Боловсролын зээлийн санг "боловсон дээрэмдэгчид" буюу Ерөнхийлөгч, УИХ-ын дарга, УИХ-ын гишүүн бизнесмэнүүдийн нэр холбогдсон зээл төлөгдсөн үү

Боловсролын зээлийн сангийн санхүүжилтээр 1997 оноос гадаадын их дээд сургуульд бакалавр, магистр, докторын түвшинд суралцсан 2371 хүний мэдээлэл Нийтийн мэдээллийн ил тод байдлын хуулийн хүрээнд өчигдрөөс олон нийтэд ил болсон.

Нийтэд ил болсон мэдээлэлд,

- Ерөнхийлөгч У.Хүрэлсүхийн дүү У.Отгонбаяр Австралийн Чарлис Старт ИС-д бизнесийн удирдлагаар магистрт сурахад 32000 ам.доллар

-УИХ-ын дарга Г.Занданшатарын Алтангэрэл АНУ-ын Беркелигийн Их сургуульд олон улсын эдийн засагч мэргэжлээр бакалаврт суралцахад 93000 ам.доллар / төлсөн/

Охин Должинсүрэн нь  Калифорнийн их сургуульд  сэтгэл судлалаар суралцахад 13711 ам.доллар /төлсөн/

-УИХ-ын гишүүн Батсүхийн Саранчимэг АНУ-ын Гавайн пасифик их сургуульд мэдээллийн систем чиглэлээр 2 жил суралцахад  32582 ам.долларын зээл авсан гэх зэргээр хөвөрч байна.

 С.Баярцогтынхон ах дүүсээрээ зээлээр суралцжээ

Швейцарийн банкинд сая ам.доллараа мартсан хэмээн дуулиан дэгдээж байсан УИХ-ын гишүүн, Сангийн сайд, ЗГХЭГ-ын дарга асан Сангажавын Баярцогт бүх дүү нь улсаас зээл авч Америкт суралцсаныг энэ жагсаалтаас харж болох нь.

С.Баярцогтын ЗГХЭГ-ын даргаар ажиллаж байхад түүний дүү С.Баярбат Түлш эрчим хүчний яамны санхүү хөрөнгө оруулалтын газрын даргаар ажиллаж багагүй хэл аманд орооцолдсон байдаг. Тэгвэл С.Баярбат нь АНУ- бизнесийн удирдлагаар магистрт суралцахдаа Боловсролын зээлийн сангаас 32000 ам.долларын зээл авчээ. Эдний гэр бүлийн улсын зардлаар суралцах үйл явц ингээд дууссангүй. Сангажавын Баярхишиг нь мөн л АНУ-ын Брижпортын их сургуульд бизнесийн удирдлагаар суралцахаар 32000 ам.доллар, дүү Сангажавын Баярмаа нь АНУ-ын Колорадогийн их сургуульд суралцахад 32000 ам.доллар “зээлжээ”. Зээлээ төлсөн эсэхийн тодорхой тэмцэглээгүй учраас чухал энэ тухайд өөрсдөө хариулт өгөх биз.

Өөрөөр хэлбэл Сангажавын 3 хүүхэд АНУ-д магистраар суралцахдаа улсаас 96000 ам.доллар зээлсэн байх юм. Гэтэл том ах Баярцогт нь ам.долларын саятан байдаг...

 Баян бас улс төрчийн хүүхэд бол гадаадад зээлээр суралцдаг

Монголын тэргүүлэх баячуудын нэгд тооцогддог, ТЕГ-ын дарга асан Ц.Хурцын Намуун гэх охин Канадын Бритиш Колумбиа Их сургуульд философийн мэргэжлээр суралцжээ. Мэдээж улсаас 72716 ам.долларын зээл аваад сурсан байна. Одоогоор гэрээ хэрэгжиж байна гэх төлөвт зээл нь байгаа юм.

Нэгэнт цагт МАН-ын өндөр эцэг шахуу байсан Т.Бадамжунайн охин Оюунбилэг Канадад аялал жуулчлалаар магистрын зэрэгт суралцахдаа улсаас 32000 ам.доллар зээлжээ. Түүний хамсаатан гэгддэг Эдуард Сүрэн буюу Алтжингийн Алтангийн хүү АНУ-д хүний нөөцийн удирдлагаар суралцахын тулд улсаас 16000 ам.доллар зээлжээ. Энэ бүхэн танд хэр үнэмшилтэй сонсогдож байх юм.

Жишээ нь, УИХ-ын гишүүн асан, “Наран трейд”-ийн гэх тодотголт С.Болдхэтийн охин Хулан Нью-Йоркид нэг жил эдийн засгийн чиглэлээр суралцахын тулд улсаас 6950 ам.доллар зээлсэн байна.

Бас нэг жишээ бол Дүрзээгийн Одхүү гэх хүн АНУ-д дөрвөн сар англи хэл сурахаар улсаас 14580 ам.доллар зээлжээ. Дүрзээгийн Одхүү бол УИХ-ын гишүүн, Эгийн голын усан цахилгаан станц төслийн захирлаар ажиллаж байсан нэгэн.