Украины арми бие бүрэлдэхүүнээ сая хүртэл цэргээр нэмэгдүүлжээ

Украин улс сөрөг довтолгоонд оролцох арми, Үндэсний гвардийн 20 шинэ бригадыг бэлтгэж, нийт зэвсэгт хүчнийхээ тоог 700,000-д хүргэсэн гэж Оросын армийнхан тооцоолсон байна. Энэ тухай "Блүүмберг" Оросын Батлан ​​хамгаалах яамны ойрын хүнээс иш татан мэдээлжээ.

Дөрөвдүгээр сарын эхээр Украин сөрөг довтолгоонд 8 дивизээс бүрдсэн 40,000 дайчдыг бэлтгэсэн гэж мэдээлж байсан юм. Түүнчлэн тус улсын удирдагчид, тэр дундаа Володимир Зеленский барууны зэвсэглэл илүү их хэрэгтэй байгааг удаа дараа дурдаж байв. Харин Ерөнхийлөгч 6-р сарын 3-нд  "The Wall Street Journal" сэтгүүлд өгсөн ярилцлагадаа сөрөг довтолгооны талаар: "Энэ нь хэр удаан үргэлжлэх, ямар үнэ төлөхийг би мэдэхгүй. Гэхдээ бид бэлэн байна" гэж байв. Үүний зэрэгцээ "Украин үүнд маш сайн бэлтгэсэн" гэж АНУ-ын Штабын дарга нарын нэгдсэн хорооны дарга Марк Милли мөн CNN-д ярьсан юм.

10-р сар хүртэл Украинд ахиц дэвшил гаргах хугацаа байгаа гэж Москва үзэж байна. Гол цохилт нь тус улсын зүүн өмнөд хэсэгт орших Запорожье муж байх бөгөөд, өмнөд зүг хөдөлж, эцэст нь Крымд хүрэхийг оролдох болно гэж Bloomberg-ийн эх сурвалж хэлэв. 

НАТО-гийн өндөр албан тушаалтан Днеприйн чиглэлийг хоёрдугаар фронт болгон ашиглах талаар хийсэн Оросын дүгнэлтийг баталжээ. Хэрэв энэ төлөвлөгөө үнэн байсан бол харамсалтай нь үерийн улмаас ойрын ирээдүйд голыг гатлах боломжгүй болоод байгаа юм.

Фронтын шугамыг багасгах нь Орост ашигтай, учир нь энэ нь Украины цэргүүдэд амжилт олохоос сэргийлж хүчний төвлөрлийг хөнгөвчлөх болно гэж АНУ-ын цэргийн шинжээч Роб Ли хэлэв. "Хэрэв Херсоны ойролцоо Украины ажиллагаа явуулах магадлал одоо багасвал Оросууд зүүн тийш нь илүү их хүчээ шилжүүлэх боломжтой болно" гэж Financial Times сонин иш татжээ.

“Усан цахилгаан станцыг дэлбэлснээр сөрөг довтолгоонд нөлөөлнө гэж би бодохгүй байна, харин түүний зорилго нь Украины улс орноо чөлөөлөх хүчин чармайлтаа үргэлжлүүлэх бэлэн байдалд нөлөөлнө гэж би бодож байна. Энэ бол эсрэг довтолгоог өөдрөгөөр харж байгаа энэ үед украинчуудыг айлган сүрдүүлэх гэсэн оролдлого юм” гэж Америкийн судалгааны хүрээлэнгийн ахлах ажилтан Элизабет Бро хэлэв.

 Украины довтолгоог няцаах, фронтод мухардмал байдлыг бий болгохын тулд ОХУ агаарын орон зайд давуу байдлаа хадгалж, хангалттай хүн хүчтэй байх ёстой гэж ОХУ-ын Батлан ​​хамгаалах яаманд ойр эх сурвалж хэлжээ.

Дашрамд дурдахад Орос улс өнөөдрийг хүртэл Агаарын цэргийн хүчийг амжилттай ашиглаж чадаагүй. Харин эсрэгээрээ Украин агаарын довтолгооноос хамгаалах системийг үр дүнтэй ашиглан нутаг дэвсгэрээсээ тэднийг хөөж гаргасан гэж Британийн Хатан хааны нэгдсэн батлан ​​хамгаалах судалгааны хүрээлэнгийн мэргэжилтнүүд тэмдэглэжээ.

Гэвч довтолгооны үеэр нөхцөл байдал өөрчлөгдөж магадгүй, учир нь Оросын нисэх онгоцууд өөрсдийн нутаг дэвсгэрээс Украйны цэргүүдэд цохилт өгөх боломжтой бөгөөд агаарын довтолгооноос хамгаалах систем, онгоц ашиглан тэдэнтэй тулалдах нь илүү хэцүү байх болно гэж анхааруулав. 

Оросын батлан ​​​​хамгаалахын хувьд одоо хүн хүчний боломжийн нөөц бүрэлдэхүүнтэй байгаа хэдий ч цэргийн ангиудад ихэвчлэн бэлтгэл муутай дайчид олон байгаа юм.

Тодотгоход, Оросын "Вагнер" хөлсний цэргийн ангийг үндэслэгч Пригожин саяхан хэвлэлд ярихдаа Украинд явуулж буй тусгай ажиллагаа зорилгодоо хүрч чадаагүй, харин ч эсрэгээрээ 40 мянган хүнтэй байсан Украины армийн бие бүрэлдэхүүнийг сая орчим цэргийн албан хаагчтай болтол нь нэмэгдүүллээ хэмээн шүүмжилсэн юм.

Эх сурвалж: Мoscowtimes.ru