М.Тулга: Залууст ажил хийх боломж алга, орлого ч алга. Үгээ хэлсэн нэгнийг нь шоронд хийж байна

Иргэн Д.Мөнх-Эрдэнийн шүүх хурал өнөөдөр болж байна. Шүүхийн гадна талд Д.Мөнх-Эрдэнийг суллахыг шаардаж, АН-ын гишүүд болон  иргэд ирээд байгаа юм.

АН-ын гишүүн М.Тулга “Өмнө нь залхаан цээрлүүлэх байдлаар ингэж бариад тавиад байдаг практик Монголын шүүхийн түүхэнд байгаагүй. Энэ бол улстөрийн захиалгатай гэж хардаж байгаа. Нээлттэй шүүх нь хаана байна вэ. Элбэгдорж Ерөнхийлөгчийн үед харьцангуй шүүх засаглал гайгүй байсан. Өнөөдөр Монголын шорон хүнээр дүүрсэн байна. 461 дүгээр хорих ангийн дөрвөн хүн байдаг өрөөнд 8 хүн байна.

Амьдралаа аваад явах боломжоо алдсан хүмүүсээр дүүрч байна. Үүнийг эсэргүүцээд дуугарсан залуусыг нэг нэгээр нь хорьж байна. Монголхүүг өчигдөр хорьж байна. 2021 оны долдугаар сард дарга нар 10 тэрбумаар баяр наадам хийсэн. Тэр үед хатуу хөл хорио тогтоож хамаг юм нь хаагдсан залуус Тэвчээр тасарлаа хөдөлгөөн өрнүүлснийг та бүхэн санаж байгаа байх. Тэдний дуу хоолой болж Мөнх-Эрдэнэ, Монголхүү нар талбайд жагссан. Үүнээс болж хоригдсон. Үндсэндээ цагдаагийн албан хаагчийг эсэргүүцсэн гээд шоронд хийчихсэн. Засгийн газрын таван Ш ажиллагаа гэдэг нь “шорон шорон шорон шорон бас дахин шорон” ажиллагаа л гэж харагдаж байна. Залууст ажил хийх боломж алга, орлого ч алга. Үгээ хэлсэн нэгнийг нь шоронд хийж байна. Харанхуй, ялзарсан ийм нийгмийг би хүсэхгүй байна. УИХ-ын гишүүд нь сонсгол нэрээр шүүгчийн ажил хийж байх юм.Баахан л шүүгчтэй орон боллоо. Монголчууд “бид энэ бүхний буруутанг шоронд хийлээ” гэдэг хар мэдээллээр хооллож байна. Тиймээс залуус минь зоригтой дуугарсан залуусаа хамгаал. Л.Оюун-Эрдэнийг цагдаа хийлгэх гэж Ерөнхий сайд болгоогүй шүү" хэмээн ярилаа.