Дэлхий нийтээрээ жил бүрийн гуравдугаар сарын 22-нд “Усны өдөр”-ийг тэмдэглэн өнгөрүүлдэг уламжлалтай. Үүний гол зорилго нь цэвэр ус болон усан хангамж, усны нөөцийн тогтвортой менежментийн асуудалд олон нийтийн анхаарлыг хандуулах, сурталчлан таниулах ач холбогдолтой юм.
Анх 1992 онд Нэгдсэн Үндэстний байгууллагын Хүрээлэн буй орчин, хөгжлийн тухай олон улсын хурлын (UNCED) үеэр дэлхийн усны тэмдэглэлт өдөртэй болох саналыг дэвшүүлсэн байна. Улмаар 1993 оны энэ өдрийг анх НҮБ-ын Ерөнхий Ассамблейгаас “Дэлхийн усны өдөр” болгон зарлан тунхаглажээ.
2021 оны гуравдугаар сард болсон НҮБ-Усны 34-р уулзалтаар 2023 оны Дэлхийн усны өдөр болон Дэлхийн ариун цэврийн байгууламжийн өдрийн кампанит ажлыг “Өөрчлөлтийг хурдасгая” (Accelerating Change) уриан дор зохион байгуулахаар шийдвэрлэсэн болно.
Тус уулзалтаар 2023 оны кампанит ажлын зорилго, агуулгыг НҮБ-ын Усны бага хуралд “ард түмний дуу хоолойг” хүргэхэд анхаарлаа хандуулах чиглэнэ гэж тодорхойлсон аж.
Энэ жилийн хувьд дэлхийн усны өдөр нь ус болон ариун цэврийн байгууламжийн асуудал, хямралыг шийдвэрлэхэд шаардлагатай аливаа өөрчлөлтийг хурдасгая гэж уриалж байна.
Хүн бүрийн, улс, ард иргэд бүхний дуу хоолой, хийсэн бүтээсэн үйлсийг 2023 онд буюу сүүлийн 50 жилд анх удаа дэлхийн хэмжээнд, устай холбоотой асуудлаар НҮБ-ын түвшинд зохион байгуулж буй Дэлхийн Усны бага хурлын үеэр танилцуулах Ус-Үйл ажиллагааны хөтөлбөрт тусгахаар төлөвлөж байна. Өөрөөр хэлбэл 2023 оны гуравдугаар сарын 22-нд буюу Дэлхийн усны өдөр нээгдэх НҮБ-ын Усны бага хурлын гол үр дүн болох "Ус- Үйл ажиллагааны Дэлхийн хөтөлбөр" (Water Action Agenda) -т хувь нэмэр оруулах гэнэ.
Энэ жилийн Дэлхийн усны өдрийн бас нэг онцлог бол Дэлхийн Ариун цэврийн байгууламжийн ((World Toilet Day, 19 November) ) өдөртэй уялдуулан зохион байгуулахаар шийдвэрлэж, өргөн хүрээнд үйл ажиллагааг дэлхийн болон улс орны түвшинд өрнүүлэхийг уриалсан байна.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.