Б.Чойжилсүрэн: Дэлхий нийтийн чиг хандлагатай хөл нийлүүлж чадахгүй байгаа нь үнэн

УИХ-ын өнөөдрийн чуулганаар Аж ахуйн нэгжийн орлогын албан татварын тухай хуульд нэмэлт өөрчлөлт оруулах тухай хуулийн төсөл, Гаалийн тариф, гаалийн татварын тухай хуульд нэмэлт өөрчлөлт оруулах тухай хуулийн төсөл, Монгол Улсын нэгдсэн төсвийн 2023 оны төсвийн хүрээний мэдэгдэл, 2024-2025 оны төсвийн төсөөллийн тухай хуульд нэмэлт өөрчлөлт оруулах тухай хуулийн төсөл, 2023 оны төсвийн төсөлд өөрчлөлт оруулах тухай зэрэг 11 асуудлыг хэлэлцэхээр төлөвлөөд байна.

Аж ахуйн нэгжийн орлогын албан татварын тухай хуульд нэмэлт өөрчлөлт оруулах тухай хуулийн төсөл,  Гаалийн тариф, гаалийн татварын тухай хуульд нэмэлт өөрчлөлт оруулах тухай хуулийн төсөлд эрчим хүчний эх үүсвэрийг нэмэгдүүлэх, шинээр барих, гаалийн татвараас чөлөөлөх асуудлыг тусгасан байна. Энэ асуудлыг хүрээнд УИХ-ын гишүүд холбогдох албаныханд асуулт тавив.

УИХ-ын гишүүн Т.Энхтүвшин : Дутагдаж байгаа эрчим хүчний эх үүсвэрээ нөхөхийн тулд, Сэргээгдэх эрчим хүчний бодлогоо тодорхой болгож, хуульд ямар өөрчлөлт оруулах шаардлагатай байна? Сэргээгдэх эрчим хүчний салбарт хөрөнгө оруулалт татах, хууль эрхзүйн орчинг таатай болгох тал дээр ямар ажлууд хийж байна вэ?

Эрчим хүчний сайд Б.Чойжилсүрэн: Сэргээгдэх эрчим хүчний тухай хууль 2007 онд анх батлагдсан бөгөөд 2019 онд өөрчлөлт орсон.  Энэ өөрчлөлтөөр тендерийн тухай хуулийн дагуу аль хямд үнэ санал болгосон оролцогчийг шалгаруулдаг.

Одоо төвийн эрчим хүчний системд холбогдсон нарны 3, салхины 6 станц байна. Өнгөрсөн хугацаанд аж ахуйн нэгжүүдэд 38 тусгай зөвшөөрөл өгснөөс одоо хүчинтэй байгаа нь 11. Сэргээгдэх эрчим хүч тэр тусмаа нар, салхины эрчим хүчийг дэмжихэд төвийн эрчим хүчний системд хоёр хүндрэл байна. Эхнийх нь техникийн хүндрэл. Нар орох, салхи зогссон тохиолдолд тухайн чадлаа нөөцөлж чадахгүй байна. Хоёрдугаарт, төвийн эрчим хүчний системд холбогдсон 9, холбогдох гэж байгаа 11 аж ахуйн нэгжийн сэргээгдэх эрчим хүчний үнэ асар өндөр байгаа. Нарных 15-19 цент, салхиных 9.4-9.5 центийн үнэтэй байна. Төвийн эрчим хүчний системд энэ үнээр худалдан авах нь санхүүгийн хүндрэлтэй өнөөгийн нөхцөлд боломжгүй байна. Усан цахилгаан станцууд ашиглалтад орчихвол нар салхины сэргээгдэх эрчим хүчийг нэмэх бололцоо үүснэ. Тиймээс яг өнөөдрийн байдлаар дэлхий нийтийн чиг хандлагатай хөл нийлүүлж чадахгүй байгаа нь үнэн. Тохируулга, чадал захиалгын асуудлаа шийдсэний дараа хямдхан сэргээгдэх эрчим хүч холбох бодлогууд гаргана.