Сүхбаатарын болон Байлдааны гавьяаны улаан тугийн одонт Маршил Х.Чойбалсангийн нэрэмжит Зэвсэгт хүчний 016 дугаар нэгтгэлийн үйл ажиллагаатай сэтгүүлчид танилцлаа. Энэ үеэр тус ангид цэргийн алба хааж байгаа байлдагч Э.Төгөлдөртэй ярилцлаа.
-Сайн уу. Албаа сайн хааж байна уу, хэзээний цэрэг татлагаар хаанаас ирсэн бэ?
-Сайн байна уу, эр цэргийн албаа нэр төртэй сайн хааж байна. Өнгөрсөн жилийн намар аравдугаар сард БЗД-ээс татагдаж ирсэн цэрэг байна.
-Анх энд цэргийн алба хаагч болоод ирэх үеийн төсөөлөл ямар байв. Ирсэний дараа ямар санагдав?
-Энэ хоёрын дунд асар том ялгаа өөрчлөлт байлгүй яах вэ. Цэргийн талаар анх Дөл тэмцээнд орж, цэрэг гэдэг чинь ийм байх ёстой юм байна гэсэн төсөөллийг олж авч байсан. Албан болон албан бус хоорондын ялгааг ч мэддэг болсон. Анх энэ 016 дугаар нэгтгэлд ирэхэд албан харилцаа албан бус харилцаа, дарга цэргээ хүндэтгэх харилцаанд маш сайн суралцаж байна. Одоо ч суралцсаар явна.
-Гэрээ санадаг уу. Ангидаа дасахад хэр хугацаа шаардагдаж байсан бэ?
-Одоо санахаа больсон. Эхэндээ санадаг байсан шүү /инээв/. Найзуудтайгаа хамт ирсэн болохоор гайгүй шүү. Өөртэйгээ адилхан нэг оны цэргүүд учраас хоорондоо харилцааны зөрчил маргаан үүсгэж болохгүй, харин ч эвтэй нийтэч болсон доо. Нэгнээ ёсзүйгүй үгээр харааж, үйлдэл үзүүлэхгүй.
-Хэр үүрэгтэй хариуцлагатай болж байна?
-Үүрэг хариуцлагыг цэрэгт ирэхээс өмнө өөрөөр боддог байсан. Харин энд ирснээс хойш үүрэг хариуцлага гэж юу бэ, байлдагч би ямар үүрэгтэй вэ гэдгээ маш сайн мэдэж ухамсарласан. Үүргээ заавал биелүүлж гүйцэтгэх ёстой. Миний үүрэг хариуцлага бусад байлдагчид ч үлгэр дууриалал үзүүлэх ёстой.
-Эх орны тухай ямар ойлголт бодолтой байдаг вэ?
-Хамгийн анх энд ирээд хээрийн бэлтгэлд гарч дадлагажиж байхдаа эх орон ямар байх яаж хайрлан хамгаалах ёстой гэдгийг маш сайн ойлгосон. 2000 оноос хойш үеийн залуус цэргийн алба хаахаас зайлсхийдэг болжээ гэх мэдээлэл олж харсан. Мөн эх орны тухай ойлголт ч сайн биш байх. Тэгэхээр эр цэргийн албанд ирж эх орноо хайрлах, эх орон гэдэг юунаас ч илүү эрхэм үнэтэй гэдгийг ойлгож, биеэрээ, тархи оюун ухаанаараа мэдэрнэ дээ. Манай Монгол орон чинь сайхан уудам чилгэр, эд баялаг нь арвин, үүх түүх нь зузаан яндашгүй баян эх орон. Тийм учраас энэ үнэтэй бүхнээ хайрлан хамгаалахад хүн бүр оролцоо чухал болов уу. Эх оронд гэдэг бол одоо бүх зүйл болсон.
-Ангийн дарга удирдлагууд болон хал цэргүүд нэгнээ дарамтлах дэглэх зүйл байдаг уу?
-Тийм. Одоо өглөө хэдэн цагаас сэрэх өдөр юу юу хийх, өөрийгөө хэрхэн яаж хөгжүүлэх, орой хэдэн цагт унтах вэ гэдэгт бүр суралцаж дасан зохицжээ. Амьдралын хэв маяг ч өөрчлөгдөж байгаа шүү. Цэргийн албаны дүрмээ маш сайн мөрддөг болсон.
-Цэргийн албанд өөрийгөө хөгжүүлэх боломж хэр байдаг вэ. Чөлөөт цаг гарвал чи юу хийдэг вэ?
-Бие бялдар оюун ухаанаа хөгжүүлэх боломж бүрэн бий. Жишээлбэл манай ангид спорт заал танхим байна. Мөн номын уншлагын өрөөндөө ном сонин унших боломжтой. Чөлөөт цагаараа шатар даам тоглоно.
-Танай рот хэдэн байлдагчтай вэ?
-Манай рот 32 байлдагчтай. Манай тасаг салаа 12 байлдагчтай, би тэдний нэг нь. Би өөрөө цэгцтэй бүх юмаа жин тан хийдэг болчихвол манай салааныхан намайг яг дагаж дуурайж цэгцтэй байна. Ингэж л бусаддаа өөрөөрөө үлгэр дууриалал үзүүлэхийг хичээдэг. Хүн болгоноос цэргийн аж амьдрал шалтгаалдаг. Тийм учраас бидэнд шаардлага тавьдаг.
-Найзуудтайгаа цэргийн албанд татагдаж ирсэн гэсэн. Ямар найзуудтайгаа вэ?
-Манай арван жилийн ангийн найзууд.
-Ар гэрийнхэнтэйгээ хэдэн удаа уулзсан бэ. Ер нь уулзалтыг нээлттэй цахим чөлөөтэй болгосон гэж ярьж байна?
-Ар гэрийнхэнтэйгээ утсаар харилцахад нээлттэй байдаг шүү. Ажлын өдөр амралтын өдөр гэлтгүй ярих боломжтой. Эргэлтийн өдөр гэж бий, тэр үеэр ар гэрийнхэн ирээд уулзаад явдаг. Татагдаж ирснээсээ хойш ар гэрийнхэнтэйгээ хэд хэдэн удаа уулзсан. Өдөр болгон ирээд уулзах боломж бий.
-Цаашдаа цэргийн алба хаагч болох уу?
-Өөр юм хийе гэсэн бодолтой байгаа шүү.
-Найз охинтой юу?
-Байгаа.
-Цэргийн алба хаах хүсэл сонирхолтой залууст хандаж юу гэж хэлэх вэ?
-Эр хүн болгон цэргийн алба хааж, жинхэнэ эр хүн болох ёстой болов уу. Цэргийн алба хааснаараа дүү нар маань өөртөө эзэн болно, хариуцлагатай болно, ажил сурна гэдэг их авууштай шүү. Дээр нь амьдралын хэв маягаа ч өөрчлөх бүрэн боломжтой. Тэвчээртэй болно, хүний үг дааж хат сууж хатуужилтай болно шүү. Тийм учраас шинэ үеийн залуустаа хандаж хэлэхэд цэргийн албаа нэр төртэйгээр хаагаарай гэж хэлье.
-За баярлалаа, амжилт хүсье албаа сайн хаагаарай?
-За тэгнэ ээ.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.