УКРАИНЫ ЭРХ БАРИГЧИД: Ялалтад хүрэх зам урт удаан байх болно 

-Украины эрх баригчид иргэдээ урт удаан үргэлжлэх дайнд бэлтгэхийг уриалав-

Украин Оросыг ялахын тулд урт удаан, хүнд хэцүү дайнд бэлтгэх хэрэгтэй гэж тус улсын Шадар сайд Ирина Верещук мэдэгдэв. Түүний хэлснээр, Оросын түрэмгийллийн эсрэг тэмцэл урьд өмнө яригдаж байснаас удаан үргэлжлэх болно.

"Бид шударга байх ёстой. Энэ дайны ялалтад хүрэх зам урт бөгөөд хэцүү байх болно. Хоёр, гурван долоо хоног, эсвэл он дуустал, ирэх хавар гэхчлэн нэрлэдэг хугацаа энэ бүхэн бодитой биш" гэж Верещук тelegram суваг дээрээ бичжээ.

Верещук эх орон нэгтнүүддээ зөвхөн бодит зүйлсийг авч, бодит боломжоос хол хөндий дэвэргэсэн хандлагад цаг зав, нөөц хүчээ үрэхгүй байхыг зөвлөжээ. Түүний бодлоор украинчууд "гол зүйлд" анхаарлаа хандуулж, бусад бүх зүйлд ач холбогдол өгөх хэрэггүй. 

"Бид хожим хойно гэхээсээ илүүтэй одоо чадах бүхнээ хийж байна. Өдрөөс өдөрт. Тэгээд бид бие биенээ дэмждэг. Энэ нь бас чухал юм. Өнгөрсөн жил бид тэсвэр  тэвчээртэй байсан. Энэ бүхний эцэст бид ялах болно "гэж Верещук дүгнэв.

Украины Шадар сайдын мэдэгдэл нь 6-р сарын 4-нд эхэлсэн Украины сөрөг довтолгоо удаан үргэлжилж  хүссэн үр дүнд хүрэхгүй байгаатай холбогдуулан хийсэн юм. Тэрээр сөрөг довтолгооны  ахиц удаашралтай байгаа шалтгааныг өрнөдийн орнуудаас Киевт тусламж үзүүлэхгүй байгаатай холбон тайлбарлав. Украйны Зэвсэгт хүчин хурдан амжилт гаргахаасаа илүүтэй Оросын цэргийн хүчин чадлыг шавхаж, тэдний  хангамжийн шугамыг тасалж  устгахад анхаарлаа хандуулж байгааг тэр бас дурдав.

Үүний цаана Украины дайныг зогсоох арга замуудын нэг нь Киев эвсэлд нэгдэхийн хариуд зарим газар нутгаасаа татгалзах явдал байж магадгүй гэж НАТО мэдэгдсэн. "Би ийм байх ёстой гэж хэлэхгүй. Гэхдээ энэ нь магадгүй шийдэл байж магадгүй" гэж НАТО-гийн Ерөнхий нарийн бичгийн даргын ажлын албаны дарга Стиан Йенссен хэлэв.

Харин Киев энэ санааг хэлэлцэхээс татгалзаж байгаа юм. “Украины нутаг дэвсгэрийнхээ нэг хэсгийг өгсний хариуд Украин НАТО-д элсэх тухай ярих нь огт хүлээн зөвшөөрөх зүйл биш. Бид Украйны нэгэн адил тус холбоо газар нутгаа наймаалцдаггүй гэсэн зарчим баримталж ирсэн” гэж ГХЯ-ны хэвлэлийн төлөөлөгч Олег Николенко фэйсбүүктээ бичжээ.

Украины Ерөнхийлөгчийн Тамгын газрын даргын зөвлөх Михаил Подоляк хэлэхдээ, Киев өөрийн нутаг дэвсгэрээс татгалзаж болзошгүй тухай яриа нь оргүй зүйл. Харин ч Украины ялалтыг түргэтгэх, НАТО-д бүрэн гишүүнээр элсэх талаар ярилцах нь Евро-Атлантын аюулгүй байдлын ашиг сонирхолд нийцнэ” гэжээ.

Эх сурвалж: Мoscowtimes.ru