Улсынхаа нэр хүндэд сөргөөр хандсан, хүчирхийлэл, сэтгэцэд нөлөөт бодисыг сурталчилсан зэрэг төслийг Кино урлагийг дэмжих сан санхүүжүүлэхгүй

Кино урлагийг дэмжих сан нь Кино урлагийг хөгжүүлэх, кино үйлдвэрлэлийг дэмжих, уран бүтээлчдийг чадавхжуулах, кино бүтээлийг хадгалан хамгаалах, сэргээн засварлах, Монгол киног олон улсад сурталчлан таниулах зорилготой аж. Уг зорилгын хүрээнд 2022 оны есдүгээр сарын 21-ний өдрөөс аравдугаар сарын 21-ний хооронд нийт 67 төслийг хүлээн авч үүнээс 11 төсөлд санхүүжилтийг олгож эхэлсэн байна. Санхүүжилт олгосон төслүүдээс дурдвал кино найруулагч Б.Гарамхандын хүүхдийн сэдэвт гэр бүлийн кино "Алдагдсан өдрүүд” УСК, "Алтан өргөө олон улсын кино наадам", "Ю тийм" ХХК "Амира олон ангит хүүхэлдэйн кино" зэрэг уран бүтээл олон нийтэд хүрч эхлээд буй.

Харин 2023 оны сонгон шалгаруулалт нь нэг сарын хугацаанд явагдах ба зургаадугаар сарын 30-ны өдрөөр төсөл хүлээн авах хугацаа хаагдах юм.

"Кино урлагийг дэмжих сан"-гийн 2023 оны сонгон шалгаруулалт эхэлсэнтэй холбогдуулан Монголын Үндэсний кино урлагийн зөвлөлөөс дараах мэдээллийг өгөв.

МҮКУЗ-ийн гишүүн Н.Ганхуяг “Монголын кино мэргэжлийн болон сонирхогчдын гэсэн хочр түвшинд хийгдэж байна. Кино урлагийг дэмжих сан мэргэжлийн буюу өндөр ур чадвартай хийгдэх магадлалтай ирээдүйтэй киног дэмжинэ. Залуу ур чадвартай уран бүтээлчдийн багийг мэдээж дэмжиж ажиллана.

Харин Монгол Улсынхаа нэр хүндэд сөргөөр хандсан, монгол хүний үнэ цэнэ үнэлэмжийг бууруулсан, ахуй соёлоо гутаасан, байгаль ан амьтанд хүнлэг бусаар хандсан, бэлгийн гаж үйлдлийг дэмжсэн утга агуулга бүхий, архидалт тамхи, мансуурах бодисыг сурталчилсан гэхээсээ илүү харуулсан бүтээлийг дэмжихгүй. Мөн хүчирхийлэл түлхүү харуулсан төсөлд санхүүжилт олгохгүй. Гэхдээ уран бүтээлч ямар төрлийн бүтээл хийх нээлттэй, бид хориг саад тавиагүй. Харин кино хийдэг бүхэнд санхүүжилт олгохгүй. Сонгон шалгаруулалтад Кино урлагийн зөвлөлийн гишүүд шударга зарчимч байх үүднээс олон талаас нь хэлэлцэж байж дээрх төслүүдийг сонгосон” хэмээв.