С.Чинзориг: Юм л бол "Засгийн газрын гишүүн юу ч дуугарч болохгүй" гээд байж болохгүй

УИХ-ын өнөөдрийн хуралдаанаар Засгийн газраас өргөн барьсан Төсвийн хүрээний мэдэгдлийг хэлэлцэж байгаатай холбогдуулан УИХ-ын гишүүд Сангийн яамныхнаас асуулт асууж, хариулт авлаа.

УИХ-ын гишүүн, Эрүүл мэндийн сайд С.Чинзориг:

Төсвийн хүрээний мэдэгдэл ярьж байгаатай холбоотойгоор тодруулах хэдэн асуулт байна. Нэгт, хөдөө орон нутгийн иргэдээс “Арилжааны банкнаас зээл авах гэхээр заавал малыг индексжүүлсэн даатгалд хамрагд гээд шахаад байна. Энэ чинь сайн дурын даатгал биз дээ. Даатгалын дагуу нөхөн төлбөр авах гэхээр болдоггүй” гэх асуудал ярьсан. Мөн зах дээр жижиг бизнес эрхэлж байгаа иргэдийн хувьд, Татварын хуульд орсон өөрчлөлтөөр заавал тайлан гарга гэж шахаад байна. 50 сая хүрэхгүй байгаа борлуулалтын орлоготой иргэдэд тайлан гарга гэдгийг болиул гээд байх юм. Гуравт, арилжааны банкууд зээлийн график гаргахдаа үндсэн зээлийг хасахгүйгээр хүүг нь авдаг гэх утгатай зүйл ярьж байна. Дөрөвт, суманд байгаа 30-50 насны огт орлогогүй, ажилгүй иргэдийг ажилтай болгоход дэм болооч гээд байх юм. Энэ тухайд мэдээлэл өгөөч.

Сангийн сайд Б.Жавхлан:

УИХ-ын гишүүн, Засгийн газрын гишүүн, Эрүүл мэндийн сайд С.Чинзоригийн асуултад хариулья. Ойрдоо засгийн газрын хуралдаанаа та уг нь таслаагүй суугаад л байгаа шүү дээ. Та бид хоёр цуг энэ төсвийн хүрээний мэдэгдлийг өргөн барьсан. Таны асуусан асуултанд төсвийн хүрээний мэдэгдэлтэй холбоотой нэг ч зүйл алга. Та наад асуултандаа бүгдэнд нь өөрөө Засгийн газрын өмнөөс иргэд сонгогчиддоо хариулах бүрэн боломжтой.

 УИХ-ын гишүүн, Эрүүл мэндийн сайд С.Чинзориг:

Би Засгийн газрын гишүүнээ мэдэж байна. Засгийн газраас өргөн барьсан төслөө ч мэдэж байна. Тийм учраас төсвийн хүрээний мэдэгдэлтэй холбоотой юм асуух гээгүй. Засгийн газрын гишүүн ч гэсэн УИХ-ын гишүүний хувьд хөдөө орон нутгийн иргэд сонгогчдын ярьж байгааг уламжлах, Сангийн яамны бүрэлдэхүүн орж ирсэн учраас санал бодлоо илэрхийлэх эрхтэй. Юм л бол Засгийн газрын гишүүн юу ч дуугарч болохгүй гээд “Мянган үгний таглаа” гэгч байж болохгүй шүү дээ.