Монголбанк бодлогын хүүгээ 13 хувьд хэвээр үлдээв

Монголбанкны мөнгөний бодлогын хороо хуралдаж, бодлогын хүүг хэвээр үлдээхээр шийдвэрлэсэн байна.

 Монголбанкны ерөнхийлөгч Б.Лхагвасүрэн “ Мөнгөний бодлогын хороо энэ 9 дүгээр сарын 13-15-ны өдөр хуралдаж, дараах шийдвэрийг гаргалаа. Хурлаар эдийн засаг банк санхүүгийн өнөөгийн нөхцөл байдлыг харгалзан бодлогын хүүг 13 хувьд хэвээр хадгалах шийдвэр гаргасан.

Шийдвэрт, дэлхийн эдийн засгийн төлөв өмнөх бодлогын шийдвэр гаргаж байсантай харьцуулахад муудаж, тодорхой бус байдал өндөр хэвээр үргэлжлэх төлөвтэй байна. Гадаад эдийн засгийн өсөлт энэ онд саарах төдийгүй, ирэх онд ч сэргэхээргүй байгаа юм. Геополитикийн хурцадмал нөхцөл байдлаас үүдэлтэй эдийн засаг санхүүгийн хориг арга хэмжээ болон дэлхийн томоохон банкуудын хэрэгжүүлж байгаа мөнгөний хатуу бодлого гол нөлөөтэй байна. Түүнчлэн дэлхийн эдийн засгийн  гуравны нэгийг бүрдүүлж байгаа БНХАУ-ын эдийн засаг сэргэлт хүлээлтээс бага байгаа нь анхаарал татсан асуудал болж байна. Экспорт буурч, үл хөдлөх хөрөнгийн салбарын хүндрэл энэ улсад даамжирсан хэвээр байгаа юм.

Дотоодын эдийн засгийн хувьд өсөлт нэмэгдэж, инфляц буураад байна.Манай улсын эдийн засгийн өсөлт хүлээлтээс давж, энэ оны эхний хагаст 6.4 хувьтай гарсан. Нүүрсний экспорт түүхэн дээд хэмжээнд хүрч өссөнөөр уул уурхайн болон бусад салбар идэвхжиж, эдийн засгийн өсөлт хүлээлтээс давж гарлаа. Төсвийн тодотголын нөлөөгөөр өсөлтийн төлөв сайжирсан байгаа.

 Гэхдээ өвөлжилт хүндэрч малын зүй бус хоргодол сүүлийн 10 жилийн дунджаас 3 дахин өндөр байснаар хөдөө аж ахуйн салбарын үйлдвэрлэл буурч, энэ оны төсөөлөл буурч гарсан. Инфляц буурч, Монголбанкны төсөөлөлтэй нийцтэй байгаа бөгөөд ойрын 2-3 сард 9-10 хувьд хүрч тогтвортой байхаар харагдаж байна.

Экспортын орлогын өсөлт ирэх саруудад өсч, төлбөрийн тэнцэлд нөлөөлөхөөр байгаа юм. Инфляц алгуур буурч байгаа ч цаашид өсгөх эрсдэлт хүчин зүйл байсаар байна. Дотоод талаасаа ирэх оны төсөв, төсвийн хүрээний мэдэгдлээс нэмэгдэх, экспортын биет хэмжээ болон үнэ хүлээлтэд хүрэхгүй байх, нийлүүлэлтийн шалтгаантай нэмэгдэж буй дотоодын хүнсний инфляц цаашид буурахгүй байх гэсэн дотоод хүчин зүйлс бий.

Гадаад  орчны хувьд геополитикийн нөхцөл байдал, БНХАУ-ын эдийн засаг, дэлхий нийтэд болж буй цаг агаарын эрс тэс үзэгдэл, гадаад эдийн засгийн төлөв байна.

-Дэлхийн томоохон банкууд бодлогын хүүгээ чангарч байгаа. Энэ тухайд ямар мэдээлэл өгөх вэ?

-2023 оны төсвийг хагас жилээр тодотгоод 1.8 их наядаар зардал нэмэгдсэн. Үүнтэй холбогдуулж, инфляц бидний тооцсон түвшинд хүрч буурахгүй байна. Ирэх оны төсөв яг өргөн баригдаагүй ч ерөнхий дунд хугацааны тоо нь бол гарсан. Ерөнхийдөө ирэх оны төсөв 23-24 их наядаар төсөөлөгдөж байгаа. Тийм учраас төсөв тэлэлттэй гарна гэсэн хүлээлт бол байна. Тиймээс бодлогын хүү 13, инфляц 10 хувьтай буюу +3 гэсэн зөрүү байгаа ч бодлогын хүүг хэвээр хадгалах нь зүйтэй гэсэн шийдвэр гаргасан. Дэлхийн өндөр хөгжилтэй орнуудын төвбанкуудын хийх гэж байгаа алхмуудын талаар мэдээлэл гарч эхэлж байна. АНУ-ын хувьд хэдийгээр инфляц буурч байгаа ч төсөөлсөн хэмжээнд хүрэхгүй байгаа болохоор энэ улиралд хүүгээ өсгөх тал руу байх болов уу гэсэн мэдэгдэл хийгээд байна. Дийлэнх хүнсний бараа маань импортоор орж ирдэг учраас давхар болгоомж бол байна" гэв.

-