Иргэдэд хууль эрхзүйн үнэ төлбөргүй зөвлөгөө өгөх “Өмгөөлөгч- танд тусалъя 2023” өдөрлөг өчигдөр Сүхбаатарын талбайд боллоо. Нэг өдөр хуулийн мэдлэгийн талаар үнэ төлбөргүй зөвлөгөө авч, өөрт тохиолдоод буй маргаантай асуудлыг хуулийн байгууллагаар яаж шийдвэрлэхийг асууж тодруулна гэдэг олдохгүй боломж юм. Учир нь өмгөөллийн үйлчилгээ авах нь үнэ төлбөртэй байдаг. Тэгвэл өчигдөр төв талбайд өмгөөлөгчид, шүүхийн шийдвэр гүйцэтгэх байгууллагын алба хаагчид шүүхийн шинжээчид иргэдэд үнэ төлбөргүй үйлчиллээ. Гэвч иргэдийн идэвх оролцоо сул, хууль эрхзүйн мэдлэг мэдээлэл бага, дутуу дулимаг байгаа нь илт харагдаж байв. Тиймээс хэрэгцээтэй байгаа бүх төрлийн эрхзүйн мэдээллийг ойлгомжтой байдлаар туслалцаа үзүүлсэн юм.
Өмгөөлөгчдөөс зөвлөгөө авч байгаа иргэдийн олонх нь гэр бүлийн маргаан болон гэр бүлийн хүчирхийлэл, эд хөрөнгийн маргааны талаар зөвлөгөө авч байгаа харагдав. Мөн мөнгөний маргааны асуудлаар ч иргэд асууж зөвлөгөө авч байв.
Тодруулбал, хүнд гэрээ байгуулаагүй, дансаар мөнгө шилжүүлсэн. Гэвч мөнгөө авах ёстой хугацаандаа авч чадахгүй байгаа талаар өмгөөлөгчөөс зөвлөгөө авч байв. Хэдий итгэлцлээр хэрэгтэй үед нь мөнгө зээлүүлээд эргүүлээд тэрийг авч чадахгүй олон сар хоног болсон тохиолдолд хуулийн байгууллагад өргөдөл гомдол гаргаад өгч болох юм байна. Хамгийн гол нь мөнгө авсан зээлдэгчийн гэрийн хаяг, утасны дугаарыг нь тодорхой мэдэж байх ёстой гэдгийг өмгөөлөгч хэлэв.
Мөн нэгэн ахмад настай эрэгтэй одоогоос олон жилийн өмнө охиныхоо хүүхдийг хүнд үрчлүүлсэн юм. Үрчлүүлсэн ч гэж дээ, таньдаг хүндээ хүүхдийг нь өгчихсөн юм. Гэтэл одоо тэр хүүхдээ ээж нь эргүүлээд авах гэтэл цаад айл нь өгөхгүй байгаа. Тэгэхээр хүүхдээ буцааж авахын тулд хууль эрхзүйн хүрээнд хаана яаж хандах вэ? гэж асуув.
Түүнчлэн эд хөрөнгийн маргаан үүссэн байгаа асуудлаар ч нэг эмэгтэй хуульч өмгөөлөгчдөөс дэлгэрэнгүй зөвлөгөө авч байв. Төрсөн ах нь нас бараад 3 жил болсон. Гэвч нас барахаас нь өмнө салсан эхнэр хүүхдүүд нь хашаа байшинг нь хууль бусаар өөрсдийнхөө нэр дээр болгоод аваад бусдад зарчихсан байна. Одоо тэр зарсан болон худалдаж авсан айлтай нь маргаан үүсгэх гэсэн юм. Хаана хандах вэ? гэсэн олон асуултыг асууж байв.
Өмгөөлөгч Ц.Гансүх:Амьдрал дээр байгаа бүх асуудлыг хууль тогтоомжоор зохицуулдаг
Амьдрал дээр үүсэж байгаа бүх л асуудлыг хууль тогтоомжоор зохицуулдаг. Мэргэжлийн өмгөөлөгчөөс туслалцаа аваад мэдэх гэсэн зүйлээ асууж авч байна. Өнөөдрийн хувьд манай өмгөөлөгчид бүгд үнэ төлбөргүй дэлгэрэнгүй зөвлөгөө өгсөн. Өөрт үүсээд байгаа асуудлаа хуулийн байгууллагаар шийдвэрлүүлэх боломж бий. Өмгөөлөгчид үнэ төлбөртэй үйлчлэхээс гадна төлбөргүй үйлчлэх тохиолдол байна. Хуулийн компани аж ахуйн нэгжүүдэд хандаад асуудлаа шийдвэрлүүлэх боломжтой.
Б.Оюу-Эрдэнэ:Гэр бүлийн маргаан хүчирхийлэл болон гэрээний асуудлаар иргэд их хандлаа
Дашрамд дуулгахад, өмгөөллийн байгууллага үүсч хөгжөөд өнөө жил 95 жилийнхээ ойтой золгож байгаа ажээ. Өчигдрийн арга хэмжээнд нийтдээ хуулийн 12 байгууллага оролцсон. Хуулийн этгээдүүд ч идэвхтэй оролцсон. Гэр бүлийн маргаан болон гэрээтэй холбоотой асуудлаар иргэд их хандлаа.
Монголын өмгөөлөгчдийн холбоонд бүртгэлтэй 3000 гаруй өмгөөлөгч байдаг. Үүнээс улсын хэмжээнд идэвхтэй үйл ажиллагаа явуулдаг нь 2000 гаруй байна. Нийслэлийн хэмжээнд 85 хувь нь үйл ажиллагаа явуулж байна. Үлдсэн хувь нь орон нутагт байна.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.