Германы Аахен хотод маргааш буюу 5 дугаар сарын 14-нд Украины Ерөнхийлөгч В.Зеленскийд Аугаа Калагийн нэрэмжит Европын хамгийн нэр хүндтэй шагнал гардуулах юм. 1950 оноос хойш Европын эв нэгдлийг хангах үйлсэд гарамгай хувь нэмэр оруулсан хүмүүст энэ шагналыг гардуулж буй.
Хэрэв Украины Ерөнхийлөгч Германд ирвэл Германы канцлер Олаф Шольцтой уулзана. Тэд юун тухай ярилцах нь олон улсын анхаарлыг татаж байна.
Украины Ерөнхийлөгч Зеленский, Германы канцлер Олаф Шольц нарын харилцаа тийм ч сайн биш. Тэд дайн эхэлснээс хойш хоёр удаа л уулзсан. Барууны зарим орны өндөр албан тушаалтнууд Киевт очсоны дараа л Шольц тэнд очсон байдаг.
Үүнээс өмнө Герман дахь Украины Элчин сайд Андрей Мельник Холбооны Ерөнхийлөгч Франк-Вальтер Штайнмайер бол Москватай дэндүү ойр, Канцлер Шольц Украинд зэвсэг нийлүүлэх асуудал дээр дэндүү хойрго байна хэмээн буруутгасан. Мөн канцлер Шольц Киевт хийх айчлалаа цуцлахад Германы Засгийн газрын тэргүүн "гомдож тоглох боллоо" хэмээн Элчин сайд Мельник мэдэгдсэн аж. Ийнхүү хоёр талын дуулиан намжих хүртэл хэдэн долоо хоног болсон байдаг.
Хоёр улсын одоогийн харилцааны талаар Германы Гадаад бодлогын нийгэмлэгийн (DGAP) тэргүүн Хеннинг Хофф "Харилцаа маш их сайжирсан" гэжээ.
“Германы Батлан хамгаалах яамны сайд Борис Писториус бол харилцааг сайжрахад ихээхэн нөлөөлсөн. Писториус бол ойрын зорилго бол Украины ялалт гэдгийг маш тодорхой хэлсэн сайд” гэж Хофф онцолжээ. Германы Батлан хамгаалахын шинэ сайд мөн "Ирвэс 2" байлдааны танкуудыг Киевт "цаг алдалгүй" хүргэх шийдвэр гаргасан юм.
Украинд зориулсан зэвсэг
Зеленский 5 дугаар сарын 14-нд Германд ирвэд Берлинээс нэн шаардлагатай байгаа зэвсэг, сум хүсэх нь тодорхой. Герман бол бусад орныг бодвол Киевт цэргийн тусламж үзүүлэх асуудал дээр нэлээн хойрго хандаж шийдвэр гаргаж байсан юм. Шольц Украинд өөрөө явагч зенитийн буу зэрэг хүнд зэвсэг нийлүүлэхийг зөвшөөрөхөөсөө өмнө хэдэн сар хүлээсэн. Мөн АНУ-ыг байлдааны танк илгээхэд бэлэн байгаагаа зарласны дараа л Герман танк нийлүүлнэ гэж шийдвэрлэсэн. Харин одоогоор Киевт сөнөөч онгоц нийлүүлэх тухай тэрээр сонсохыг хүсэхгүй байгаа аж.
Гэсэн ч Нидерланд F-16 онгоц нийлүүлэх талаар Дани, Их Британитай хэлэлцэж эхэлсэн ч бүрэн тохиролцоонд хүрээгүй байна. Мөн Зеленский Финландын Ерөнхийлөгчтэй уулзсаныхаа дараа хэвлэлийнхэнд хандаж “Бид удахгүй довтолгоо хийнэ. Энэ довтолгооны дараа тэд бидэнд онгоц бэлэглэх болно” хэмээн мэдэгдсэн байдаг.
Эсрэг довтолгоо амжилттай болох эсэхэд эргэлзэж байна
Зеленский барууны дэмжлэг хязгааргүй гэдгийг мэддэг. Өнгөрсөн намар Украин цэргийн амжилттай ажиллагаа явуулсны дараа барууны холбоотнуудаас үзүүлэх ёстой байсан танкийн тусламж удааширсан нь Киевт учрах дарамтыг нэмэгдүүлсэн юм. Тэрээр "Бидэнд амжилт хэрэгтэй" хэмээн саяхан олон улсад мэдэгдсэн байдаг. Одоогоор барууны орнуудад Америкийн тагнуулын мэдээлэл цацагдсаны дараа удахгүй Украйны амжилттай довтолгоо хийнэ гэдэгт улам эргэлзэх болж.
Ялангуяа Германд. Мюнхений Аюулгүй байдлын бага хурлын тэргүүн асан Вольфганг Ишингер "Украин гэнэт амжилт гаргана гэх нь төөрөгдөл" хэмээн хэлжээ. Энэ бол хэдхэн хоногийн асуудал биш, урт хугацааны үйл явц гэж тэрээр үзэж, “Урт хугацааны дэмжлэг үзүүлэх нь хоол биш хор болно” гэж байр сууриа илэрхийлсэн аж.
ЕХ болон НАТО-д элсэх тодорхой амлалт байхгүй
Ерөнхийлөгч Зеленский Германы Засгийн газар Украиныг Европын холбоо болон НАТО-д элсэхэд илүү их дэмжлэг үзүүлнэ гэж найдаж байгаа юм.
2022 оны 6 дугаар сард Украин ЕХ-ны гишүүнчлэлд нэр дэвшигчийн статусыг албан ёсоор хүлээн авсан. Европын холбооны Ерөнхийлөгч Урсула фон дер Лейен тавдугаар сарын 9-нд болсон “Европын өдөр”-өөр Киевт тав дахь удаагаа айлчлахдаа “Украин бол манай Европын гэр бүлд харьяалагддаг” гэж мэдэгдсэн байдаг. Гэхдээ эдгээр үгс асуудлыг бүрэн шийдэж чадахгүй. Үүний нэг нь Украины үр тарианы экспорт юм. Польш, Болгар зэрэг Европын холбооны орнуудын тариаланчид Украины хөдөө аж ахуйн бүтээгдэхүүнийг эдийн засгийн аюул гэж үздэг. Харин Зеленский фон дер Лейенд энэ бол тэдний зүгээс үзүүлж байгаа "харгис" байр суурь хэмээн хэлсэн байдаг
Хеннинг Хофф Украиныг ЕХ-нд элсэх талаар "Энэ бол амар зам биш бөгөөд Киевийн хүсч байгаагаас илүү урт хугацаа шаардагдах болно" гэжээ.
Тэрээр "НАТО-д элсэх нь илүү хэцүү байх болно" гэсэн байна. 2022 оны есдүгээр сард Украин тус эвсэлд гишүүнээр элсэх хүсэлтээ гаргасан. Хэдийгээр Зеленский “Дайны үед НАТО-д элсэх боломжгүй” гэж Гаагт тавдугаар сарын эхээр хүлээн зөвшөөрсөн ч "Гэхдээ энэ үед л бид дайны дараа НАТО-гийн гишүүн болно гэсэн маш тодорхой амлалт авахыг хүсч байна" гэж өөрийн байр сууриа илэрхийлсэн байдаг.
Эх сурвалж: DW
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.