АНУ-д залуусын 20 хувь нь өөрсдийгөө ЛГБТ гэж тодорхойлжээ

Америкийн залуучуудын дундах ижил хүйстнээ сонирхох чиг хандлагатай хүмүүсийн эзлэх хувь нь ахмад үеийнхээс 26 дахин нэмэгджээ.

Судалгааны “Gallup” байгууллага нь америкчуудын дунд санал асуулга явуулаад өөрсдийгөө “гей, лесби, бисекс, трансжендер чиг хандлагатай” гэж тодорхойлдог хүмүүсийн эзлэх хувь хамгийн өндөр буюу 7.1 хувь болсон тухай мэдээлжээ.

“Gallup” нь 2012 оноос эхлэн Америкийн нийгэм дэх хэвийн бус бэлгийн чиг хандлагатай хүмүүсийн эзлэх хувийг хэмжиж байгаа юм. Эхний удаад 2012 онд энэ хувь нь 3,5% байсан бол 2013- 3,6%, 2014 – 3,7%, 2015 – 3,9%, 2016 – 4,1%, 2017 – 4,5% байгаад 2020 – 5,6% болсон.

Ижил хүйстнээ сонирхох бэлгийн чиг хандлага ялангуяа америк залуусын дунд хамгийн өндөр болж таарчээ. Тодруулбал, “Z” үеийнхэн гэж нэрлэгддэг 1997-2003 онд төрж, насанд хүрсэн америк залуусын 20,8 хувь буюу таван хүн тутмын нэг нь өөрийгөө ЛГБТ давхаргад хамаардаг гэж тодорхойлжээ. Энэ бол 1946 оноос өмнө төрсөн америкчуудтай харьцуулахад ижил хүйстнүүдээ сонирхогчдын эзлэх хувь 26 дахин өссөн гэсэн үг.

Ингэхдээ ЛГБТ бүлэгт хамрах америкчуудын дунд бисекс харилцаа хамгийн түгээмэл болж таарсан, түүнд дотроо эмэгтэйчүүдийн дунд энэ чиг хандлага нь гурав дахин өндөр байжээ. Сонирхолтой нь, америк эмэгтэйчүүдийн 0.4 хувь нь өөрсдийгөө “гомосекс” чиг хандлагатай гэж тодорхойлсон бол америк эрэгтэйчүүдийн 0.1 хувь нь чиг хандлагаа “лесби” гэж тодорхойлсон байх юм.

Ийнхүү миленниал үеийнхэн дунд арван хүн тутмын нэг нь ижил хүйстнээ сонирхогч, Z үеийнхэн дунд таван хүн тутмын нэг нь бас адил ижил хүйстнээ сонирхогч байгаа тул ойрын ирээдүйд бэлгийн хэвийн бус чиг хандлагатай америкчуудын нийгэмд эзлэх хувь 10-аас давж гарна гэж энэхүү судалгааг явуулсан эрдэмтэд дүгнэжээ.