Украины дайнд 9 мянган энгийн иргэн амиа алдсаныг НҮБ баталжээ

Украинд Оросууд түрэмгийлж эхэлснээс хойш наад зах нь 9177 энгийн иргэн амь үрэгдсэний 535 нь хүүхэд байна гэж НҮБ-ын Хүний эрхийн дээд комиссарын газрын тайланд дурджээ.

Амиа алдагсдын 4202 нь эрэгтэй, 2506 нь эмэгтэй, 225 нь охид, 281 нь хөвгүүд байна.  Мөн хүйс нь тодорхойгүй байгаа 29 хүүхэд, 1934 насанд хүрсэн хүн байна. Түүнчлэн 15993  энгийн иргэд шархадсан байгаагийн 1095 нь хүүхэд байжээ. Хэрэв дайны хөлд амь үрэгдсэн болон шархадсан энгийн иргэдийг  хамтатган тооцвол 25170  хүрчээ.

Украйнд амь үрэгдэгсдийн бодит тоо харьцангуй өндөр байгаа бөгөөд олон мэдээлэл батлагдаагүй байгаа гэдгийг НҮБ-аас онцолж байна. Тэгэхээр бодит байдал дээр амь үрэгдсэн болон шархадсан хүмүүсийн тоо дээр дурдснаас ч өндөр байх магадлалтай юм. Тухайлбал, НҮБ  Орост эзлэгдсэн Мариуполь (Донецк муж), Лисичанск, Попасна, Северодонецк (Луганск муж) зэрэг хотуудаас одоог хүртэл үнэн зөв мэдээлэл авч чадахгүй байна.

Үүний зэрэгцээ ОХУ-д 58 энгийн иргэн амиа алдсаны дотор гурван хүүхэд байна. Мөн 229 хүн шархадсан талаарх мэдээллийг НҮБ-ын Хүний эрхийн дээд комиссарын газар баталжээ.

Уг тайланд дурдсанаар, 2023 оны 5-6 дугаар сард амь үрэгдсэн энгийн иргэдийн тоо сард дунджаар 836 хүн болж нэмэгджээ. Үүнээс өмнө нэгдүгээр сараас дөрөвдүгээр сар хүртэл дунджаар 696 хүн байжээ. Дайны эхэн үед, тухайлбал 2022 оны хаврын эхний саруудад хамгийн олон тооны энгийн иргэд амиа алджээ.

Ихэнх хүмүүсийн (7653) үхлийн шалтгаан нь их хэмжээний талбай хамран устгах чадалтай тэсрэх зэвсэг ашигласантай холбоотой байв. Дайны үеэр 293 хүн минад өртөж  амиа алдсан. Энгийн иргэдийн хамгийн их хохирол амссан бүс нутгийн жагсаалтад Донецк, Луганск, Харьков, Херсон, Киев мужууд багтжээ.

Эх сурвалж: Мoscowtimes.ru