Т.Сүхболд: “IHC” койнтой холбогдох хэргийг эрүүгийн хэргийн дугаар аваад шалгаж байгаа

Б.Идэр-Одыг Эрүүгийн цагдаагийн газраас Олон Улсын эрүүгийн цагдаагийн байгууллага болох Интерполын улаан хэсгийн хөх буланд эрэн сурвалжлуулах хүсэлтийг энэ оны хоёрдугаар сард өгч, зар байршуулсан талаар бид мэдээлсэн. Түүнийг өнгөрсөн хоёрдугаар сард Австрали улсаас АНУ руу явсан гэх мэдээлэл байгаа гэж ЭЦА-наас мэдээлсэн юм.

Тодруулбал, өнгөрсөн оны нэгдүгээр сарын сүүлчээс хойш цагдаагийн байгууллагаас "Их Бит" ХХК-ийн “IHC” койныг анхдагч зах зээлд гарган хөрөнгө татан төвлөрүүлсэн хэрэгт Б.Идэр-Од болон түүний хамтрагч нарыг холбогдуулан шалгаж эхэлжээ.

Хууль зүй, дотоод хэргийн яамнаас Шувуу ажиллагаа"-ны хүрээнд мэдээлэл өгөх үеэр Эрүүгийн цагдаагийн албаны дарга, цагдаагийн хурандаа Т.Сүхболд “Койны асуудал дээр Цагдаагийн байгууллагаас ажлын хэсэг байгуулагдаад ажиллаж байгаа. Санхүүгийн зохицуулах хорооноос 26 койныг эрсдэлтэй гэж үзсэн. Үүнийг гэмт хэргийн шинжтэй байна гэж үзэн хэрэг бүртгэлтийн хэрэг нээж шалгасан. Үүнээс хоёр койны асуудлыг гэмт хэргийн үндэслэл бүхий нотлох баримттай байна гээд яллагдагчаар татах саналаа прокурорын байгууллагад гаргасан.

Хоёр койнд холбогдох гэмт хэрэг нь анхдагч зах зээлээс мөнгө цуглуулаад хоёрдогч зах зээл рүү буюу токен болгож гаргалгүйгээр иргэдэд тараасан. Энэ нь шинжээчийн дүгнэлтээр тогтоогдож, гэмт хэргийн үндэслэлгүй гэж үзээд хаасан юм. Үлдсэн 22 койны иргэдтэй холбоотой хэрэг дээр мөрдөн шалгах ажиллагаа явуулж байна.

Комедиан Б.Идэр-Одыг Интерполын хөх буланд эрэн сурвалжилж байгаа. Хөх буланд гэдэг хаа байгаа хаягийг нь тогтоох, мэдээллийг нь бидэнд илгээх эрэн сурвалжлах ажиллагаа. Шалгах шаардлагатай зүйл бий. Түүнийг койны хэргээр шалгаж байгаа.

Надад мөрдөн шалгах ажиллагааны нарийн талаар ярих эрх байхгүй. Харин “IHC” койнтой холбоотой этгээдүүдтэй холбогдох гэмт хэрэг нь прокурорын байгууллагад Эрүүгийн цагдаагийн газраас яллагдагчаар татах санал өгөөд, эрүүгийн хэргийн дугаар аваад шалгагдаж байгаа хэрэг" гэв.