Ярилцлагадаа Украйны дайныг шүүмжилж байсан ОХУ-ын Шинжлэх ухааны дэд сайд Петр Кучеренко гэнэт нас баржээ.
Дэд сайд Оросын төлөөлөгчдийн хамт 5 дугаар сарын 20-нд Куба руу бизнес аялал хийгээд буцаж явахдаа онгоцонд бие нь гэнэт мууджээ. Онгоц Минеральные Воды-д ослын буулт хийж, орон нутгийн эмч нар түүнд туслахаар ажилласан ч Кучеренког аварч чадаагүй гэж ОХУ-ын Боловсрол, шинжлэх ухааны яамны цахим хуудсанд мэдээлжээ.
Урьдчилсан байдлаар Кучеренкогийн үхлийн шалтгаан нь зүрхний асуудлаас шалтгаалсан байна. Энэ тухай сайдын гэр бүлийн ойрын эх сурвалж “Звезда” сувагт мэдээлсэн байна. Түүний хэлснээр шүүх эмнэлгийн дүгнэлтийг удахгүй мэдээлэхээр төлөвлөжээ.
Оросын нэрт сэтгүүлч, баримтат кино найруулагч Роман Супер 2022 оны 2 дугаар сард Оросоос явахаасаа хэдхэн хоногийн өмнө Кучеренкотой албаных нь өрөөнд уулзаж байснаа дурсан ярьжээ.
Кучеренко тэр үед "Өөрийгөө болон гэр бүлээ авар. Аль болох хурдан яв. Та нартай манай төр хэр зэрэг харгис хэрцгий харьцахыг төсөөлж ч чадахгүй. Та Оросыг орхиж явах зөв шийдвэр гаргасан байна" гэж сануулж байсныг Роман Супер дурсан ярьжээ.
Мөн тэрээр антидепрессант, тайвшруулах эмийг "атга атгаар" уудаг ч энэ нь түүнд тус болохгүй байгаа тухайгаа хэлж байжээ. “Би бараг унтдаггүй. Надад бүх зүйл таагүй санагдаж байна. Бид бүгд барьцаалагдсан. Хэн ч юу ч хэлж чадахгүй” хэмээн ярьж байсныг дурджээ.
Тодотгоход, Петр Кучеренко 1977 онд Красноярскийн хязгаарт төрсөн бөгөөд хууль зүйн ухааны доктор, профессор цолтой хүн юм.
Эх сурвалж: The moskowtimes
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.