Өрнөдийн хориг арга хэмжээний эсрэг Бээжинтэй эдийн засгийн харилцаагаа өргөжүүлж, шинэ тусламж эрэлхийлэх үүрэг хүлээсэн Оросын засгийн газрын төлөөлөгчдийн Хятадад хийсэн айлчлал Ерөнхий сайд Михайл Мишустин болон түүний сайд нарын хувьд "хүйтэн шүршүүр" болон хувирав.
"Ведомости"-д мэдээлснээр, Хятадын засгийн газрын дээд албан тушаалтнууд болон Хятадын томоохон компаниудын топ менежерүүд бараг бүгдээрээ барууны хориг арга хэмжээний жагсаалтад багтсан Оросын өндөр албан тушаалтнууд болон төрийн өмчит компаниудын захирал нартай уулзахаас татгалзсан байна.
Түүнчлэн Москвагаас ОХУ-ын Ерөнхий сайдын дөрвөн орлогч сайд болон ХАА, тээврийн сайд болон "Северсталь", "Фосагро" нарын тэргүүн нар багтсан томоохон төлөөлөгчид Шанхай хотод айлчилжээ. Гэвч Хятадын тал тэдэнд тийм ч эелдэг байсангүй.
Түүнчлэн Хятадын Төрийн зөвлөлийн дарга Ли Цян Орос-Хятадын форумд оролцохоос татгалзаж, өөрийнхөө оронд Шадар сайд Хэ Лифэнийг мэндчилгээний хамт илгээжээ.
"Хятадууд халуун дотно боловч хориг арга хэмжээнээс маш их болгоомжилдог" гэж форумыг зохион байгуулагчдын ойрын эх сурвалж тайлбарлав. "Олон нийтийн өмнө үг хэлэхийг хүссэн, бэлэн байсан том бизнесменүүдйг ч гэсэн Оросын төлөөлөгчидтэй уулзахыг зөвшөөрөөгүй. Тэд өчүүхэн ч гэсэн эрсдэлд орохыг хүсэхгүй байна" гэжээ.
Гаднаас нь харахад Мишустины айлчлал сүртэй харагдаж байв. Шанхайн нисэх онгоцны буудлын улаан хивсэн дээгүүр алхаж, БНХАУ-ын дарга Ши Жиньпинтэй уулзаж, Владимир Путиний мэндчилгээг дамжуулж, Москва, Бээжин "бүх гол асуудлаар "санал нэгтэй" байгааг мэдэгдсэн.
Мишустин Москва, Бээжингийн харилцаа урьд өмнө байгаагүй өндөр түвшинд байна гээд Орос, Хятадын хил дамнасан төлбөр тооцооны бараг 70% нь юань, рублиэр хийгддэг бөгөөд оны эцэс гэхэд худалдааны эргэлт 200 тэрбум доллараас давна гэдгийг тодотгосон.
Ши Жиньпин Оросын ерөнхий сайдад "Хятад улс хоёр талын язгуур ашиг сонирхолд нийцсэн асуудлаар Оросыг тууштай дэмжихэд бэлэн байна" гэсэн даруухан хариу хэлсэн.
Украинд дайн эхэлсний дараа Хятад Оросын нефтийн худалдан авалтаа бараг хоёр дахин нэмэгдүүлж, өдөрт 2 сая баррель, нүүрсний импортыг 127%-иар, хөнгөн цагааныг 200%-иар тус тус нэмэгдүүлсэн. Гэсэн хэдий ч үр тарианы асуудал үүссэн. Хятадын нийт улаан буудайн импорт 60% -иар өссөн ч Оросын буудайн эзлэх хувь Австралиас 120 дахин, Канадынхаас 36 дахин бага байгаа юм.
"Оросын тариаланчид Хятадын зах зээлд бүтээгдэхүүнийхээ экспортыг мэдэгдэхүйц нэмэгдүүлэх, нийлүүлэх бараа бүтээгдэхүүний нэр төрлийг нэмэгдүүлэхэд бэлэн байна" гэж Мишустин санал болгов. Гэвч Ши Жиньпин энэ асуудалд ямар нэгэн хариу өгсөнгүй.
Оросын томоохон бизнес "Ведомости" сонинд ярилцлага өгөхдөө хятадуудтай хэлэлцээр хийх нь туйлын хэцүү гэжээ. “Хятадууд уламжлалт байдлаараа нарийн няхуур ханддаг ч хэлэлцээрийг ижил тэнцүү нөхцөлөөр хийхгүй байгаа нь тодорхой. Харамсалтай нь Орос жижигхэн түншийн үүрэг гүйцэтгэж байна” гэжээ.
Эх сурвалж: moscowtimes.
Сэтгэгдэл (0)
⚠ Анхаар!Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд Toim.mn хариуцлага хүлээхгүй.