Гаалийн ерөнхий газраас цаг үеийн асуудлаар болон боомтын бүтээн хэрхэн өрнөж буй талаар мэдээлэл хийлээ.
Боомтын хөгжлийн хэлтсийн гаалийн улсын байцаагч Н.Нарангэрэл "УИХ-аар батлагдсан "Алсын хараа-2050" хөтөлбөрийн хүрээнд хилийн боомтын сэргэлтийг хийж байгаа. Энэ хүрээнд Азийн хөгжлийн банкны хөнгөлөлттэй зээлийн санхүүжилтээр Боршоо, Бичигт, Алтанбулаг зэрэг боомтыг БНХАУ-ын засгийн газрын буцалтгүй тусламж, Засгийн газрын улсын төсвийн хөрөнгө оруулалтаар Замын-Үүд, Гашуунсухайт боомтын үйл ажиллагааг шинэчлэн бүтээн байгуулалт хийж, олон улсын жишигт нийцүүлсэн. Замын-Үүд боомтын өргөтгөл шинэчлэлийн ажил, зорчигч тээврийн терминалын ажил дуусч, сая ашиглалтад хүлээн авсан. Ачаа тээврийн терминалын бүтээн байгуулалт 2023 оны долдугаар сард дуусахаар төлөвлөж буй. Зорчигч тээврийн терминалын үйл ажиллагаа өнгөрсөн нэгдүгээр сарын 8-нд нээлтээ хийлээ. Өдөрт 30 орчим автобус, 1200 орчим зорчигч нэг талдаа орж гарч байна.
Гашуунсухайт боомтын өргөтгөлийн ажлыг 2019 онд эхлүүлсэн. Цар тахлын улмаас ажлууд нэлээд хойшилсон ч энэ онд бүтээн байгуулалтыг дуусгахаар ажиллаж байна. Дөрөвдүгээр сарын 15-наас ажил нь эхэлнэ. Жолоочгүй тээврийн хэрэгслийн гарц барихаар төлөвлөсөн.
Боршоо боомтын ажил 2020 онд эхэлсэн юм. Улсын комисс 2022 оны арванхоёрдугаар сард хүлээн авч, зорчигч тээврийн цогцолборыг тавдугаар сард хүлээн авч, ашиглалтад бүрэн оруулна. Энэ боомтод ОХУ-аас олон зорчигч нэвтэрдэг гол боомт учраас хүчин чадал нь долоо дахин нэмэгдэнэ.
Сэлэнгэ аймгийн Алтанбулаг боомтын өргөтгөлийн ажлыг мөн 2019 онд эхлүүлсэн. Цар тахлын улмаас хойшилсон ч бүтээн байгуулалт 65.5 хувьтай үргэлжилж байна. Боомтын шинэчлэлийн хүрээнд зорчигч тээврийн хэсэгт 19, ачаа тээврийн хэсэгт 18, дэд бүтцийн 5 барилга байгууламж, иж бүрэн инженерийн шугам сүлжээ, 6000 метр квадрат ногоон байгууламж, тусгаарлах зурвас бүхий дөрвөн эгнээ 1,7 км авто зам, 7000 метр квадрат авто зогсоол, 30 мянган метр квадрат зам талбайг ашиглалтад оруулна.
Харин Сүхбаатар аймгийн Бичигт боомтын ажлыг 2022 онд эхлүүлэхээр Азийн хөгжлийн банкны хөнгөлөлттэй зээлийн санхүүжилтээр тендер зарласан боловч нэг удаа хойшилсон. Одоо авто замын тендер нь шалгарч, бүтээн байгуулалтын тендерийг энэ хавар дөрөвдүгээр сард багтаан дуусгаж, шинэчлэлтийг хийхээр төлөвлөсөн. Төслийн хүрээнд ачаа тээвэр болон зорчигч тээврийн хэсгийн хөдөлгөөнийг тусгаарлан, зорчигч тээврийн цогцолбор, гаалийн лаборатори, инженерийн шугам сүлжээ, зам талбай, ногоон байгууламж бүхий бүтээн байгуулалтыг ашиглалтад оруулна” хэмээн хэллээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.