УИХ-ын чуулганы өнөөдрийн хуралдааны үеэр УИХ-ын гишүүн Г.Дамдинням “Төрийн бүтээмж хэр байгаад анхаарах цаг болж. Засгийн газраас дээд түвшиндээ хичээж, чармайгаар ажиллаж байх шиг байна. Гэтэл дунд нь алдаа завхрал их гарч байна. УИХ-аас Дарханы замын бүтээн байгуулалт хяналт, шалгалт хийх ажлын хэсэг байгуулагдаад ажиллаж байна. Өнгөрсөн зун Монгол даяар цементийн хомсдол үүсч, нийлүүлэлт тасалдсанаас болж, барилгын үнэ өсч, улсын төсвөөр хийж байсан барилга бүтээн байгуулалтын ажил саатаж байна гэдэг асуудал үүссэн. Газар дээрээ юу болсон бэ гэхээр Дарханы замд өнгөрсөн жил 90 мянган тонн цемент орсон. Гэвч Дарханы замд нэрээр цемент үйлдвэрлэгчдээс 126 мянган тонн цемент авсан байгаа юм. Өөрөөр хэлбэл, 36 мянган тонн цемент хаа нэг тийшээ орчихож. Ер нь, дамлаад зарсан яриа л сонсогдоод байгаа юм” гэсэн асуудлыг хөндөв.
ЗТХ-ийн яамны Төрийн нарийн бичгийн дарга С.Батболд энэ тухайд “ Энэ асуудал өчигдөр ажлын хэсэг дээр гишүүнээс гарч ирж, яригдсан. Өнгөрсөн жил Дарханы зам дээр 90,6 мянган тонн цементийг 6 аж ахуйн нэгжээс авч хэрэглэсэн. Дундуур ийм асуудал гарсан талаар бид өчигдрөөс хяналт шалгалт хийгээд явж байна. Түүнээс яг өнөөдөр 36 мянган тонн цемент авсан гэх баримт мэдээлэл алга. Тодруулаад эргүүлж, хариу өгье” гэв.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.