Барууныхан Украиныг сөрөг довтолгоо хийх хангалттай бэлтгэлгүй байгааг урьдаас мэдэж байжээ

 Барууны цэргийн номлол нь дайсны бэхлэлт рүү  амжилттай довтлохын тулд агаарын давамгай байдлыг олж авах шаардлагатай гэж үздэг ч барууны сөнөөгч онгоцуудыг Украин руу шилжүүлэх шийдвэрийг Цагаан ордон  одоо хүртэл гаргаагүй байна.

Киев энэ хавар томоохон сөрөг довтолгоогоо эхлүүлэхэд барууны орнуудын цэргийн удирдагчид Украины зэвсэгт хүчинд Оросын цэргүүдийг бэхлэлтийн байрлалаас нь ухраан гаргах бэлтгэл,  пуужин харвахаас эхлээд байлдааны онгоц хүртэл зэвсгийн арсенал дутмаг байгааг мэдэж байсан. Гэсэн хэдий ч тэд украинчуудын эр зориг, шийдэмгий байдал нь тэдэнд ялах боломжийг олгоно гэж найдаж байсан гэж Wall Street Journal ням гарагт бичжээ. 

Сөрөг довтолгоо улам бүр саарч, энэ онд Украины томоохон амжилтад хүрэх магадлал багассаар байгаа тул Вашингтон болон түүний холбоотнууд илүү урт сунжирсан дайн, үүний үр уршгаар шинэ зардал гарах эрсдэлтэй тулгарч байна.

Байден 2024 онд сонгуульд оролцохдоо Киевт үзүүлэх тусламжийг сонгуулийн кампанит ажлынхаа шаардлагуудтай тэнцвэржүүлэх хүндхэн даалгавартай тулгарч байна гэж хэвлэлд тэмдэглэжээ.

АНУ-ын шийдэмгий бус байдал нь Европын удирдагчдын санаа бодолтой улам бүр зөрчилдөж байгаа бөгөөд Европ тивийн аюулгүй байдлыг хангахын тулд Украины бүрэн ялалт  зайлшгүй байх ёстой гэсэн итгэл сүүлийн саруудад нэмэгдэж байна.

Гэсэн хэдий ч Европт Украинчуудын ялалтыг хангах хангалттай нөөц байхгүй. Барууны дипломатуудын үзэж байгаагаар Европын удирдагчид ч мөн адил Вашингтоны дэмжлэг улам суларвл Киевт үзүүлэх дэмжлэгийг дорвитой нэмэгдүүлэх магадлал багатай гэжээ. 

Өнгөрсөн жилтэй харьцуулахад фронтын байдал эрс өөрчлөгдсөн гэж WSJ бичжээ. Тэр үед Украин Оросын хуурай замын том нүсэр цэргийн хүчний эсрэг өндөр хөдөлгөөнтэй, төвлөрсөн бус хамгаалалтыг ашиглаж, Киевийн ойролцоох давшилтыг зогсоож, дараа нь Харьков, Херсоныг орхин явахад хүргэсэн. Москва тэр үед хүчирхэг агаарын хүчээ бага ашигласан.

"Одоо Украин хэдхэн сарын дотор хүчирхэг хамгаалалт байгуулж чадсан Оросын цэргүүдийн байрлалын эсрэг довтолгоонд орж байна" гэж WSJ бичжээ. Барууны цэргийн номлолын хамгаалалтад байгаа дайсан руу довтлохын тулд агаарын болон хуурай замын хүчнийг сайтар зохицуулан хослуулан хэрэглэх шаардлагатай.

Нэмж дурдахад, Украины Зэвсэгт хүчинд агаарын давуу байдал байхгүй байгаа нь бас санаа зовоож байна. Цэргийнхний үзэж байгаагаар үүнгүйгээр нарийн төвөгтэй довтолгооны ажиллагаа явуулах боломжгүй юм. Барууны ямар ч арми агаарын бүрэн давуу байдалгүйгээр дайсны бэхэлсэн шугамын эсрэг довтолгоо хийхгүй гэж тэд хэлэв.

Украины сөрөг довтолгоог амжилтанд хүргэхэд шаардагдах агаарын болон агаарын довтолгооноос хамгаалах систем дутмаг байгааг Америкийн шинжээчид энэ оны эхээр мэдэж байсан гэжээ.

Киевт Америкийн "Patriot" батерей, Германы "Gepard" систем зэрэг фронтын шугамын ойролцоо байрлуулах боломжтой агаарын довтолгооноос хамгаалах хангалттай зэвсэг байхгүй. 

Украйны нисгэгчдэд F-16 сөнөөгч онгоц жолоодох сургалтыг эхлүүлсэн ч АНУ-ын засаг захиргаа эдгээр онгоцыг Украины Зэвсэгт хүчинд нийлүүлэх зөвшөөрлийг хараахан өгөөгүй байна. Тэдний үйл ажиллагаанд шаардлагатай бааз суурийг бий болгоход хэдэн сар шаардагдах бөгөөд шинжээчдийн үзэж байгаагаар өөдрөгөөр бодоход Украины F-16 онгоцууд ирэх жилээс өмнө агаарын орон зайд харагдаж мэдэх юм. 

Гэхдээ энэ тохиолдолд ч гэсэн Украин яг хэдэн сөнөөгч авах, нисэх онгоцыг ямар зэвсэглэлээр хангах, тэдгээрийн засвар үйлчилгээ хэрхэн явагдах, бусад цэргийн салбаруудтай хэр зэрэг уялдах зэрэг нь тодорхойгүй байгаа тул тэд хэр үр дүнтэй байх вэ гэсэн асуулт гарч ирж байна.

Орчин үеийн сөнөөгчдийг ашиглахын тулд Украины армиас цэргийн ажиллагааны зохицуулалтыг шинэ түвшинд гаргах шаардлагатай болно. Үүний зэрэгцээ Украинд нисэх онгоц шилжүүлэх асуудлыг шийдвэрлэх хугацаа хойшилсон нь Орост агаарын цэргийн хүчээ цаашид үргэлжлүүлэн бэхжүүлэх боломжтой болж байна.

Эх сурвалж: ВВС