МҮХАҮТ-ын ерөнхийлөгчид “Улаанбаатар үнэт цаасны бирж” ХХК-ийн гүйцэтгэх захирал Б.Гантулга нэр дэвшихээ илэрхийлэв

Монголын Үндэсний Худалдаа Аж Үйлдвэрийн XXI их хурал энэ сарын 20-нд товлогдсон. Энэ удаагийн хурлаар МҮХАҮТ-ын ерөнхийлөгчийн албыг хашиж байгаа О.Амартүвшин өөрийн хүсэлтээр албан тушаалаа дараагийн хүндээ шилжүүлж, ирэх жилийн сонгуулийн бэлтгэл ажилдаа ханцуй шамлахаар болжээ.

Тиймээс МҮХАҮТ-ын ерөнхийлөгчийн суудалд горилогчид албан ёсоор нэр дэвших тухай мэдээллээ өөрийн албан ёсны нүүр хуудсаар дамжуулан илэрхийлж эхлэв.

 Тухайлбал, “Улаанбаатар үнэт цаасны бирж” ХХК-ийн гүйцэтгэх захирал Б.Гантулга МҮХАҮТ-ын Ерөнхийлөгчид нэр дэвшихээр шийдвэрлэсэн гэжээ.

Тэрээр өөрийн бизнесийн замналыг:

1. Банк (Арилжааны банк) - 2004-2009
2. Гадаад худалдаа (Уул уурхай, Сэргээгдэх эрчим хүч), 2009-2014
3. Үйлдвэрлэл (Хөдөө Аж Ахуй, Cүү) 2014-2019
4. Хөрөнгийн зах зээл (Финтек, Тэтгэврийн сан), 2019- гэж тодорхойлжээ.

Б.Гантулга өөрийн нүүр хуудсанд, Хувийн хэвшлийн орчинд шинэ үе гарч ирж байгааг Та бид бүгдээрээ харж байгаа, мэдэрч байгаа. Монгол Улсын хувийн хэвшлийн анхдагч компаниуд одооноос бизнесийн дараагийн үеийг бэлтгэж 2 дах үе ихэнх компаниудад гүйцэтгэх захирал, удирдлагын ажил эрхэлж эхлээд байгаа. Шинээр олон Старт-Ап компаниудыг залуучууд байгуулж байна. Нөгөө талаас улс төрийн намууд, төрийн бүтэц зохион байгуулалт ч шинэчлэгдэж, шинэ үе орж ирж байна.

Тиймээс хувийн хэвшлийн хамгийн Ууган олон нийтийн байгууллага болох Танхим ч гэсэн шинэ үетэй нэг хэлээр, нэг соёлоор, нэг түвшинд харилцах, ойлголцох хэрэгтэй гэж харж байна” хэмээн байр сууриа илэрхийлжээ.