний эрх чөлөө, ажлын байрны баталгаа, авлигын түвшин, мөн олон нийтийн санал асуулгын дүн зэрэг хэд хэдэн үзүүлэлтийг харгалздаг байна.
Дээрх зорилтууд хэрхэн хангагдаж буй талаар тодорхой үзүүлэлтүүдийг эш үндэс болгон хийдэг судалгааны үр дүн буюу Дэлхийн аз жаргалын 2023 оны тайлан саяхан хэвлэгджээ. Монгол Улс нийт 109 орноос Тайландын дараа, Киргизийн өмнө 61 дүгээрт бичигдсэн байна. Өнгөрсөн онд Монгол Улс авлигын түвшнээр тааруу үзүүлэлтээ хадгалж, “Авлигын төсөөллийн индекс”-д зургаан байр ухран 180 улсаас 116 дугаарт бичигдсэний сацуу "IQAir"-аас гаргасан дэлхийн хотуудын агаарын чанарын үнэлгээнд Улаанбаатар хот бохирдлоороо дэлхийн 7,323 хотоос 464 дүгээрт эрэмбэлэгдсэн юм. Энэ мэтээр хүн амын аз жаргалын түвшнийг илтгэх гол үзүүлэлтүүдэд Монгол Улс төдийлөн том ахиц гаргаж чадаагүй хэвээр байна. Харин Финлянд улс эхний байрыг эзэлж, зургаа дахь жилдээ нэлээд өндөр оноо авав.
Өнгөрсөн онд манай улс судалгаанд хамрагдсан дэлхийн 146 улсаас 68 дугаарт эрэмбэлэгдсэн. Зарим дэд үзүүлэлтээр тухайлбал, нэг хүнд оногдох дотоодын нийт бүтээгдэхүүнээр 82 дугаарт, нийгмээс дэмжлэг авах боломжоор 22 дугаарт, эрүүл аж төрөх боломжоор 104 дүгээрт, амьдралын сонголт хийх эрх чөлөөгөөр 118 дугаарт, өгөөмөр байдлаар 27 дугаарт, авлигын тухай ойлголтоор 29 дүгээрт байсан юм.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.