Боловсролын зээлийн сангаас зээл авч гадаадад сураад зээлээ төлөөгүй 230 хүнийг хуулийн байгууллагад шилжүүлнэ гэв

 

Боловсролын зээлийн сангаас зээл авч гадаадын их дээд сургуульд суралцаад зээлээ төлөөгүй 230 хүнийг хууль хяналтын байгууллагад шалгуулахаар шилжүүлнэ гэдгийг сайд Л.Энх-Амгалан мэдээллээ. 

Тодруулбал, 1997 оноос хойш Боловсролын зээлийн сангаас зээл авч гадаадад суралцсан ч зээлээ төлөлгүй алга болсон 230 хүн байна. Тийм учраас эдгээр хүмүүсийг хууль хяналтын байгууллагад шилжүүлэх ажил эхэлж байна. Эдгээр 230 хүүхэд ямар сургуульд сураад, ямар хэмжээний мөнгийг Боловсролын зээлийн сангаас аваад өнөөдөр яагаад гэрээний үүргээ биелүүлэлгүй алга болсон бэ гэдэг асуудлыг хууль хяналтын байгууллага шалгаад шүүхэд өгнө. 

Энэ бол 10 тэрбум орчим төгрөгтэй тэнцэх хэмжээний эрсдэл манай Боловсролын зээлийн сан дээр үүссэн байна. Энэ эрсдлийг бууруулж, зээл авсан ч үүргээ билүүлээгүй хүүхдүүдээр буцааж авсан зээлээ төлүүлэх ажлыг зохион байгуулахаар ажиллаж байна. Ямар ч байсан Боловсролын зээлийн сангаас зээл авсан хүүхдүүдийн зээлийн мэдээллийг Монгол банкны арилжааны банкуудаас зээлийн мэдээллийн нэгдсэн санд оруулахаар болж байна.

Дарга нарын хүүхдүүд юм уу, улстөрд, эрх мэдэлд ойрхон байсан хүмүүсийн хүүхдүүд илүү их Боловсролын зээлийн сангаас зээл авч суралцсан байна гэдэг мэдээлэл ил болж байна гэсэн үг. Хэний хүүхэд ямар сургуульд яваад, ямар хэмжээний зээлийн гэрээ хийгээд энэ нь буцаж төлөгдсөн юм уу, төлөгдөөгүй юм уу, үүргээ биелүүлсэн үү,  үгүй юу гэдэг мэдээлэл ил болж байна.

Хөгжлийн банкны хэлэлцүүлэг, Нүүрсний хулгай хэрэг, ЖДҮ сангаас албан тушаалаа ашиглан зээл авсан асуудал гэдэг шиг үнэхээр Боловсролын зээлийн сангаас олгогдож байсан зээлүүд яг очих ёстой эзэндээ, авах ёстой хүндээ очсон уу, үнэхээр үнэн шалгуураар явж байсан уу гэдгийг та бүхэн Боловсролын зээлийн сангийн мэдээллийн сайтруу орж үзэх боломжийг олгож байна гэжээ.