Орост шатахууны үнийн өсөлт түүхэн дээд хэмжээнд хүрэв. ЯАГААД... 

Сүүлийн саруудад ОХУ-д бензиний үнэ түүхэн дэх амжилтыг ар араасаа тогтоосоор байна. Шатахуун түгээх станцуудад шатахууны үнэ хэдийнэ өсч эхэлсэн бөгөөд эрх баригчид зах зээлийг тогтворжуулахыг хичээж байна. 

Сүүлийн саруудад Орост бензиний үнэ огцом өссөн. Он гарснаас хойш АИ-92, АИ-95 бензиний биржийн ханш 56.9%, 60.4%-иар тус тус өссөн байна.

"Петрол плюс"-ын мэдээгээр одоо ОХУ-д АИ-92-ын дундаж үнэ 49.63 рубль буюу 0.55 доллар байна. Харин  AИ-95 - 53.45 рубль. (0.59 доллар).

Өнгөрснийг эргэн харвал 2018 онд бензиний үнэ огцом өссөн нь олон арван бүс нутагт эсэргүүцлийн жагсаалыг өрнүүлж байв. Дараа нь эрх баригчид газрын тосны компаниудтай үнийн өсөлтийг хязгаарласан гэрээ байгуулсан. Харин 2023 он цэрэг дайны жил хэдий ч үнийн өсөлтийг хязгаарлах татаасаас татгалзахаар шийдээд байгаа юм.

Одоогоор ОХУ-д бензиний үнийн өсөлттэй холбоотой ямар нэгэн эсэргүүцэл гараагүй байна. Гэсэн хэдий ч эрх баригчид энэ үнийн өсөлтийг хязгаарлахаар оролдож байна.

Долдугаар сарын 24-нд Шадар сайд Александр Новак бензин экспортлогчдын тоог хязгаарлах тухай Эрчим хүчний яамны саналыг дэмжив. 

Үүний дараа бөөний үнэ зургадугаар сарын эхнээс хойш анх удаа буурч эхэлсэн. Долдугаар сарын 25-нд Санкт-Петербургийн олон улсын түүхий эдийн биржийн арилжаа эхлэх үед АИ-92-ын үнэ тонн тутамд 65,165 мянган рубльд хүрч дээд амжилт тогтоожээ.  Харин дараа нь тонн тутамд 63.262 мянган рубль болж  бага зэрэг буурчээ.

Үнийн өсөлтөд юу нөлөөлөв?
Үнийн өсөлтөд нөлөөлсөн гол хүчин зүйл бол рублийн ханшийн уналт гэж Эрчим хүч, санхүүгийн хүрээлэнгийн ерөнхийлөгч Марсель Салихов мэдэгдэв. Рублийн ханш буурч байгаа энэ үед бензиний экспорт улам сонирхол татахуйц бизнес болж байгаа нь газрын тосны компаниудад илүү их түлш экспортлох хөшүүргийг бий болгож байна.

Өөр нэг хүчин зүйл бол есдүгээр сарын 1-нээс газрын тос боловсруулах үйлдвэрүүдэд төлж буй бууралтын механизмын төлбөрийг /демпфер/ хоёр дахин бууруулах төлөвтэй байна. Өөрөөр хэлбэл энэ нь шатахууны үнийн өсөлтийг бууруулах зорилгоор төрөөс хувийн компаниудад олгож буй төлбөр юм. Ингэснээр төсвөөс газрын тосны үйлдвэрүүдэд олгож буй төлбөр сард 30 тэрбум рублиэр буурна гэж тус улсын Сангийн яам тооцоолжээ.

“Өнөөдөр боловсруулах үйлдвэрүүдийн ашиг тонн тутамд 8000 рубль байна, өмнө нь тонн тутамд 2000 хүрэхгүй байсан. Хэрэв энэ өссөн ашиг хаанаас бий болов гэдгийг харвал тэр нь төрөөс олгож буй татаастай холбоотой. Бид газрын тос боловсруулах үйлдвэрүүдэд төсвөөс ашиг төлдөг байж таарахгүй” гэж Силуанов хэлэв.

Гэсэн хэдий ч төлбөрийн бууралт нь экспортын болон дотоодын үнийн зөрүүг хэсэгчлэн нөхөж байгаа тул дотоодын үнэ өсөх ёстой гэж үзэж байна.

Ойрын хугацаанд байдал хэрхэн өрнөх бол?

Гэхдээ шатахууны үнийн өсөлтөд нөлөөлж буй хүчин зүйлүүд хэвээр байх магадлалтай гэж  World of Investments-ийн шинжээчид тэмдэглэжээ. Тухайлбал, рублийн суларч буй ханш, дэлхийн зах зээл дээрх үнийн өсөлт, төрөөс олгож байгаа татаасыг бууруулах гэхчлэн. 

Есдүгээр сараас эхлэн засгийн газар нефтийн компаниудад бөөний зах зээл дээрх бензиний борлуулалтыг  12% -иас 13%,  дизель түлшний борлуулалтыг 8.5% -иас 9.5% хүртэл нэмэгдүүлэхийг  үүрэг х болгосон. Энэ нь үнийг бууруулахад туслана гэж үзэж байна

Эх сурвалж: ВВС