Нүүрсний хэрэгт холбогдсон Н.Наранбаатар, Т.Аюурсайхан, Д.Бат-Эрдэнэ нарын бүрэн эрхийг түдгэлзүүлнэ

АТГ-аас УИХ-ын гишүүн Т.Аюурсайхан, Д.Бат-Эрдэнэ, Н.Наранбаатар нарын бүрэн эрхийг түдгэлзүүлэх хүсэлтийг УЕПГ-д хүргүүлсэн байна.  Прокурорын эх сурвалж бүрэн эрхийг нь түдгэлзүүлэх санал ирсэн, танилцаж байна гэсэн юм. 

Хэрэв УЕПГ АТГ-ын хүсэлтийг хангахаар шийдвэрлэвэл УИХ-д санал оруулна. Улмаар тус саналыг УИХ-аар хэлэлцэх бөгөөд тэдгээр гишүүдийн бүрэн эрхийг түдгэлзүүлэх эсэх асуудалд хаалттай санал хураалт явуулна. Бүрэн эрхийг нь түдгэлзүүлбээс Т.Аюурсайхан, Д.Бат-Эрдэнэ, Н.Наранбаатар нар УИХ-ын гишүүний статус бүхий хуулийн хамгаалалтгүй болж, нэр холбогдсон нүүрсний хулгайн гэх хэргээр шалгуулах юм. Т.Аюурсайханы хувьд ХНХ-ын сайдын суудлаасаа буусан байгаа. Харин нүүрсний хэрэгт хамаагүй, миний эргэн тойрны хүмүүс холбогдоогүй хэмээн өөрийгөө болон өрөөлийг хамгаалсан тэрбээр гишүүний суудалтайгаа үлдчих гээд байгаа.

Тэгвэл Өмнөговь аймгаас сонгогдсон хоёр гишүүн ч өөрийгөө өмгөөлж, Н.Наранбаатар би нэг ч хүрз нүүрсний хэрэгт холбогдоогүй нэр цэвэр гэж гүрийдэг бол Д.Бат-Эрдэнэ АН-ынх болохоор дээрэлхэж бооролхож дайрч, худлаа хэрэгт гүтгэж байна гэсэн удаатай. Ямартаа гишүүний бүрэн эрх нь хаалт болоод байсан учраас УИХ-аар түдгэлзүүлж байгаад тэднийг шалгаж, хуулийн хариуцлага тооцох уу, гэм буруугүй гэдгийг нь шийдэх үү гэдэг нь тодорхой болно.