Цар тахлын өмнө сакура цэцэглэх үеэр 31.8 сая жуулчин Японыг зорьжээ

Японд интоорын мод цэцэглэх үед хэдэн долоо хоногийн турш улс ягаан, цагаан өнгөнд будагдана. Сакура цэцэгс хэдхэн хоног гоо үзэсгэлэнгээ гайхуулчхаад дэлбээгээ гээж, өнгөө хувиргадаг. Энэ нь дэлхий дахины анхаарлыг татахуйц сонирхол болж, Японы эдийн засагт эерэг нөлөө үзүүлдэг. Тухайлбал, ойролцоогоор 63 сая хүн модод цэцэглэж буйг үзэхийн тулд Япон улс болон бусад хот руу нь аялдаг бөгөөд үүнд 2.7 тэрбум доллар зарцуулдаг гэнэ.

Энэхүү анхилуун үнэрт гайхамшигт цэцэг нь яг л далайн давлагаа мэт жил бүрийн гуравдугаар сарын сүүлчээр нутгийн өмнөд хэсгийн Кюсю мужаас эхлэн цэцэглэж дөрөвдүгээр сарын эхэн гэхэд Токио хотоор дамжин тавдугаар сар гэхэд Хоккайдо аралд цэцэглэн дуусдаг. Энэ жил гуравдугаар сарын 14-нд цэцэглэж эхэлсэн бөгөөд Токио хотын шинто шашны Ясүкүни сүм дэх "тусгай хяналтад” байдаг модонд анхны цэцэг дэлбээлжээ. Цаг уурчдын мэдээлснээр, энэ оны хувьд нийслэл Токио хотод сакура цэцэглэх улирал жилийн дунджаас 10 хоногийн өмнө эхэлсэн гэнэ. Тус улс 1953 оноос ийм статистик хөтөлж эхэлснээс хойш цагаасаа эрт цэцэглэсэн гурван жилийн (2020, 2021 он) нэг болжээ.

Энэ жил коронавирусийн халдварын тархалт Японд намжсан гэж үзсэн тул сакура цэцэглэдэг хүрээлэнгүүдэд хязгаарлалт тогтоохгүй байх аж.

Ковид-19 тахлын өмнөх 2019 онд 31.8 сая жуулчин ирж рекорд тогтоосон.

Японд интоорын цэцэгсийг харуулсан 1000 гаруй байршилтай тул хамгийн тохиромжтой цэгийг сонгох нь маш хэцүү байдаг гэнэ.

Кансай их сургуулиас хийсэн судалгаагаар 63 сая орчим хүн цэцэглэхийг үзэхийн тулд Япон руу аялдаг бөгөөд энэ үйл явцад ойролцоогоор 2.7 тэрбум доллар зарцуулдаг гэнэ. Сакура нь соёлын хувьд маш их ач холбогдолтой. Тухайлбал, Үэногийн цэцэрлэгт хүрээлэнд Эдогийн үеэс “ханами” буюу сакура мод үзэх баярыг тэмдэглэж ирсэн. Ханами нь Японы дээр үеэс тэмдэглэж ирсэн хаврын баяр юм. Япончуудын хувьд сакура бол гоо үзэсгэлэнг билэгддэг төдийгүй энэ насны амьдрал богинохон гэдгийг сануулдаг аж.

Японы үндэсний аялал жуулчлалын байгууллагын мэдээлснээр 2018 оны 3, 4-р сард дэлхийн өнцөг булан бүрээс 5 сая орчим жуулчин ирсэн байна. Зөвхөн Өмнөд Солонгос, Хятадаас гэхэд хоёр сая гаруй хүн ирдэг. Харин дэлхийн бөмбөрцгийн баруун хагасаас ирсэн жуулчид хамгийн их хувийг бүрдүүлдэг аж. Кансай их сургуулийн профессор Кацухиро Миямотогийн тооцоолсноор сакура цэцэглэснээр нийт эдийн засагт үзүүлэх нөлөө нь ойролцоогоор 5.8 тэрбум доллар гэнэ.

Сонирхолтой нь, интоорын цэцэгсийн давлагаа Японд хязгаарлагдахгүй. Жишээ нь, Вашингтон ДС хотод зуу гаруй жилийн өмнө Япон улсын бэлэглэсэн интоорын модод цэцэглэлтийн оргил үедээ хүрч, жуулчдын сонирхлыг татдаг. Илүү олон мод харахын тулд Жоржиа муж улсын төв хэсэгт орших Макон хотыг зорьж болно. Тэнд 300,000 гаруй интоорын мод байдаг аж. Харин Солонгост дөрөвдүгээр сарын эхний өдрөөс Жежү аралд цэцэглэж эхлээд тус сарын дунд хүртэл арлыг бүрхдэг байна.