Б.Халиуныг яагаад Б.Ганхуяг барьцаалагдсан шүүгч гэсэн бэ

Нүүрсний гэх тодотголтой эрүүгийн хэрэгт холбогдуулан нийслэлийн Прокурорын газраас Т.Аюурсайхан, Б.Ганхуяг нарын 11 хүнд яллах дүгнэлт үйлдэж, Чингэлтэй дүүргийн Эрүүгийн анхан шатны шүүхэд шилжүүлсэн.

Яллагдагч нарын өмгөөлөгчдийн хүсэлтээр нүүрсний гэх эрүүгийн хэргийн урьдчилсан хэлэлцүүлгийн шүүх хуралдаан 2023 оны есдүгээр сарын 12-ны өдөр болж, Б.Ганхуяг ерөнхий шүүгч Б.Халиунд хандан “ Авлигатай тэмцэх газраас та лавлагаа бичгээ аваач. Таныг барьцаалагдаагүй гэдгийг би яаж мэдэх вэ. Би шүүхийг барьцаалагдсан байгаасай гэж огт бодохгүй байна. Б.Ганхуяг намайг болон яллагдагчаар татагдсан 11 хүн, Халиун таныг золиосолж байна” гэж хэлээд Чингэлтэй дүүргийн нийт шүүгчдээс татгалзаж буйгаа мэдэгдсэн.

Чухам яагаад ингэж мэдэгдэх болов. Үнэхээр шүүгчид итгэхгүй байх шалтаг, шалтгаан юу байв ?!

Баримт 1.

Яагаад Б.Халиунд хэргийг хуваарилав?!

Нүүрсний гэх тодотголтой хэрэгт холбогдуулан Б.Ганхуяг, Т.Аюурсайхан нарын 11 хүнд холбогдох хэргийг нийслэлийн Прокуророос 2023 оны наймдугаар сарын 01-ний өдөр Чингэлтэй дүүргийн шүүхэд шилжүүлсэн байна. Гэтэл 2023 оны наймдугаар сарын 04-ний өдөр Чингэлтэй дүүргийн Эрүүгийн хэргийн анхан шатны шүүхийн ерөнхий шүүгч Б.Халиунд хуваарилжээ. Яагаад ингэж гурван өдөр хүлээж, Б.Халиун шүүгчийн тойрогт буюу ээлжинд тааруулж хуваарилав гэдэг нь яллагдагч нарт байтугай энгийн хүмүүст эргэлзээ төрүүлэх байдал үүсгэж байгаа юм. Б.Халиун бол АТГ-т шалгагдаж байсан 18 шүүгчийн нэг.

Тэр тусмаа Б.Халиун шүүгчийг нийгэмд дуулиан тариад байсан Б.Баасанцогт нарын өмгөөлөгчдийн холбогдсон Эрүүгийн 190200800 дугаартай хэрэг буюу хахууль өгөх, биеэ үнэлэхийн зохион байгуулах гэх хэрэгт холбогдуулан шалгаж байсан.Сануулахад, Б.Баасанцогт, С.Соёмбо-Эрдэнэ, Т.Өсөхбаяр, М.Алдар, Б.Халиун, Б.Ариунхишиг нарын шүүгч Баянзүрх дүүргийн “  Рarkview” гэх хотхонд байрлах байранд цуглаж, архидсан гэх хэрэг нийгмийн бухимдлыг багагүй өрдснийг уншигч та мартаагүй байх. 

Баримт 2.

АТГ-ын Мөрдөн шалгах хэлтсээс 2021 оны гуравдугаар сарын 23-ны өдөр тухайн үеийн Шүүхийн Ерөнхий зөвлөлийн дарга Э.Батбаярт хандан “Эрүүгийн 190200800 дугаартай хэргийг хянан шийдвэрлэхэд шаардлагатай Чингэлтэй дүүргийн Эрүүгийн хэргийн анхан шатны шүүхийн шүүгч Ё.Цогзандан, Г.Буяннэмэх, Б.Халиун нарыг шүүгчээр томилсон зарлиг, төрийн албан хаагчийн хувийн хэрэг, зан байдлын тодорхойлолтыг Эрүүгийн хэрэг хянан шийдвэрлэх тухай хуулийн 16.6 дугаар зүйлийн нэг дэх хэсэн заасан шаардлагын дагуу  баталгаажуулч ирүүлэхийг хүссэн байдаг. Гэвч энэ хэрэгт Баянгол, Хан-Уул дүүргийн Иргэний хэргийн анхан шатны шүүхийн шүүгч асан Б.Мөнхбаяр, Д.Энхцэцэг нарыг гэм буруутайд тооцсон байдаг.

Харин Б.Халиун нарын үлдсэн шүүгчид ямар хариуцлага ногдуулсан бэ? Шүүхийн Ерөнхий зөвлөлийн Ёс зүйн  хороо хэрхэн шийдвэрлэсэн тодорхойгүй байгаа учраас Б.Ганхуяг ийн ахин дахин сануулан нэхсэн хэрэг.

Баримт 3.

Нүүрсний гэх эрүүгийн хэргийн урьдчилсан хэлэлцүүлгийн шүүх хуралдааны үеэр яллагдагч Т.Түвшинбаатар түүний хэргийг харьяаллын дагуу Дорнод аймгийн шүүх рүү шилжүүлж өгнө үү гэх хүсэлт тавьж байсан юм.

Гэтэл Б.Халиун шүүгч Монгол Улсын Дээд шүүхэд хандан “Хэрэг хянан шийдвэрлэх шүүхийн харьяалал тогтоолгох тухай” албан бичиг илгээсэн байна. Өөрөөр хэлбэл, нүүрсний гэх хэргийг бүхэлд нь Чингэлтэй дүүргийн шүүх дээр хянан шийдвэрлэхийн тулд Дээд шүүхэд албан бичиг илгээх баталгаажуулахыг хүссэн аж.

Эрүүгийн хэрэг хянан шийдвэрлэх тухай хуулийн 2.2-т зааснаар,

6.Гэмт хэрэг нь хэд хэдэн шүүхийн харьяалах нутаг дэвсгэрт үйлдэгдсэн бол сүүлчийн гэмт хэрэг үйлдэгдсэн газрын харьяалах шүүх хэргийг хянан шийдвэрлэнэ.

7.Гэмт хэрэг нэг шүүхийн харьяалах газар эхэлж, нөгөө шүүхийн харьяалах газарт төгссөн бол төгссөн газрын шүүх хэргийг хянан шийдвэрлэнэ гэх заалт бий.

Мөн 2.2-т  “Хэрэг тухайн шүүхэд харьяалагдахгүй байвал шүүгчийн шийдвэрээр харьяалах шүүхэд шилжүүлнэ” гэж бий. Шүүгчийн мэдлийн асуудал байтал ийн Дээд шүүхэд хандсан нь өөрөөсөө асуудлыг зайлуулах гэж хичээж буйг илэрхийлнэ.

Харин Дээд шүүх рүү прокурорын байгууллага л санал оруулдаг гэдгийг Б.Халиун шүүгч сайн мэдэж байгаа нь тодорхой.

Баримтаас баримт ургасаар Чингэлтэй дүүргийн Эрүүгийн хэргийн анхан шатны шүүхийн ерөнхий шүүгч Б.Халиун нь авлига, албан тушаалын хэргээсээ мултрахын тулд нүүрсний гэх хэрэгт улайрч байна гэх хардлагыг эрхгүй төрүүлж байгаа юм.