АТҮТ-тийн дэд захирал асан Х.Баярхүүд холбогдох хэргийг нэмэлт мөрдөн байцаалтад буцаахаар шийдвэрлэв

Нийслэлийн прокурорын газрын хяналтын прокурорын яллах дүгнэлтээр Автотээврийн үндэсний төвийн дэд захирлаар ажиллаж байсан гэх яллагдагч Х.Баярхүү, Автотээврийн үндэсний төвийн Увс аймаг дахь салбарын дарга У.Золбоо, тус салбарын инженер Б.Адьяа, техникч Б.Бат-Оргил нарыг бүлэглэн, 2018 оны 08 дугаар сарын 06-наас 2019 оны 4 дүгээр сарын 14-ний хооронд тус тус 3 удаагийн үйлдлээр нэр бүхий дөрвөн ХХК-ийн эзэмшлийн 300 гаруй хүнд даацын тээврийн хэрэгсэл, мөн тооны чиргүүлийг техникийн хяналтын улсын үзлэгт оруулахгүйгээр АТҮТ-ийн Увс аймаг дахь салбарын мэдээллийн санд техникийн үзлэгт оруулж “тэнцсэн” мэтээр хуурамч мэдээлэл оруулж, бусдад давуу байдал бий болгосон гэх хэрэгт яллаж, Эрүүгийн хуулийн ерөнхий ангийн холбогдох заалтуудыг журамлан мөн хуулийн тусгай ангийн 22.1 дүгээр зүйлийн 1 дэх хэсэгт заасан гэмт хэргээр зүйлчлэн хэргийг гэм буруугийн шүүх хуралдаанаар хэлэлцүүлэхээр шүүхэд шилжүүлжээ.

Яллагдагч Х.Баярхүү мөрдөн байцаалтын шатанд “Өмнөговь аймагт байгаа 600 гаруй хүнд даацын тээврийн хэрэгсэл, чиргүүлүүдийг Увс аймгийн Автотээврийн төвд техникийн хяналтын улсын үзлэгт оруулахгүйгээр тэнцүүлж өгөөч гэх хүсэлтийг надад гэрч Б.Урьхан, Д.Равдандорж нар тавьж, улмаар 600 гаруй тээврийн хэрэгслийн улсын дугаар болон бусад холбогдох мэдээллийг тусгасан жагсаалтыг фейсбүүкийн мессэнжер чатаар надруу явуулсан” гэж мэдүүлсэн байна.

Яллагдагч, Автотээврийн үндэсний төвийн дэд захирал, асан Х.Баярхүүгийн дээрх мэдүүлгээс үзэхэд гэрч Б.Урьхан, Д.Равдандорж нар нь уг гэмт хэрэгт хамтран оролцсон байж болзошгүй байх тул нэмэлт ажиллагаагаар АТҮТ-ийн Увс аймаг дахь салбарт техникийн улсын үзлэгт оруулахгүйгээр хууль бусаар тэнцүүлсэн гэх 600 гаруй тээврийн хэрэгсэл болон чиргүүлийн улсын дугаар, бусад холбогдох үзүүлэлт бүхий жагсаалтыг яллагдагч Х.Баярхүүд явуулсан гэх гэрч Б.Урьхан, Д.Равдандорж нарыг гэмт хэрэгт хамтран оролцсон эсэх, тэдгээр нь гэмт хэрэг үйлдэхийг санаачилсан, удирдсан, төлөвлөсөн эсэх, урьдчилан амалж, бусдыг гэмт хэрэг үйлдэхэд санаатай дэмжлэг үзүүлсэн эсэх, эсхүл бусдыг санаатай гэмт хэрэг үйлдэхэд хөлсөлсөн, гэмт хэрэг үйлдэхэд зориуд хүргэсэн эсэхийг нарийвчлан шалгаж, яллагдагч Х.Баярхүү, гэрч Б.Урьхан, Д.Равдандорж нарын санаа, зорилгын нэгдэл, оролцоо тус бүрийг тогтоох ажиллагааг гүйцэтгүүлэх нь зүйтэй.

Түүнчлэн “Өмнөговь аймагт байгаа олон тооны хүнд даацын автомашин, чиргүүлүүдийг АТҮТ-ийн Увс аймаг дахь салбарт техникийн үзлэгт оруулахгүйгээр хуурамчаар тэнцүүлсэн” гэх гэмт хэргийн шалтгаан, нөхцлийг тогтоохын тулд яллагдагч Х.Баярхүү, У.Золбоо, Б.Адьяа, Б.Бат-Оргил, гэрч Б.Урьхан, Д.Равдандорж нар болон нэр бүхий 4 компанийн дансны мэдээлэлд /гэмт хэрэг үйлдэгдсэн гэх цаг хугацаанд/ үзлэг хийж, ач холбогдол бүхий нөхцөл байдал илэрвэл холбогдох хэсгийг нь хэрэгт нотлох баримтаар бэхжүүлэх ажиллагааг гүйцэтгүүлэх нь хэргийг шийдвэрлэхэд хамааралтай, ач холбогдолтой.

Прокурорын яллах дүгнэлтээр яллагдагч Автотээврийн үндэсний төвийн дэд захирлаар ажиллаж байсан гэх яллагдагч Х.Баярхүү, Автотээврийн үндэсний төвийн Увс аймаг дахь салбарын дарга У.Золбоо, тус салбарын инженер Б.Адьяа, техникч Б.Бат-Оргил нарыг бүлэглэн, 2018 оны 8 дугаар сарын 6-наас 8-ны өдрийн хооронд " Сантээвэр групп" ХХК-ий эзэмшлийн 110 автомашин, 112 чиргүүл,

-2018 оны 10 дугаар сарын 13-наас 14-ний өдрийн хооронд "Ульгансар транс" ХХК-ийн эзэмшлийн 100 автомашин, 100 чиргүүл,

-2019 оны 4 дүгээр сарын 14-ний өдөр "Тэнгри транс" ХХК-ийн эзэмшлийн 3 автомашин, 3 чиргүүл, "Баянговь транс" ХХК-ийн эзэмшлийн 9 автомашин, 9 чиргүүл, "Ульгансар групп" ХХК-ийн эзэмшлийн 102 автомашин, 102 чиргүүлийг тус тус техникийн хяналтын улсын үзлэгт оруулахгүйгээр Авто тээврийн үндэсний төв төрийн өмчит үйлдвэрийн газрын Увс аймгийн салбарын мэдээллийн санд техникийн үзлэгт оруулж тэнцсэн мэтээр хуурамч мэдээлэл оруулж, бусдад давуу байдал бий болгосон гэж ялласан байх тул дээрх олон тооны хүнд даацын автомашин, чиргүүлүүдийг техникийн хяналтын улсын үзлэгт оруулахгүйгээр АТҮТ-ийн Увс аймгийн салбарын мэдээллийн санд хуурамч мэдээлэл оруулж, тэнцүүлснээр тухайн тээврийн хэрэгслүүд нь “Улс хоорондын байнгын ачаа тээвэрлэлт гүйцэтгэх “С” төрлийн зөвшөөрөл авсан эсэх, зөвшөөрөл авсан бол Өмнөговь аймгийн Цогтцэций сумын нутаг дахь “Эрдэнэс Таван толгой” ХХК-ийн уурхайгаас Гашуунсухайт-Бүгд Найрамдах Хятад Ард улсын Ганц модны боомтын чиглэлд ачаа (нүүрс) тээвэрлэсэн эсэх, хэрэв тээвэрлэсэн бол гэмт хэрэг үйлдэгдсэн гэх цаг хугацаанд дээр дурдсан 4 компанийн 324 хүнд даацын автомашин, 326 чиргүүлээр хэдэн удаа, хэдэн тонн ачаа (нүүрс) тээвэрлэж, "Сантээвэр групп" ХХК, "Ульгансар групп" ХХК, “Тэнгри транс групп” ХХК, "Баянговь групп" ХХК-нь хэр хэмжээний ашиг олж, тэдгээр компаниудад эдийн засгийн ямар давуу байдал бий болсон, гэмт хэргийн улмаас Эрүүгийн хуулиар хамгаалагдсан хэний, ямар эрх, хууль ёсны ашиг сонирхол хөндөгдөж, хүн, хуулийн этгээд эсхүл нийтийн болон үндэсний ашиг сонирхолд хохирол, хор уршиг учирсан эсэхийг тогтоолгох нь зүйтэй.

Нөгөөтэйгүүр Автотээврийн үндэсний төвийн дэд захирлаар ажиллаж байсан гэх яллагдагч Х.Баярхүү, Автотээврийн үндэсний төвийн Увс аймаг дахь салбарын дарга У.Золбоо, инженер Б.Адьяа, техникч Б.Бат-Оргил нарын дээр дурдсан үйлдлийн улмаас "Сантээвэр групп" ХХК, "Ульгансар групп" ХХК, “Тэнгри транс ” ХХК, "Баянговь транс" ХХК-д эдийн болон эдийн бус ашигтай байдал бий болсон эсэхийг нэмэлт мөрдөн шалгах ажиллагаагаар нарийвчлан тогтоосны дараа нэр бүхий 4 компанийн хууль ёсны өмчлөгч нарыг албан ёсны баримт бичгийг нь үндэслэн тогтоож, тэдгээрийг иргэний хариуцагчаар татах эсэх асуудлыг шийдвэрлэж, эрүүгийн хэрэг хянан шийдвэрлэх ажиллагааг нэг мөр хэрэгжүүлэх нь зүйтэй гэж үзсэн болно.

Ийм байдлаар яллагдагч Автотээврийн үндэсний төвийн дэд захирлаар ажиллаж байсан гэх яллагдагч Х.Баярхүү, Автотээврийн үндэсний төвийн Увс аймаг дахь салбарын дарга У.Золбоо, инженер Б.Адьяа, техникч Б.Бат-Оргил нарын холбогдсон гэмт хэргийн шалтгаан нөхцөл, гэмт хэргийн улмаас учирсан хохирол, хор уршгийн хэр хэмжээ, гэмт хэргийн улмаас хууль бусаар олсон хөрөнгө орлого, гэмт хэрэгт хамтран оролцогчдын үйлдэл, оролцоо тус бүрийг нарийвчлан тогтоох зэргээр Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолвол зохих асуудлуудыг болон хэргийн бодит байдлыг бүрэн гүйцэд тогтоолгохоор нэмэлт мөрдөн байцаалтад буцааж шийдвэрлэсэн бөгөөд дээрх ажиллагаануудыг шүүх хуралдаанаар нөхөн гүйцэтгэх боломжгүй гэж шүүх үзсэн байна.