Буган чулуун хөшөөг Дэлхийн өвийн жагсаалтад бүртгэх талаар хэлэлцэнэ

Дэлхийн өвийн хорооны 45 дугаар ээлжит чуулган есдүгээр сарын 10-25-ны өдрүүдэд Саудын Арабын Хаант Улсад хуралдаж байна. Чуулганаар оролцогч улсуудаас нэр дэвшүүлсэн өвийг үндэслэн конвенцын хүрээнд хамгаалах шаардлагатай дэлхий нийтийн хосгүй гайхамшигт үнэ цэн бүхий байгалийн болон соёлын өвийг тодорхойлж, тэдгээр өвийг Дэлхийн өвийн жагсаалтад бүртгэх, хасах, Дэлхийн өвийн жагсаалтад бүртгэсэн өвийн хадгалалтын нөхцөл байдлыг хянан шалгах зэрэг олон асуудлуудыг шийдвэрлэдэг.

Энэ удаагийн чуулганаар Монгол Улсын нутаг дэвсгэр дэх хүрлийн цаг үеийн нүүдэлчдийн бүтээсэн гайхамшигт дурсгал болох Буган чулуун хөшөөг бүртгэх талаар хэлэлцэх юм.

Буган чулуун хөшөө нь хэдэн зуун килограммаас 4 тонн хүртэлх жинтэй чулууг дөрвөлжлөн засаж, бугын угалзарсан эвэртэйгээр загварчлан сийлж, дээд хэсэгт нь нар, сар, зүүлт сэлтийг, доод хэсэг нь хутга, байлдааны зээтүү, нум сум зэрэг хөнөөх зэвсэг сийлсэн нийтлэг дүрслэлтэй байдаг.

Зарим тохиолдолд ирвэс, адуу, гахай, шувуу зэрэг амьтдыг дүрсэлсэн байх нь бий. Буган чулуун хөшөө нь хүрлийн цаг үеийн Төв Азийн нүүдэлчдийн бүтээсэн соёлын орон зайг танин мэдэх, нүүдэлчдийн угсаа гарвал, нийгэм, аж ахуй, соёл, овог аймаг хоорондын харилцаа холбоо зэрэг олон талт ой санамжийг бүрдүүлэхэд чухал үүрэг гүйцэтгэдэг түүх, соёл, урлаг, гоо зүй, танин мэдэхүйн асар их мэдээллийг агуулдаг нандин өв юм.

Буган чулуун хөшөө ба хүрлийн үеийн цогцолбор дурсгалыг дэлхийн өвд бүртгүүлснээр ЮНЕСКО-гийн 1972 оны Дэлхийн өвийн конвенцын үзэл санааг дэлгэрүүлэх үйлсэд Монгол Улсын хүчин чармайлтыг нотлон харуулахын зэрэгцээ дурсгалын эх төрх, бүрэн бүтэн байдлыг хадгалж хамгаалахад оролцогч талуудын оролцоог нэмэгдүүлэх, өвийн газрын үнэ цэнэ нэмэгдэх, соёлын аялал жуулчлалыг хөгжүүлэх боломж бүрдэх зэрэг олон талын чухал ач холбогдолтой билээ.