Хүүхдийн спортын зуны VII наадамд 7000 гаруй тамирчин өрсөлдөнө гэж тооцоолжээ

Хүүхдийн спортын зуны VII наадмыг Баянхонгор аймагт зургаадугаар сарын 19-29 ны өдрүүдэд зохион байгуулна. Тэмцээн чөлөөт бөх, жүдо бөх, бокс, сагсан бөмбөг, сагсан бөмбөгийн 3х3, уран сайхны гимнастик, хөлбөмбөг, шатар, усан сэлэлт, крикет, буудлага, хүндийн өргөлт, волейбол, самбо бөх, уулын дугуй, ширээний теннис, байт харваа, гандбол, таеквондо, спорт бүжиг гэх 23 төрөлтөд зохион явуулах юм.

Тэмцээнийг зохион байгуулах аймаг 14 заал танхим, талбайг наадамд зориулан төлөвлөсөн аж. Одоогоор 7000 гаруй тамирчин өрсөлдөнө гэсэн судалгаа гарчээ.

Тэмцээний бэлгэдлийг Монгол Улсын нэн ховор амьтан Мазаалай төлөөлж, хүүхдийн спортын наадмын бэлгэ тэмдэг Галхүү дагалдах аж. Монгол Улсын хүүхдийн спортын олимп гэгддэг спортын наадамд Монгол Улсын засгийн газар, Олимп нийтийн биеийн тамир спортын үндэсний хороо, Биеийн тамир спортын улсын хороо, Баянхонгор аймгийн Засаг даргын тамгын газар, БТСХ нэгдэн ажиллаж байна.

Баянхонгор аймгийн Биеийн тамир спортын газрын дарга Б.Оюунбаатар

-2022 оны есдүгээр сард Баянхонгор аймаг ИТХ-аараа хэлэлцээд Монголын хүүхдийн спортын зуны наадмыг зохион байгуулах тухай хүсэлтээ Монгол Улсын Засгийн газар, Биеийн тамир, спортын улсын хороонд өргөн мэдүүлсэн. Ингээд спортын төрөлжсөн наадмыг зохион байгуулах боломж нөхцөлийн судалгаа, шалгаруулалтыг БТСУХ-оос явуулж улмаар аймаг сонгогдсон. Он гарсаар тус наадмын бэлтгэл ажилд Баянхонгорчууд бүх нийтээрээ оролцож, тус арга хэмжээг өндөр түвшинд зохион байгуулахаар ажиллаж байна.

Баянхонгор аймгийн Засаг дарга Д.Мөнхсайхан:

-Хүүхдийн спортын наадмыг Баянхонгор аймаг эрхийг авснаар зохион байгуулах комиссыг томилон, 11 дэд ажлын хэсгийг байгуулан бэлтгэл ажлуудаа өнөөдрийн байдлаар 80 гаруй хувьтай хангаж байна. Тус наадмын бэлтгэл ажилд төр, хувийн хэвшил, сайн дурын, хүүхэд багачуудын зэргээр 5000 орчим хүн оролцож байна. Баянхонгор аймаг Мазаалай баавгайг энэ наадмын бэлгэдлээр сонгосон нь дэлхийд нэн ховордсон бидний нутаг дэвсгэр дээр цөөн тоогоор амьдардаг говийн баавгайг хамгаалахад бүх нийтийн анхаарлыг хандуулах үүднээс сонгосон. Хоорондоо нөхөрлөж, хамтдаа хөгжиж, байгаль дэлхийгээ хамтдаа хайрлан хамгаалахын тухайд "Нөхөрлөе, хөгжье, хамгаалъя уриаг дэвшүүлэн "хог биш ээ мөнгө" челленжийг эхлүүлээд явж байна. Эх орны өнцөг булан бүрээс цуглах тамирчин хүүхэд багачуудынхаа аюулгүй байдлыг бүрэн хэмжээнд хамгаалах үүднээс тодорхой төлөвлөлтийг хийн ажиллаж байна.

Баянхонгор аймгийн Баян-Овоо сумын харьяат, МУ-ын Хөдөлмөрийн баатар М.Уранцэцэг

-Миний хувьд 2019 онд Хүүхдийн их наадмыг тугийг өргөж, бамбар асааж байсан. Өмнө нь Хүүхдийн спортын зуны наадмыг Улаанбаатар хотод зургаан удаа зохион байгуулсан. Хөдөө орон нутагт хүүхдийн наадам зохион байгаагаараа юугаараа онцлогтой вэ гэвэл, хүүхдүүдийн спортын мэдлэг нэмэгдэнэ. Хүүхдүүд өсвөр насандаа спортын онцлогийг мэдэж, өөрийн хүсэл сонирхлоороо түүндээ татагдаг. Ийнхүү олон спортын дундаас аль нэгийг нь сонгон хичээллэж, цаашлаад дэлхийн тавцанд гарах болов уу. Мөн орон нутагт бүтээн байгуулалтын ажил ид өрнөж байгаа.