Гарааш буулгаж чөлөөлсөн газарт их багтаамжийн зогсоол нэртэй 7-11 давхар үйлчилгээний барилга барихаар төлөвлөжээ

Нийтийн эзэмшлийн гараашийг буулгаж газар чөлөөлж явган хүний зам, дугуйн зам, их багтаамжийн автомашины зогсоол бүхий тохижилт хийнэ гэж мэдээлж байсан. 

Гэтэл чөлөөлсөн газартаа доороо машины зогсоолтой, 7-11 давхар үйлчилгээний барилга барихаар төлөвлөсөн хэмээн НИТХ-д хэлэлцэхээр танилцуулав.  

Тодруулбал, Сүхбаатар дүүргийн 2 дугаар хороонд “Монгол Шаазан” ХХК-ийн баруун талын гараашуудыг буулгаж 4 давхар, зоорьтой, 184 автомашины багтаамжтай авто зогсоол барихаар төлөвлөсөн байна. Мөн 7-р хороонд 2-р сургуулийн хойд талд 7 давхар, зоорьтой 301 автомашины багтаамжтай нийтийн эзэмшлийн давхар авто зогсоол барих болжээ. 

Гэвч төлөөлөгчид энэхүү асуудлыг хойшлуулах санал гаргалаа. Учир нь сонгосон хоёр байршлын талаарх танилцуулга бүрэн ирээгүй, иргэдийн саналыг аваагүй, гарааш буулгаж чөлөөлсөн газарт авто зогсоол барихын сацуу үйлчилгээний төвийн барилга барих асуудлыг хамт оруулж ирсэн зэрэг асуудлаар байр сууриа илэрхийлсэн юм.

Х.Болормаа: Муу муухайгаар хэлүүлж гарааш буулгаж чөлөөлсөн газруудад барилга барих гэж байна. Иргэдтэйгээ нийлж эсэргүүцнэ шүү

Төлөөлөгч Х.Болормаа: Гарааш чөлөөлөх үйл явц маш хүнд явж байгаа. Сүхбаатар дүүрэгт 2023 онд 215 гараж чөлөөлсөн. Одоо чөлөөлөх захирамжид орсон энэ байршлууд дээр үл ойлголцох байдал үүссэн. Муу муухайгаар хэлүүлж гарааш буулгаж газар чөлөөлсөн. Гэтэл хотын А бүсийн чөлөөлсөн газруудад барилга барих гэж байна. Гараашаа чөлөөлсөн болон чөлөөлөх ёстой иргэд энэ талбай дээр буюу А зэрэглэлийн газарт барилга барих гэж байгааг эсэргүүцэнэ. “Монгол Шаазан” ХХК-ийн баруун талын газарт 7 давхар обьект барих боломжтой юм бол эдгээр байршил дээр ард иргэдэд нэн шаардлагатай зүйлээ баръя. Иргэдтэйгээ нийлж эсэргүүцнэ шүү албан ёсоор энд хэлье.

Г.Гангамөрөн: Түгжрэл бууруулна гээд иргэдийн гараашийг буулгасан газарт яагаад 7-11 давхар барилга байгууламж барихаар болов

Төлөөлөгч Г.Гангамөрөн: Нарийвчилсан судалгаагүй, хэрэгжүүлэх гэж байгаа ажлыг тухайн дүүргийн Засаг дарга нь дэмжихгүй гэж хэллээ. Энэ зогсоол чинь түгжрэл шийдэх биш харин ч үйлчилгээний төв болон бусад барилга байгууламжтай төвлөрөл үүсчих юм биш үү. Их багтаамжийн зогсоол нэртэй 7-11 давхар барилга болоод явчихлаа. Хэдэн иргэдээс санал авав, төвлөрлийг хэдэн хувиар бууруулах талаарх судалгаагүй ийм түүхий асуудлыг хэлэлцээд цааш явмааргүй байна. Иргэд бухимдаж байгаа нь энэ асуудлаас л болсон юм байна шүү дээ. Бухимдалгүй яах вэ, бухимдаад  бүгдийнх нь хувцас руу янз бүрийн юм цацаад зогсож байна шүү дээ. Энэ бол иргэдээс санал аваагүй, судалгаа хийгдээгүй гэдгийг нотолж байгаа зүйл байна.