Путин Өмнөд Африкт болох БРИКС-ийн дээд хэмжээний уулзалтад оролцохгүй 

ОХУ-ын ерөнхийлөгч Владимир Путин Өмнөд Африкт болох БРИКС-ийн дээд хэмжээний уулзалтад оролцохгүй гэж ерөнхийлөгчийн тамгын газраас мэдээллээ. 

“Харилцан тохиролцсоны дагуу ОХУ-ын Ерөнхийлөгч В.Путин дээд хэмжээний уулзалтад оролцохгүй” гэж мэдэгдэлд дурджээ.

Түүнчлэгн ОХУ-ын ерөнхийлөгч Владимир Путин харилцан тохиролцсоны үндсэн дээр Йоханнесбургт болох БРИКС-ийн дээд хэмжээний уулзалтад ирэхгүй гэж Өмнөд Африкийн ерөнхийлөгч Сирил Рамафосагийн ажлын албаны цахим хуудсанд мэдээлжээ.

Наймдугаар сарын 22-24-нд Йоханнесбург хотноо болох БРИКС-ийн 15 дахь удаагийн дээд хэмжээний уулзалтад оролцох Оросын төлөөлөгчдийг Гадаад хэргийн сайд Сергей Лавров тэргүүлнэ. Путин Москвагаас видео линкээр дамжуулан дээд хэмжээний уулзалтад оролцох бололтой.

 БРИКС-ийн дээд хэмжээний уулзалтад Путин биечлэн оролцохгүй болсон нь Олон улсын эрүүгийн шүүхээс Путиныг баривчлах шийдвэр гаргасан, мөн төрийн эргэлт хийх вий гэсэн болгоомжлолын улмаас энэ аялал эргэлзээтэй болсон гэж хэвлэлүүд мэдээлжээ.

Гуравдугаар сарын 17-нд Олон улсын эрүүгийн шүүхээс Путин болон Ерөнхийлөгчийн хүүхдийн эрхийн асуудал эрхэлсэн комиссар Мария Львова-Белова нарыг баривчлах шийдвэр гаргасан юм. Шүүхийн мэдэгдэлд уг хэргийг Украйнаас хүүхэд хууль бусаар экспортлохтой холбоотой гэж үзсэн. 

Хэрэв тэр Өмнөд Африкт айлчилбал Путиныг баривчлах шийдвэрийг Олон улсын эрүүгийн шүүхээс гуравдугаар сард гаргаснаас хойш хийх анхны албан ёсны гадаад айлчлал болох байв. 

Өмнөд Африкийн Бүгд Найрамдах Улс нь Олон Улсын Эрүүгийн Шүүхийн  шийдвэрийг биелүүлэх үүрэг хүлээсэн Ромын дүрэмд гарын үсэг зурсан орнуудын нэг юм.

Эх сурвалж: ВВС, Лента.ру