Л.Энх-Амгалан сайд аа, хоёроос дээш сая төгрөгийн цалин авдаг багш байгаа гэдэг үгэнд чинь итгэхгүй байна

Төв талбайд боловсролын салбарын багш ажилтнууд болон МҮЭХ, сургуулиудын үйлдвэрчний эвлэлийн холбоодын төлөөлөл хамтран багш, шинжлэх ухааны салбарынхны цалинг нэмэхийг шаардаж өчигдөр жагслаа. Тэд төрийн өндөрлөгүүд болон Засгийн газар, салбарын сайдад шаардлага хүргүүлэв. Шаардлагынхаа хариуг ирэх долоо хоногт авахаар товлов. Хэрвээ нааштай хариу өгөхгүй бол ажил хаялт зарлана гэдгээ мэдэгдсэн юм. Цуглаж жагссан багш нар бодит байдал, үнэнийг өгүүлснийг бид өчигдөр хүргэсэн. "Авдаг цалин нь амьдралд нь хүрэлцэхгүй, өр зээлээ төлөөд гар дээрээ ямар ч мөнгөгүй үлддэг.  Ажлын байран дээрээ өрийн сүлжээ үүсгэдэг, хоол цайны газартаа өр тавьж, өдрийн цайгаа уудаг" гэх мэт зовлон тоочсон багш олон байв. Тэд бусад багшийгаа төлөөлж талбайд ирсэн ч үнэндээ ЕБС-иудын багш нар тэр дундаа залуу багш нарт зовлон их байна. Дээр нь ажлын ачааллаас болж ажлаасаа халшрах хам шинжинд их өртөж байгаа талаар ярьсан. Монгол улсын өнцөг булан бүрт багшийн орон тооны хомсдол үүсчихсэн. Хэдий төрийн байгууллагад ажилладаг нэртэй ч “цалин нь оров халин одов” уриатай лоозон барьж зогссон тэд шударга үнэмлэмжийг нэхэв.

Салбарын сайд Л.Энх-Амгалангийн олон нийтийн хэрэгслээр ярьж байгаа, ярьдаг сайхан сайхан зүйлс нь бүгд худлаа амлалт хоосон яриа, биелэгдэшгүй мөрөөдөл гэдгийг захын нэг багш нотлоод хэлээд өглөө. Багш нарын ярьснаар "Тэд хангалттай цалин авч чадахгүй байна. Дээрээс нь ажлын ачаалал, бичиг цаасны ажил ихтэйгээс болж хүүхдүүдтэйгээ тулж ажиллах боломж хомс. Стандартаараа бол нэг ангид 20-30 сурагч суух ёстой. Гэтэл өнөөдөр аль ч сургуулийн ангийн ачаалал хэрээс хэтэрч нэг багшид 50-60 сурагч оногдож байна". Ийм олон хүүхэдтэй ганц багш яаж  ажиллах вэ. Тэгээд авдаг цалин нь гэж бага. Ийм байхад сургалтын чанар хариуцлага нэхээд байж болохгүй биздээ, Салбарын сайд аа.

БШУ-ны сайд Л.Энх-Амгалан та өчигдөр хэвлэлийнхнийг өмнө гарч ирээд “ Хоёр саяас дээш цалинтай 7000 багш бий. Гэрээний үүргээ биелүүлж, багш нарын цалинг 30 хувиар нэмэгдүүлсэн. Багш нар сард 1.050.000-2.800.000 төгрөгт хүрсэн. Ур чадвар гүйцэтгэл дээр тулгуурлаж 10-25 хувийн урамшуулал олгодог. Харин 5-6 дугаар түвшинд үнэлэгдсэн бол урамшуулал олгодоггүй. Чадвартай байж өндөр цалин авах тэмүүлэлтэй байх ёстой” гэж ярьсан. Гэтэл багш нар таны үгийг худлаа гэж байна. 25 жил ажилласан, багшийн авдаг урамшуулал нэмэгдлийг бүгдийг нь шахуу авдаг ахмад багшийн цалин 1.7 сая байна. Гар дээрээ 1.3 сая орчим төгрөг авч байна. 

Гэтэл та, Төрийн ордонд олон сэтгүүлч зураглаачийн өмнө их сайхан боломжтой мэтээр худлаа ярих юм. Үүний оронд гадаа жагссан багш нар дээр гарч ирээд бодит байдлыг нь тулгамдаж байгаа асуудлыг нь сонссон бол үнэнд нийцэх байсан. Та багш нарын цалин даблдана, багш нар зөвхөн хичээлээ заана, илүү цагийн мөнгөө авна, элдэв бичиг цаастай зууралдахгүй, багшийг хөгжүүлнэ, ар гэртээ гаргах цаг завыг нь нэмэгдүүлнэ гэж байнга ярьдаг.  Гэтэл энэ яриа чинь хөрсөн дээрээ буухгүй байна, хэрэгжихгүй байна гэдгийг олон багш нар хэлж байна. Тэд хангалттай цалин авч, цаг нартай ажиллабал ядаж ар гэрийнхэндээ цаг зарцуулж, ажлаасаа шантрахгүй халшрахгүй хийх урам зоригтой болно биздээ. Тиймээс та худлаа попорч байхын оронд багш нараа сонс, багш нартайгаа уулз бодит байдлыг нь нүдээрээ хараад зөрүүтэй мэдээллийнхээ зөв бурууг шүүгээрэй гэж хэлье.