Н.Учрал: 2021-2023 онд Улаанбаатар хотод олгосон ашиглах, эзэмших зориулалттай газрын мэдээллийг ил болголоо

ЦХХХ-ны сайд Н.Учрал Байгаль орчин, уур амьсгалын сан, Шинжлэх ухаан, технологийн сан, Гэмт хэргийн хохирогчид нөхөн төлбөр олгох сан, Кино урлагийг дэмжих сан, Хилийн чанадад байгаа Монгол Улсын иргэдэд туслах сангийн талаар мэдээлж байна. 

Тэрбээр мэдээлэлдээ "Нийтийн мэдээллийн ил тод байдлын тухай хуульд заасан 68 төрлийн мэдээллийг олон нийтэд нээлттэй ил тод болгож шилэн байдлаар иргэдийн хяналтад авчрах ажил хийгдэж байна. Монгол Улсын Ерөнхий сайд Л.Оюун-Эрдэнэ тусгай сангуудын үйл ажиллагаа, бүх мэдээллийг ил тод, шилэн болгохыг үүрэг болгож, албан даалгавар өгсөн.  Засгийн газрын 25 санг нээлттэй болгох ажлыг хийж хэрэгжүүлж байна.  Засгийн газрын тусгай сангуудыг Нийтийн мэдээллийн ил тод байдлын хуулийн дагуу тус сангуудын мэдээллийг машинд уншигдах байдлаар шилэн болгосон. Зургадугаар сарын 1-нд www.shilen.gov.mn -д нээлттэй мэдээллийг байршуулж дуусна. Өнөөдөр дараах санг нийтэд нээлттэй болгож байна. 

1. БОАЖЯ: Байгаль орчин, уур амьсгалын сан
2. БШУЯ: Шинжлэх ухаан, технологийн сан
3. ХЗДХЯ: Гэмт хэргийн хохирогчид нөхөн төлбөр олгох сан
4. Соёлын яам: Кино урлагийг дэмжих сан
5. ГХЯ: Хилийн чанадад байгаа Монгол Улсын иргэдэд туслах сан-2009 оноос хойшхи дата гэх таван сангийн мэдээллийг хүлээж аваад машинд уншигдах байдлаар нь инфографик байдалтайгаар хайлт хийх боломжтойгоор хүргүүлж байна.  

Өчигдөр ЦХХХЯ: Бүх нийтийн үйлчилгээний сан,  ЭМЯ: Эрүүл мэндийн даатгалын сан, Сангийн яам: Төсвийн тогтворжуулалтын сан, Засгийн газрын нөөц сан гэсэн 5 санг бидэнд ирүүлсэн. Зарим мэдээлэл нь тодорхойгүй, он сар байхгүй, эргэж төлөх нөхцөлтэй эсэх ойлгомжгүй мэдээллийг эксэл файлаар илгээсэн. Түүнийг нь холбож байгаа учир техникийн ажил хийж байгаа учраас цаг алдаж байна. Ирэх долоо хоногт олон нийтэд мэдээлнэ. БШУЯ-ны Мэргэжлийн боловсрол сургалтыг дэмжих сан, ЭМЯ-ны Эрүүл мэндийг дэмжих сан, Сангийн яамны Ирээдүйн өв сан дутуу мэдээлэл ирүүлсэн.  Спортыг дэмжих сан мэдээлэл ирүүлээгүй байна. ЦХХХЯ-ны Өргөн нэвтрүүлгийн сан, ХЗЯ-ны Архидан согтууралтай тэмцэх, урьдчилан сэргийлэхийг дэмжих сан, Зэвсэгт хүчний хөгжлийн сан гэсэн гурван сан үйл ажиллагаа явуулаагүй байна. 

Үүн дээр нэмээд 2021-2023 онд Улаанбаатар хотод олгосон ашиглах, эзэмших зориулалттай газрын мэдээллийг байршуулсан. Өнгөрсөн долоо хоногт 20 жилийн хотын дарга нарын газар олголтын мэдээллийг шилэн байршуулсан юм. Дүүргүүдийн үе үеийн засаг дарга нарын газар олголтын мэдээллийг бид шаардаж байгаа. Мөн нийслэлийн өмчийн оролцоотой 18 хуулийн этгээдийн 119 төлөөлөн удирдах зөвлөлийн гишүүдийг нэрс, цалингийн мэдээлэлтэй нь ил болгосон. гэлээ.